Ayubu 14
“Mũndũ ũciarĩtwo nĩ mũndũ mũka-rĩ, Matukũ make nĩ manini na maiyũrĩte mathĩna.
Acanũkaga ta ihũa agacoka akooma; Ahĩtũkaga na ihenya ta kĩĩruru agathira.
Atĩrĩrĩ, werekeirie riitho rĩaku harĩ we, Na ũkamũtwara ciira-inĩ nĩguo mũciire nake.
Hihi nũũ ũtarĩ mwamũrĩre Yahweh ũngĩhota gũciara mũndũ mwamũre? Gũtirĩ mũndũ ũngĩhota!
Angĩkorũo matukũ make nĩ matuĩtwo, Wee nĩwe ũrĩ na mũigana wa mĩeri yake; Nĩ ũmũigĩire mũhaka ũrĩa atangĩkĩra.
Wĩhũgũre ũtige kũmũrora nĩguo ahurũke, O nginya arĩkie mũthenya wake ta mũruti wĩra wa mũcara.
Nĩ gũkorũo nĩ kũrĩ kĩĩrĩgĩrĩro nginya harĩ mũtĩ. Ũngĩtemwo, no ũthundũke rĩngĩ, Na honge ciaguo ithiĩ na mbere gũkũra.
Mĩri yaguo ĩngĩkũrĩra na thĩ Na gĩthukĩ kĩaguo kĩũmĩre tĩri-inĩ,
No ũthundũke ũngĩgucia tũmaĩ o tũnini; Na ũgĩe honge o ta mũmera mwerũ.
No rĩrĩ, mũndũ akuaga na agakoma atarĩ na ũhoti; Mũndũ akua-rĩ, athiaga kũ?
Maĩ nĩ mathiraga iria-inĩ, Naruo rũũĩ rũkahũa na rũkaniara.
O nake mũndũ akomaga na ndacokaga gũũkĩra. Matingĩũkĩra o nginya rĩrĩa igũrũ rĩgaathira, Ningĩ matingĩũkĩrio kuuma toro ũrĩa marĩ.
Na arĩ korũo no ũũhithe thĩinĩ wa Mbĩrĩra, Ũũhithe nginya rĩrĩa marakara maku magaathira, Na ũnduĩre ihinda, ũgaacoka kũndirikana!
Mũndũ angĩkua-rĩ, hihi no atũũre muoyo rĩngĩ? Niĩ ngweterera matukũ mothe ma wĩra wakwa wa ũkombo O nginya rĩrĩa hĩndĩ yakwa ya gũkũũrũo ĩgaakinya.
Nĩ ũgeetana, na niĩ nĩ ngaagwĩtĩka. Nĩ ũkeerirĩria wĩra wa moko maku.
No ihinda-inĩ rĩrĩ, ũikaraga ũgĩtaraga makinya makwa mothe; Ũroraga o mehia makwa.
Mahĩtia makwa mahingĩrĩirio mondo-inĩ, Namo mehia makwa makahingwo na ngamu.
O ta ũrĩa kĩrĩma kĩgũaga na gĩgatuĩkanga Na o ta ũrĩa rwaro rwa ihiga rweheragio harĩa rũkoragwo,
O ta ũrĩa maĩ matũmaga mahiga mamumuthũke Na mũiyũro wamo ũgakuua tĩri, Ũguo noguo wanangĩte kĩĩrĩgĩrĩro kĩa mũndũ.
Ũikaraga ũkĩmũtooragia nginya agathira; Ũgarũraga mũhianĩre wake ũgacoka ũkamweheria.
Ariũ ake matuĩkaga andũ atĩĩku, no we ndamenyaga; Magatuĩka andũ matarĩ bata, no we ndamenyaga.
Aiguaga ruo o rĩrĩa arĩ na mwĩrĩ; Acakayaga o rĩrĩa arĩ muoyo.”