Akorinitho wa Keerĩ 11
Nĩ ngwĩhoka nĩ mũgũkirĩrĩria ũrimũ ũrĩa mũnini ndĩ naguo; ndamũthaitha mũngirĩrĩrie.
Nĩ ndĩraigua ũiru nĩ ũndũ wanyu, ũiru uumanĩte na gwĩtigĩra Yahweh. Ndamwĩrĩire o mũthuri ũmwe, na nĩwe Messiya, nĩgetha ngaamũneana kũrĩ we mũrĩ ta mũirĩtu gathirange.
No ndĩ na guoya gũtigatuĩke atĩ meciria manyu no maturuurio mũtiganĩrie ũgima na wĩyamũri wa kwĩrutĩra Messiya, o ta ũrĩa Hawa aahenekire nĩ nyoka na wara wayo.
Inyuĩ nĩ mwamũkagĩra ũhoro ũngĩ mũkenete, mũndũ o wothe angĩmũhunjĩria ũhoro wa Yahshua ũngĩ tiga Yahshua ũrĩa twamũhunjĩirie, kana mũngĩamũkĩra roho ũngĩ tiga Roho ũrĩa mwamũkĩrire, o na kana mũgetĩkia ũhoro-mwega ũngĩ tiga ũrĩa mwetĩkirie.
No ndigwĩciria atĩ ndĩ mũnini o na hanini kũrĩ “atũmwo acio anene.”
No ngorwo itarĩ mũrute ũhoro-inĩ wa kwaria, no ndĩ na ũmenyo. Nĩ tũmũmenyithĩtie maũndũ maya wega na njĩra ciothe.
Hihi nĩ kwĩhia ndeehirie nĩ kwĩnyihia nĩguo ndĩmũtũũgĩrie inyuĩ na ũndũ wa kũmũhunjĩria Ũhoro-ũrĩa-Mwega wa Yahweh hatarĩ irĩhi?
Nĩ gũtunya ndaatunyaga maũngano mangĩ ngĩamũkĩra ũteithio kuuma kũrĩ o nĩguo hote kũmũtungata.
Na hĩndĩ ĩrĩa ndaarĩ na inyuĩ, ndabatario nĩ kĩndũ-rĩ, ndiatuĩkaga mũrigo harĩ mũndũ o na ũrĩkũ, nĩgũkorwo ariũ na aarĩ a Ithe witũ moka kuuma Makedonia nĩ maheire indo cia kũigana mabataro makwa. Nĩ ndĩgirĩrĩirie ndigatuĩke mũrigo kũrĩ inyuĩ na njĩra o yothe, na nĩ ngũthiĩ na mbere gwĩka ũguo.
Ti-itherũ o ta ũrĩa ũhoro wa ma wa Messiya ũrĩ thĩinĩ wakwa, gũtirĩ mũndũ o na ũ thĩinĩ wa ngʼongo cia Akaia ũngĩngiria ndĩĩrahe ũguo
Nĩ kĩ gĩatũma njuge ũguo? Nĩ tondũ ndimwendete? Yahweh nĩ oĩ atĩ nĩ ndĩmwendete
Na nĩ ngũthiĩ na mbere na gwĩka ũrĩa ndĩreka, nĩguo njagithie kĩene andũ arĩa macaragia mweke wa kuoneka atĩ nĩ maiganaine na ithuĩ, thĩinĩ wa maũndũ marĩa merahaga namo.
Nĩgũkorwo andũ ta acio nĩ atũmwo a maheni, aruti wĩra a kũhĩtithia andũ, na metuaga atũmwo a Messiya
Naguo ũndũ ũcio ti wa kũmakania, nĩgũkorwo o na Shaitani o nake nĩ etuaga mũraika wa ũtheri.
Ndũkĩrĩ ũndũ wa kũgegania ndungata ciake cingĩĩtua ndungata cia ũthingu. Marigĩrĩrio-inĩ makaagĩa na kĩrĩa kĩringaine na ciĩko ciao.
Nĩ nguuga o rĩngĩ atĩrĩ: Mũndũ ndakae kuona ta ndĩ kĩrimũ. No angĩkorwo nĩguo mũkuona-rĩ, kĩnyamũkĩrei o ta ũrĩa mũngĩamũkĩra kĩrimũ, nĩguo ndĩĩrahe o hanini.
Ũhoro-inĩ wa mwĩraho ũyũ ndĩ naguo-rĩ, ndiraaria ta ũrĩa Yahweh angĩaria, no ndĩraaria o ta ũrĩa kĩrimũ kĩngĩaria.
