Athamaki wa Mbere 9

Na rĩrĩ, rĩrĩa Suleimani aarĩkirie gwaka nyũmba ya Yahweh, nyũmba ya mũthamaki, na kĩrĩa gĩothe Suleimani eerirĩirie gwaka,

Yahweh akiumĩrĩra Suleimani riita rĩa kerĩ, o ta ũrĩa aamumĩrĩire arĩ Gibeoni

Yahweh akĩmwĩra atĩrĩ: “Nĩ njiguĩte mahoya maku na ihoya rĩaku rĩa gwĩtĩkĩrĩka rĩrĩa ũhoete ũrĩ mbere yakwa. Nĩ nyamũrĩte nyũmba ĩno wakĩte na njĩra ya kũiga rĩĩtwa rĩakwa rĩtũũre kuo, namo maitho makwa na ngoro yakwa irĩkoragwo kuo hingo ciothe

Nawe-rĩ, angĩkorũo nĩ ũrĩthiaga mbere yakwa ta ũrĩa thoguo Daudi aathiaga, ũrĩ na wĩkindĩru wa ngoro na ũrũngĩrĩru, na njĩra ya gwĩka ũrĩa wothe ngwathĩte, na wathĩkagĩre mawatho makwa na matuĩro makwa,

nĩ ngũhanda gĩtĩ kĩa ũnene kĩa ũthamaki waku igũrũ rĩa Isiraeli tene na tene, o ta ũrĩa nderĩire thoguo Daudi ngiuga ũũ, ‘Gũtirĩ hĩndĩ gũkaaga mũndũ wa kuuma rũciaro-inĩ rwaku ũikarĩire gĩtĩ kĩa ũnene kĩa Isiraeli.’

No wee na ariũ aku mũngĩgarũrũka mũtige kũnũmagĩrĩra na mwage kũrũmagia maathani makwa na mawatho makwa marĩa njigĩte mbere yanyu, na mũthiĩ mũtungatĩre ihoti ingĩ na mũcinamĩrĩre,

nĩ ngeeheria Isiraeli kuuma bũrũri ũrĩa ndĩmaheete, nayo nyũmba ĩno nyamũrĩte nĩ ũndũ wa rĩĩtwa rĩakwa ndĩmĩeherie mbere ya maitho makwa, na andũ a Isiraeli magaatuĩka kĩndũ gĩa kunagwo thimo na manyararwo gatagatĩ-inĩ ka ikundi ciothe cia andũ

Na nyũmba ĩno ĩgaatuĩka hĩba cia mwanangĩko. Mũndũ wothe ũkaahĩtũkagĩra hakuhĩ nayo akaamĩroraga agegete na akahuuha mĩrũri akoiga atĩrĩ, ‘Nĩ kĩĩ gĩatũmire Yahweh eke bũrũri ũyũ na nyũmba ĩno ũũ?’

Ningĩ macoke moige ũũ, ‘Nĩ tondũ nĩ maatiganĩirie Yahweh Kĩhoti wao, ũrĩa warutire maithe mao ma tene bũrũri-inĩ wa Misiri, na makĩhĩmbĩria ihoti ingĩ na magĩcinamĩrĩra na magĩcitungatĩra. Nĩkĩo Yahweh aamareheire mwanangĩko ũyũ wothe.’”

Gũkinyĩria mũthia-inĩ wa mĩaka 20, ihinda-inĩ rĩrĩa Suleimani aakire nyũmba icio cierĩ, nyũmba ya Yahweh na nyũmba ya mũthamaki,

Hiramu mũthamaki wa Turo nĩ aaheete Suleimani mbaũ cia mũtarakwa na mbaũ cia mũthengera hamwe na thahabu nyingĩ mũno o ta ũrĩa eerirĩirie, nake Mũthamaki Suleimani akĩhe Hiramu matũũra 20 gĩcigo-inĩ kĩa Galili

Nĩ ũndũ ũcio Hiramu akiuma Turo nĩgetha akone matũũra marĩa Suleimani aamũhete, no ndaakenirio nĩmo

Akĩũria ũũ: “Nĩ matũũra ma mũthemba ũrĩkũ maya wahe, mũrũ wa ithe witũ?” Nĩ ũndũ ũcio matũũra macio magĩtwo Bũrũri wa Kabuli nginyagia ũmũthĩ

Ihinda-inĩ o rĩu, Hiramu agĩtũmĩra mũthamaki taranda 120 cia thahabu.

