Ayubu 24

“Mbere-inĩ ya El Shaddai-rĩ mahinda ti mahithe, Andũ arĩa mamũĩ kaĩ makĩagaga kuona thikũ ciake nĩkĩ?

Andũ nĩ mathaamagia indo cia kuonania mĩhaka; Maiyaga ndũũru cia ng’ondu nĩguo mathiĩ magacirĩithie.

Maiyaga ndigiri cia ciana cia ngoriai, Na makoya ndegwa ya mũtumia wa ndigwa ĩrũgamĩrĩre thiirĩ.

Meheragia andũ arĩa athĩni njĩra-inĩ; Andũ arĩa matarĩ hinya thĩinĩ wa thĩ mehithaga nĩ ũndũ wao.

Athĩni macaragia irio ta ndigiri cia gĩthaka werũ-inĩ; Macaragĩria ciana ciao irio werũ-inĩ.

Magethaga mĩgũnda-inĩ yene Na makahaara mĩgũnda-inĩ ya mĩthabibũ ya andũ arĩa aganu.

Mararaga marĩ njaga, matarĩ nguo; Matikoragwo na kĩndũ gĩa kwĩhumbĩra nĩ ũndũ wa heho.

Maihũgagio nĩ mbura ya irĩma-inĩ; Na makenyitĩrĩra mahiga-inĩ nĩ ũndũ wa kwaga kũndũ gwa kwĩyũa.

Mwana ũtarĩ ithe ahuragio kuuma nyondo-inĩ cia nyina; Nacio nguo cia athĩni ikoywo irĩ cia kũrũgamĩrĩra thiirĩ,

Mathiaga marĩ njaga, matarĩ nguo, Na marĩ ahũtu, makuuĩte itĩa cia ngano.

Marutaga wĩra wa mĩnoga marĩ thingo-inĩ cia mĩgũnda ya mĩthabibũ magĩcinagwo nĩ riũa rĩa mũthenya; Nĩo mahihaga ndibei, no maikaraga marĩ anyotu.

Andũ arĩa marakua maikaraga magĩcayaga thĩinĩ wa itũũra; Nao arĩa agurarie mũno magakaya makĩhoya ũteithio, No Eloah ndonaga ũndũ ũcio ũrĩ ũrimũ.

Nĩ kũrĩ arĩa mareganaga na ũtheri; Matimenyaga njĩra ciaguo, Na matirũmagĩrĩra njĩra ciaguo.

Mũũragani okĩraga rũcinĩ gũgĩthererũka; Akooraga andũ arĩa matarĩ hinya na arĩa athĩni, Narĩo ũtukũ akaiya.

Riitho rĩa mũtharia rĩetagĩrĩra kũgĩe mairia hwaĩ-inĩ, Akoiga ũũ, ‘Gũtirĩ mũndũ ũkũnyona!’ Na akehumbĩra ũthiũ.

Rĩrĩa kwagĩa nduma magatua nyũmba; Narĩo mũthenya magatinda mehingĩire. Matiũĩ ũhoro wa ũtheri.

Tondũ rũcinĩ rũkoragwo rũtariĩ ta nduma ndumanu harĩ o; Nĩ moĩ ũhoro wa maũndũ ma gwĩkĩra guoya ma hĩndĩ ya nduma ndumanu.

No makuuagwo o na ihenya nĩ maĩ. Igai rĩao thĩinĩ wa bũrũri nĩ rĩkaarumwo. Matigaacoka mĩgũnda-inĩ yao ya mĩthabibũ.

O ta ũrĩa riũa na ũrugarĩ ikuuaga mbarabu ĩrĩa ĩraringũka, Noguo Mbĩrĩra ĩkuuaga arĩa mehĩtie!

Nyina nĩ akaariganĩrũo nĩwe; nacio igunyũ imũrĩe. Ndagaacoka kũririkanwo rĩngĩ. Namo maũndũ matarĩ ma ũthingu makoinangwo o ta mũtĩ.

Ahinyagĩrĩria mũtumia ũrĩa thata, Na akanyarira mũtumia wa ndigwa.

Yahweh nĩ akaahũthĩra ũhoti wake kũniina andũ arĩa marĩ hinya; O na mangĩtũũgĩra, matikoragwo na ma atĩ nĩ magaatũũra muoyo.

We nĩ ametĩkagĩria makorũo na ũmĩrĩru na meigue marĩ na ũgitĩri, No maitho make nĩ maroraga maũndũ mothe marĩa mekaga.

Matũũgagĩrio o gwa kahinda kanini, thutha ũcio makagwo. Manyihagio na magakua o ta andũ arĩa angĩ; Matemagwo o ta igira cia ngano.

Angĩkorũo tiguo gũtariĩ-rĩ, nũũ ũngiuga atĩ nĩ ndaheenania Kana akararie kiugo gĩakwa?”