Kuona atĩ andũ aingĩ nĩ mareraha ta ũrĩa thĩ ĩĩrahaga-rĩ, o na niĩ ngwĩraha o tao.
Tondũ inyuĩ mũkĩrĩ oogĩ-rĩ, nĩ mũkiragĩrĩria arĩa irimũ mũkenete!
Ti-itherũ, nĩ mũkiragĩrĩria mũndũ o wothe o na angĩmũtua ngombo ciake, kana ũrĩa ũkũmũhatĩrĩria, kana ũrĩa ũkũrĩa indo cianyu, kana ũrĩa ũgwĩtũũgĩria mbere yanyu, o na kana ũrĩa ũkũmũhũra hĩ.
Nĩ ngũconoka ngiuga atĩ ithuĩ nĩ twaremirwo nĩ gwĩka maũndũ ta macio! Ũndũ ũrĩa mũndũ ũngĩ angĩhota kwĩraha nĩ ũndũ waguo-rĩ, ndĩkĩarie ta ndĩ kĩrimũ-rĩ, o na niĩ no ngĩgerie kwĩraha nĩ ũndũ waguo.
Andũ acio nĩ Ahibirania? O na niĩ ndĩ Mũhibirania. Andũ acio nĩ Aisiraeli? O na niĩ ndĩ Mũisiraeli. Andũ acio nĩ njiaro cia Iburahĩmu? O na niĩ ndĩ wa rũciaro rwa Iburahĩmu.
Andũ acio nĩ ndungata cia Messiya? (Ngwaria ũguo ta ndĩ mũgũrũku.) Niĩ nĩ ndĩmakĩrĩte. Nĩ ndutĩte wĩra na kĩyo kũmakĩra, na ngaikio njera mahinda maingĩ makĩria yao, na ngahũrwo na kĩboko makĩria, o na mahinda maingĩ ndanakuhĩrĩria gũkua.
Ayahudi nĩ mahũrire na kĩboko maita matano, o ihinda iboko mĩrongo ĩtatũ na kenda.
Nĩ ndahũrirwo na thanju maita matatũ, na riita rĩmwe ngĩhũrwo na mahiga nyuguto, na maita matatũ ndanathũkĩrwo nĩ marikabu ndĩ thĩinĩ, na ngĩraara o na ngĩtinda iria-inĩ ũtukũ ũmwe na mũthenya mũgima.
Ngoretwo ngĩthiĩ ngʼendo nyingĩ. Ngagĩkorwo ndĩ ũgwati-inĩ wa gũtwarwo nĩ njũĩ, na ũgwati-inĩ wa atunyani, na ũgwati-inĩ wa gũũkĩrĩrwo nĩ andũ a rũrĩrĩ rwitũ, na ũgwati-inĩ wa gũũkĩrĩrwo nĩ andũ-a-Ndũrĩrĩ; na ngona ũgwati ndĩ matũũra-inĩ manene, na ndĩ thĩinĩ wa bũrũri, na ndĩ iria-inĩ; o na ũgwati wa andũ arĩa mahenanagia atĩ nĩ ariũ na aarĩ a Ithe witũ.
Ndaanaruta wĩra mũritũ na wa mĩnoga, na maita maingĩ ngaagaga toro; ndaanakorwo na ngʼaragu na nyota, na maita maingĩ ngaaga kĩndũ gĩa kũrĩa; ndaanakorwo heho-inĩ na ndĩ njaga.
Hamwe na macio mothe-rĩ, o mũthenya ngoragwo na mũrigo, ngĩĩtanga nĩ ũndũ wa maũngano mothe.
Nũ ũngĩkorwo aagĩte hinya, na niĩ njage gũkorwo njũrĩtwo nĩ hinya? Nũ ũngĩhĩngithio, na niĩ njage gũkorwo ngĩcinwo nĩ marakara?
Angĩkorwo no nginya ndĩĩrahe, ngwĩrahĩra maũndũ marĩa monanagia ũrĩa itarĩ na hinya
Yahweh, na nowe Ithe wa Mwathi Yahshua, ũrĩa ũgoocagwo nginya tene-rĩ, nĩ oĩ atĩ ndirahenania.
Kũu Dameski, barũthi ũrĩa waathanaga arĩ rungu rwa Mũthamaki Areta-rĩ, nĩ athanire itũũra inene rĩa andũ a Dameski rĩrangĩrwo nĩgetha aanyitithie.
No nĩ ndoimĩirio ndirica, ngĩikũrũkĩrio rũthingo-inĩ ndĩ thĩinĩ wa gĩkabũ, ngĩhonoka kũnyitwo nĩwe.