Ayubu 1
Nĩ kwarĩ mũndũ wetagwo Ayubu bũrũri-inĩ wa Uzu. Aarĩ mũndũ mũrũngĩrĩru na mwĩkindĩru; nĩ eetigĩrĩte Kĩhoti na nĩ eethemaga maũndũ marĩa moru
Aarĩ na anake mũgwanja na airĩtu atatũ
Mahiũ make maarĩ ng’ondu 7,000, ngamĩra 3,000, ng’ombe 1,000, na ndigiri 500, hamwe na ndungata nyingĩ mũno ũũ atĩ nĩwe warĩ igweta mũno harĩ andũ othe a mwena wa Irathĩro.
Anake acio ake nĩ maaharagĩria iruga o mũndũ hĩndĩ yake gwake mũciĩ mũthenya ũrĩa maatuĩte. Nĩ maanyitaga ũgeni aarĩ a nyina acio atatũ nĩguo marĩanĩre na manyuanĩre nao
Thutha wa thikũ cia maruga gũthira, Ayubu nĩ aamatũmanagĩra nĩguo amamũrĩre Yahweh. Ookĩraga rũcinĩ tene akaruta igongona rĩa njino nĩ ũndũ wa o ũmwe wao. Tondũ ooigaga atĩrĩ: “No gũkorũo anake akwa nĩ mehĩtie na makaruma Kĩhoti na ngoro.” Ũguo nĩguo Ayubu eekaga hĩndĩ ciothe.
Na rĩrĩ, mũthenya ũgĩkinya rĩrĩa ariũ a Kĩhoti ũrĩa wa ma maatonyire nĩguo marũgame mbere ya Yahweh, na Shaitani o nake agĩtonya hamwe nao.
Yahweh akĩũria Shaitani atĩrĩ: “Uuma kũ?” Nake Shaitani agĩcokeria Yahweh akiuga: “Nyuma kũriũnga thĩ na gũthiũrũrũkanga kuo.”
Yahweh akĩũria Shaitani atĩrĩ: “Hihi nĩ wonete Ayubu ndungata yakwa? Gũtirĩ ũngĩ take thĩinĩ wa thĩ. Nĩ mũrũngĩrĩru na mwĩkindĩru, mũndũ wĩtigĩrĩte Kĩhoti na wĩthemaga maũndũ marĩa moru.”
Nake Shaitani agĩcokeria Yahweh akĩmwĩra: “Kaĩ Ayubu etigĩrĩte Kĩhoti o ũguo tũhũ
Githĩ ti kũmũirigĩra ũmũirigĩire ũkamũgitĩra hamwe na nyũmba yake na indo ciake ciothe? Nĩ ũrathimĩte wĩra wa moko make, namo mahiũ make makaingĩha mũno bũrũri-inĩ
No nĩguo kũgĩe na ũgarũrũku, tambũrũkia guoko gwaku ũhutie kĩrĩa gĩothe arĩ nakĩo, nake hatarĩ nganja nĩ egũkũruma o ũthiũ-inĩ waku.”
Nake Yahweh akĩĩra Shaitani ũũ: “Atĩrĩrĩ, kĩrĩa gĩothe arĩ nakĩo kĩrĩ guoko-inĩ gwaku. No we mwene ndũkamũhutie!” Shaitani agĩkĩehera mbere ya Yahweh.
Na rĩrĩ, mũthenya ũmwe rĩrĩa anake na airĩtu ake maarĩaga na makanyua ndibei kwa mũrũ wa nyina ũrĩa mũkũrũ-rĩ,
mũndũ ũmwe akĩrehera Ayubu ũhoro akĩmwĩra atĩrĩ: “Ng’ombe nĩ kũrĩma ikũrĩmaga nacio ndigiri ikũrĩaga o hau hakuhĩ nacio
nao Asabea maatharĩkĩra na mathiĩ nacio, na moraga ndungata na rũhiũ rwa njora. No niĩ nyiki ndahonoka, ndoka gũkũhe ũhoro.”
O ũcio akĩaragia-rĩ, ũngĩ agĩũka akiuga atĩrĩ: “Mwaki wa Kĩhoti wagwa kuuma igũrũ wacina ng’ondu na ndungata cianiinwo! No niĩ nyiki ndahonoka, ndoka gũkũhe ũhoro.”
O ũcio akĩaragia-rĩ, ũngĩ agĩũka akiuga atĩrĩ: “Akalidei mekwĩbangĩte ikundi ithatũ, mahobanĩria ngamĩra na mathiĩ nacio, na moraga ndungata na rũhiũ rwa njora. No niĩ nyiki ndahonoka, ndoka gũkũhe ũhoro.”
O ũcio akĩaragia-rĩ, ũngĩ agĩũka akiuga atĩrĩ: “Anake na airĩtu aku mekũrĩaga na makanyua ndibei kwa mũrũ wa nyina ũrĩa mũkũrũ
Rũhuho rũnene ruoka o rĩmwe kuuma werũ-inĩ rwahũũra kona inya cia nyũmba, yagwĩra anake na airĩtu acio, makua. No niĩ nyiki ndahonoka, ndoka gũkũhe ũhoro.”
Rĩrĩa Ayubu aaiguire ũguo, agĩũkĩra agĩtembũra nguo yake na akĩenja njuĩrĩ ya mũtwe wake; agĩcoka agĩturia maru na akĩinamĩrĩra
akiuga atĩrĩ: “Ndoimire nda ya maitũ itarĩ kĩndũ, Na ngaacoka itarĩ kĩndũ. Nĩ Yahweh waheanire, na nĩ Yahweh woya. Rĩĩtwa rĩa Yahweh rĩrothiĩ na mbere kũgoocwo.”
Maũndũ-inĩ macio mothe, Ayubu ndeehirie o na kana akiuga atĩ Kĩhoti nĩ ekĩte ũndũ o na ũmwe mũũru.