Akorinitho wa Keerĩ 13

Rĩrĩ nĩrĩo riita rĩa gatatũ ndĩroka kũrĩ inyuĩ. “No mũhaka ũndũ o wothe ũmenyekage wega kũgerera ũira wa andũ erĩ kana atatũ.”

O na gũtuĩka rĩu ndirĩ hamwe na inyuĩ, no ta ndĩ hamwe na inyuĩ riita rĩa kerĩ, na nĩ ngũheana mũkaana o mbere kũrĩ arĩa meehĩtie mbere ĩyo, na arĩa angĩ othe, atĩ ingĩgoka rĩngĩ ndikamacaĩra,

tondũ nĩ mũrenda kuona ũira atĩ Messiya, ũrĩa ũtakoragwo aagĩte hinya harĩ inyuĩ no arĩ na hinya gatagatĩ-inĩ kanyu, nĩwe kũna ũraaria kũgerera harĩ niĩ

Tondũ nĩ ooragĩirũo mũtĩ-inĩ nĩ ũndũ wa kwaga hinya, no rĩu arĩ muoyo nĩ ũndũ wa hinya wa Yahweh. Nĩ ma, o na ithuĩ nĩ twagĩte hinya hamwe nake, no nĩ tũgaatũũra muoyo hamwe nake nĩ ũndũ wa hinya wa Yahweh harĩ inyuĩ.

Ikaragai mũkĩĩgeragia kana mũrĩ thĩinĩ wa wĩtĩkio; ikaragai mũgĩĩthuthuragia ũrĩa mũtariĩ kũna. Kana hihi mũtiũĩ atĩ Yahshua Messiya arĩ na ũiguano hamwe na inyuĩ? O tiga akorirũo nĩ mũregetwo.

Ndĩrerĩgĩrĩra na ma nĩ mũkũmenya atĩ ithuĩ tũtiregetwo.

Rĩu-rĩ, tũrahoya Yahweh atĩ mũtikaneke ũndũ o na ũmwe mũũru, ti nĩguo tuoneke atĩ nĩ twĩtĩkĩrĩkĩte, ĩndĩ nĩgetha mwĩkage ũrĩa kwagĩrĩire, o na angĩkorũo ithuĩ tũkuoneka ta tũregetwo

Tondũ tũtingĩka ũndũ o na ũrĩkũ ũreganĩte na ũhoro ũrĩa wa ma, o tiga wa ũhoro ũrĩa wa ma

Hatarĩ nganja nĩ tũkenaga hĩndĩ ĩrĩa yothe tũtarĩ na hinya no inyuĩ mũgakorũo na hinya. Na ũyũ nĩguo ũndũ ũrĩa tũrahoya igũrũ rĩaguo, atĩ mũrũngwo.

Nĩkĩo ndĩramwandĩkĩra maũndũ maya hĩndĩ ĩno itarĩ hamwe na inyuĩ, nĩgetha rĩrĩa ngaakorũo hamwe na inyuĩ, ndikanahũthĩre wathani ũrĩa ndaheirũo nĩ Yahweh itarĩ na tha, tondũ ndaheirũo wathani wa kũmwaka no ti wa kũmũmomora.

Ariũ a Ithe witũ, ngĩrĩkĩrĩria-rĩ, thiĩi na mbere gũkenaga, kũrũngagwo, kũũmagĩrĩrio, kũgĩaga na mwĩcirĩrie ũmwe, na gũikaranagia na thayũ; nake Yahweh mwene wendo na thayũ nĩ arĩkoragwo hamwe na inyuĩ

Geithaniai inyuĩ ene na ngeithi nyamũre cia kũmumunyana

Arĩa othe aamũre nĩ maamũgeithia.

Inyuothe mũrogĩa na ũtugi mũnene wa Mwathi Yahshua Messiya na wendo wa Yahweh o hamwe na kũgwatanĩra roho Mwamũre.