Ũyũ nĩguo ũhoro wĩgiĩ andũ arĩa Mũthamaki Suleimani aathire marute wĩra mũritũ ũkonainie na gwaka nyũmba ya Yahweh, nyũmba yake mwene, Milo, rũthingo rwa Yahrushalayim, Hazoru, Megido, na Gezeri

(Firauni mũthamaki wa Misiri nĩ aambatĩte na agatunyana itũũra rĩa Gezeri na akarĩcina na mwaki, na ningĩ nĩ ooragĩte Akanaani arĩa maaikaraga itũũra-inĩ rĩu. Nĩ ũndũ ũcio akĩrĩheana kũrĩ mwarĩ, mũtumia wa Suleimani, rĩrĩ kĩheo gĩa gũtigana.)

Suleimani agĩaka Gezeri, Bethi-horoni ya Kĩanda,

Baalathu, na Tamaru werũ-inĩ, o kũu bũrũri-inĩ,

o hamwe na matũũra mothe marĩa Suleimani aaigaga indo, matũũra ma ngaari cia mbarathi, matũũra ma atwarithia a mbarathi, na kĩrĩa gĩothe Suleimani eerirĩirie gwaka Yahrushalayim, Lebanoni, na bũrũri-inĩ wothe kũrĩa aathanaga

Nao andũ othe arĩa maatigarire kuuma harĩ Aamori, Ahiti, Aperizi, Ahivi, na Ajebusi, arĩa mataarĩ a ciana cia Isiraeli,

njiarũa ciao iria ciatigarire bũrũri-inĩ—iria andũ a Isiraeli mataahotire kũniina—ciaathirũo nĩ Suleimani irutage wĩra mũritũ irĩ ngombo nginyagia ũmũthĩ

Ĩndĩ Suleimani ndaigana gũtua Mũisiraeli o na ũmwe ngombo, nĩ gũkorũo nĩo maarĩ njamba ciake cia ita, ndungata ciake, anene ake, atongoria ake a mbũtũ, na anene a atwarithia ake a ngaari cia mbarathi na atwarithia a mbarathi

Kwarĩ na anene 550 a atongoria arĩa maarũgamagĩrĩra wĩra wa Suleimani, anyabara a kũrũgamĩrĩra andũ arĩa maarutaga wĩra.

Nake mwarĩ wa Firauni akĩambata kuuma Itũũra-inĩ rĩa Daudi agĩthiĩ nyũmba-inĩ yake mwene ĩrĩa Suleimani aamwakĩire; Suleimani agĩcoka agĩaka Milo.

Suleimani aarutaga magongona ma njino na magongona ma ũiguano maita matatũ o mwaka kĩgongona-inĩ kĩrĩa aakĩire Yahweh, ningĩ nĩ aarutagĩra ndogo ya magongona kĩgongona-inĩ kĩrĩa kĩarĩ mbere ya Yahweh, Suleimani agĩkĩrĩkia nyũmba ĩyo.

Ningĩ Mũthamaki Suleimani agĩthondeka gĩkundi kĩa meri kũu Ezioni-geberi, ĩrĩa ĩrĩ hakuhĩ na Elothu, rũteere-inĩ rwa Iria Itune bũrũri-inĩ wa Edomu

Hiramu agĩtũma ndungata ciake mwene na gĩkundi kĩu kĩa meri, o hamwe na aruti wĩra a meri arĩa maarĩ na ũmenyeru, magatungate hamwe na ndungata cia Suleimani

Magĩthiĩ Ofiri na makĩruta kuo taranda 420 cia thahabu na magĩtwarĩra Mũthamaki Suleimani.