Agalatia 5
Messiya nĩ gũtuohora aatuohorire nĩguo tũgĩe na wĩyathi. Nĩ ũndũ ũcio, mwĩhandei wega na mũtigetĩkĩre kuohwo icoki rĩa ũkombo rĩngĩ.
Ta thikĩrĩriai ciugo ciakwa! Niĩ Saũlũ ngũmwĩra atĩrĩ, mũngĩĩtĩkĩra kũrua-rĩ, Messiya ndangĩgĩa bata na inyuĩ o na hanini.
Ningĩ nĩ ngũmwĩra o rĩngĩ atĩ mũndũ o wothe ũngĩĩtĩkĩra kũrua, ũcio amenye atĩ nĩ agĩrĩirwo nĩ gwathĩkĩra Watho ũrĩ wothe.
Inyuĩ arĩa mũrageria gũtuĩka athingu nĩ ũndũ wa Watho-rĩ, nĩ mũtigithanĩtio na Messiya; inyuĩ nĩ mũgũĩte mũgatigana na wega wa Yahweh
No ithuĩ-rĩ, tũkoragwo twĩhokete atĩ nĩ tũgatuwo athingu. Ũndũ ũcio nĩguo tũkoragwo twĩrĩgĩrĩire tũrĩ na wĩtĩkio, tũhotithĩtio nĩ Roho.
Nĩgũkorwo thĩinĩ wa Messiya Yahshua, kũrua kana kwaga kũrua gũtirĩ bata. Ũndũ ũrĩa ũrĩ bata nĩ wĩtĩkio ũrĩa ũrutaga wĩra na njĩra ya wendani.
Nĩ mũratengʼagĩra ihenya rĩega. Nũ wamũgiririe mũgĩtiga gũcoka gwathĩkĩra ũhoro-ũrĩa-wa-ma?
Kũringĩrĩrio kwa mũthemba ũcio gũtiumĩte kũrĩ ũrĩa wamwĩtire.
“Ndawa nini tu ya kũimbia mĩgate nĩ ĩtũmaga mũtu ũrĩa mũkande nayo wothe ũimbe.”
Nĩ ndĩhokete thĩinĩ wa Yahweh atĩ inyuĩ mũtikũgarũrũka mũgĩe na meciria mangĩ. Ũrĩa ũramũtururia nĩwe ũkaaherithio o na angĩkorwo arĩ ũ.
Ariũ na aarĩ a Ithe witũ, angĩkorwo no ndĩrahunjia ũhoro wa kũrua-rĩ, ndĩrakĩnyarirwo nĩkĩ? Angĩkorwo ũguo nĩguo-rĩ, ũndũ ũrĩa ũtũmaga andũ mahĩngwo, na nĩguo ũhoro wa gũcuurio mũtĩinĩ-rĩ, nĩ mweherie
No nyende andũ acio mamũthĩnagia mathiĩ na mbere o nginya meherio biũ.
Inyuĩ ariũ na aarĩ a Ithe witũ, mwetirwo nĩguo mũgĩe na wĩyathi. No rĩrĩ, mũtikahũthĩre wĩyathi wanyu kũrũmagĩrĩra merirĩria ma mwĩrĩ, no handũ ha ũguo-rĩ, tungatanagĩrai inyuĩ-ene mũrĩ na wendani.
Tondũ-rĩ, ũhoro wothe wa Watho ũhingagio nĩ Rĩathani rĩrĩ rĩmwe: “Enda mũndũ ũrĩa ũngĩ mũrigainie o ta ũrĩa wĩyendete wee mwene.”
No rĩrĩ, mũngĩrũmana mũkĩrĩanaga-rĩ, mwĩmenyererei mũtikaninane inyuĩ ene.
Nĩ ũndũ ũcio nguuga atĩrĩ, thiagai mũtongoretio nĩ Roho, na mũtirĩhingagia merirĩria ma mwĩrĩ.
Nĩgũkorwo mwĩrĩ nĩ wĩriragĩria maũndũ marĩa matangĩendwo nĩ Roho, nake Roho nĩ areganaga na maũndũ marĩa meriragĩrio nĩ mwĩrĩ. Nĩ ũndũ ũcio Roho na mwĩrĩ itũũraga irũaga, na nĩkĩo mũtahotaga gwĩka ũrĩa mwendaga gwĩka.
No rĩrĩ, mũngĩtongorio nĩ Roho, inyuĩ mũtingĩkorwo mũgĩathwo nĩ Watho.
Na rĩrĩ, maũndũ marĩa mekagwo nĩ mwĩrĩ nĩ moĩo, namo nĩ: Ũtharia, ũmaraya, na gwĩthahia, merirĩria ma mwĩrĩ,
na kũhoya mĩhianano, na kũrogana, na ũthũ, na kũũgitana, na ũiru, na mangʼũrĩ, na kwĩyenda, na nyamũkano, na ngarari,
gũcumĩkĩra na kũrĩo, na maruga marĩa mainagwo nyĩmbo iria itaagĩrĩire, o na maũndũ mangĩ ta macio. Nĩ ndamũkaanirie, o ta ũrĩa ndamũkaanirie hĩndĩ ya mbere, atĩ andũ arĩa mekaga maũndũ ta macio matikagaya ũthamaki wa Yahweh.
No rĩrĩ, maciaro ma Roho nĩ wendani, na gĩkeno, na thayũ, na gũkirĩrĩria, na kũiguanĩra tha, na gũtugana, na kwĩhokeka,
na ũhoreri, na kwĩgirĩrĩria merirĩria ma mwĩrĩ. Macio-rĩ, gũtirĩ watho wa kũgiria mekagwo.
Nao andũ arĩa marĩ thĩinĩ wa Messiya Yahshua nĩ macuurĩtie mĩĩrĩ yao mũtĩ-igũrũ hamwe na thuti ciayo na merirĩria mayo
Angĩkorwo tũtũire muoyo nĩ ũndũ wa Roho-rĩ, kĩrekei tũtongoragio nĩ Roho.
Rekei tũtige gwĩtĩa, na kũũgitana, o na kũiguanagĩra ũiru.