Ayubu 16
Nake Ayubu agĩcokia akiuga atĩrĩ:
“Ndanaigua maũndũ maingĩ ta macio Inyuothe mũrĩ ahoorerania a kũrehera mũndũ mĩtangĩko!
Hihi ciugo ici cia tũhũ nĩ irĩkinya mũthia? Nĩ kĩĩ gĩkũrakarĩtie nĩguo ũnjokerie na njĩra ta ĩyo?
O na niĩ no njarie ta ũguo mũraria. Korũo nĩ inyuĩ mũrĩ harĩa ndĩ, No hote kwaria ciugo iragucĩrĩria cia kũmũũkĩrĩra Na ndĩmũinainĩrie mũtwe.
No handũ ha ũguo, ingĩmwĩkĩra hinya na ciugo cia kanua gakwa, Na maũndũ ma kũmũũmĩrĩria marĩa ingĩaria mamũhoorerie.
O na ndaria, ruo rwakwa rũtirathira, Na ingĩtiga kwaria-rĩ, ruo rwakwa rũngĩkĩnyihio nĩ kĩĩ?
Ĩndĩ rĩu nĩ atũmĩte njage hinya; Nĩ anangĩte nyũmba yakwa yothe.
Ningĩ nĩ ũnyitĩte, na ũndũ ũcio nĩ ũroneka wega, Na mwĩrĩ ũyũ wakwa mũhĩnju ũkaarahũka kũruta ũira wa kũnjũkĩrĩra.
Andembũrangĩte icunjĩ nĩ ũndũ wa ũrĩa arakarĩte, na akagĩa muku na niĩ. Ahagaranagia magego nĩ ũndũ wakwa. Thũ yakwa ĩthecaga na maitho mayo.
Nĩ matumũrĩte tũnua twao manjũkĩrĩre, Na makangũtha hĩ makai makĩnyũrũragia; Macemanagia marĩ aingĩ nĩguo manjũkĩrĩre.
El nĩ andekereirie kũrĩ arĩa ananu biũ, Na akanjikia moko-inĩ ma andũ aganu.
Niĩ ndatũũrĩte itarĩ na mĩtangĩko, no akĩhehenja; Aanyitire ngingo mwena wa thutha akĩmemenda; Agĩcoka akĩndua kĩndũ gĩa gũtharĩkĩrũo nĩwe.
Andũ ake a gũikia mĩguĩ nĩ mandigicĩirie; Athecaga higo ciakwa atekũnjaĩra; Agaita maĩ ma nyongo yakwa thĩ.
Aikaraga agĩtharĩkagĩra akandiga na mĩanya ta rũthingo; Anguthũkagĩra ta njamba ya ita.
Nĩ ndumĩte nguo ya ikũnia nĩguo humbĩre mwĩrĩ wakwa, Na ngathika gĩtĩo gĩakwa tĩri-inĩ.
Ũthiũ wakwa ũtunĩhĩte nĩ ũndũ wa kũrĩra, Nacio imone ciakwa ikagĩa kĩĩruru kĩnene,
O na gũtuĩka moko makwa matiĩkĩte ũndũ o na ũmwe wa ũhinya Na mahoya makwa nĩ makembu.
Wee thĩ-rĩ, ndũkahumbĩre thakame yakwa! Na ndũkareke kĩrĩro gĩakwa kĩgĩe na handũ ha kũhurũka!
O na rĩu, mũira wakwa arĩ matu-inĩ; Ũrĩa ũngĩruta ũira wa kũndetera arĩ igũrũ.
Arata akwa nĩ manyũrũragia Rĩrĩa riitho rĩakwa rĩraita maithori harĩ Eloah.
Nĩ kũgĩe mũndũ ũgũtua ciira gatagatĩ ka mũndũ na Eloah, O ta ũrĩa angĩtuithania gatagatĩ ka mũndũ na ũrĩa ũngĩ.
Nĩ gũkorũo mĩaka ĩrĩa ĩtigarĩte nĩ mĩnini, Njoke thiĩre njĩra ĩrĩa ĩthiagĩrũo na ndĩcokagwo.