Amosi 1

Ici nĩcio ciugo cia Amosi, ũrĩa warĩ ũmwe wa arĩithi a ngʼondu kuuma Tekoa, ciugo iria aamũkĩrire kĩoneki-inĩ ciĩgiĩ Isiraeli matukũ-inĩ ma Mũthamaki Uziya wa Yahuda na matukũ-inĩ ma Jeroboamu mũrũ wa Joashu, mũthamaki wa Isiraeli, mĩaka ĩĩrĩ mbere ya gĩthingithia

Ooigire atĩrĩ: “Yahweh nĩ akaararama arĩ Zayuni, Na nĩ akaanĩrĩra na mũgambo mũnene arĩ Yahrushalayim. Ũrĩithio wa arĩithi nĩ ũgaacakaya, Na gacũmbĩrĩ ga Karimeli nĩ gakooma.”

“Yahweh oigĩte atĩrĩ, ‘“Nĩ ũndũ wa ciĩko ithatũ cia ũremi cia Dameski, na nĩ ũndũ wa inya, ndikaagarũra itua, Tondũ nĩ maarangĩrĩirie Gileadi na igera cia kũhũũra ngano.

Nĩ ũndũ ũcio, nĩ ngaatũma mwaki harĩ nyũmba ya Hazaeli, Naguo nĩ ũgaacina nyũmba iria ndaya na igũrũ irĩ na ũgitĩri cia Beni-hadadi.

Nĩ ngoinanga mĩgamba ya Dameski; Nĩ ngaananga aikari a Bikathi-aveni Na ũrĩa wathanaga Bethi-edeni; Nao andũ a Siria nĩ magaatwarũo ithamĩrio Kiri,” ũguo nĩguo Yahweh ekuuga.’

Yahweh oigĩte atĩrĩ, ‘“Nĩ ũndũ wa ciĩko ithatũ cia ũremi cia Gaza, na nĩ ũndũ wa inya, ndikaagarũra itua, Tondũ nĩ mooire gĩkundi kĩgima kĩa andũ matahĩtwo makĩmaneana Edomu.

Nĩ ũndũ ũcio, nĩ ngaatũma mwaki harĩ rũthingo rwa Gaza, Naguo nĩ ũgaacina nyũmba ciakuo iria ndaya na igũrũ irĩ na ũgitĩri.

Nĩ ngaananga aikari a Ashidodi, Na ũrĩa wathanaga Ashikeloni; Nĩ ngoya guoko gwakwa na igũrũ njũkĩrĩre Ekironi, Nao Afilisti arĩa magaatigara nĩ magaathira,” ũguo nĩguo Mũthamaki Yahweh ekuuga.’

Yahweh oigĩte atĩrĩ, ‘Nĩ ũndũ wa ciĩko ithatũ cia ũremi cia Turo, na nĩ ũndũ wa inya, ndikaagarũra itua, Tondũ nĩ maaneire Edomu gĩkundi kĩgima kĩa andũ matahĩtwo, Na tondũ matiaririkanire kĩrĩkanĩro kĩa ariũ a ithe ũmwe.

Nĩ ũndũ ũcio, nĩ ngaatũma mwaki harĩ rũthingo rwa Turo, Naguo nĩ ũgaacina nyũmba ciakuo iria ndaya na igũrũ irĩ na ũgitĩri.’

Yahweh oigĩte atĩrĩ, ‘Nĩ ũndũ wa ciĩko ithatũ cia ũremi cia Edomu, na nĩ ũndũ wa inya, ndikaagarũra itua, Tondũ nĩ aathingatire mũrũ wa ithe na rũhiũ rwa njora, Na tondũ nĩ aaregire kũiguanĩra tha; Aikaraga akĩmatembũrangaga ategũtigithĩria nĩ ũndũ wa marakara, Na agaikara amarakarĩire hĩndĩ ciothe.

Nĩ ũndũ ũcio, nĩ ngaatũma mwaki Temani, Naguo nĩ ũgaacina nyũmba iria ndaya na igũrũ irĩ na ũgitĩri cia Bozira.’

Yahweh oigĩte atĩrĩ, ‘“Nĩ ũndũ wa ciĩko ithatũ cia ũremi cia Aamoni, na nĩ ũndũ wa inya, ndikaagarũra itua, Tondũ nĩ maatarũrire nda cia andũ-a-nja a Gileadi arĩa maarĩ na nda nĩguo maararamie gĩcigo kĩao ene.

Nĩ ũndũ ũcio, nĩ ngaakia mwaki rũthingo-inĩ rwa Raba, Naguo nĩ ũgaacina nyũmba ciakuo iria ndaya na igũrũ irĩ na ũgitĩri, Nĩ gũgaakorũo na mbugĩrĩrio ya mbaara mũthenya wa mbaara, O na kĩhuhũkanio mũthenya wa rũhuho rũnene.

Nake mũthamaki wao nĩ agaatwarũo ithamĩrio hamwe na anene ake,” ũguo nĩguo Yahweh ekuuga.’