Ayubu 30

“Rĩu nĩ gũthekererũo thekagĩrĩrũo Nĩ andũ anyinyi kũngĩra, Arĩa itangĩetĩkĩririe maithe mao Marutithanie wĩra na ngui iria ciagitagĩra rũũru rwakwa.

Hinya wa moko mao-rĩ, warĩ na ũguni ũrĩkũ harĩ niĩ? Hinya wao rĩu nĩ mũthiru.

Mahinyĩrĩrĩkĩte nĩ ũndũ wa ũthĩni na ng’aragu; Mathũgũnaga bũrũri mũng’aru Ũrĩa wanangĩkĩte na ũgatiganĩrio.

Monganagia mahuti marĩ na cumbĩ ihinga-inĩ; Irio ciao nĩ mĩri ya mũtĩ wa mwethia.

Maingatagwo mehere harĩ andũ; Andũ mamoigagĩrĩria ta ũrĩa moigagĩrĩria mũici.

Maikaraga iharũrũka-inĩ cia mĩkuru, Marima-inĩ marĩ rungu rwa thĩ na mahiga-inĩ.

Makayaga marĩ ihinga-inĩ Na magacokanĩrĩra hamwe thabai-inĩ.

O ta ciana cia andũ matarĩ wĩcirio na matarĩ rĩĩtwa, Nĩ maingatĩtwo mehere bũrũri-inĩ.

Ĩndĩ rĩu nyũrũragio nĩo nginya nyĩmbo-inĩ ciao; Nduĩkĩte kĩndũ gĩa kũnyararũo harĩ o.

Nĩ manyararĩte na magaikara haraihu na niĩ; Matiĩtigagĩra kũnduĩra mata ũthiũ.

Tondũ Yahweh nĩ aregeretie rũrigi rwa ũta wakwa na akanjagithia hinya, Mekaga maũndũ matekwĩgirĩrĩria marĩ harĩa ndĩ.

Manjũkagĩrĩra mwena-inĩ wakwa wa ũrĩo ta kĩrĩndĩ nĩguo matharĩkĩre; Manyingatithagia Magacoka makanjigĩra mĩhĩnga ya kũrehe mwanangĩko njĩra-inĩ yakwa.

Mathũkagia njĩra ciakwa Na magatũma mathĩna makwa maingĩhe, Gũtarĩ mũndũ ũngĩmagiria.

Mokaga ta magereire mwanya-inĩ mũnene wa rũthingo; Makaingĩra kũndũ kwanangĩku.

Thiũrũrũkĩirio nĩ maũndũ ma kũmakania; Gĩtĩo gĩakwa gĩthiaga ta kĩhurutĩtwo nĩ rũhuho, Naguo ũhonokio wakwa ũkabuĩria o ta itu.

Rĩu muoyo wakwa nĩ ũroima thĩinĩ wakwa; Nĩ nyitĩtwo nĩ matukũ ma mĩnyamaro.

Ruo rũthecaga mahĩndĩ makwa ũtukũ; Ruo rũu rwa gũthegenywo rũtithiraga.

Nguo yakwa ĩgucagio na hinya mũnene; Ĩkanjita ta kara ya nguo yakwa.

Kĩhoti nĩ anjikĩtie ndoro-inĩ; Ngahaana ta tĩri na mũhu.

Ngũkayagĩra ũndeithie, no ndũnjĩtĩkaga; Ndũgamaga, ĩndĩ wee no kũndora ũndoraga.

Nĩ ũnjũkĩrĩire ũtekũnjiguĩra tha; Ũũtharĩkĩire na hinya wothe wa guoko gwaku.

Ũnjoyaga na igũrũ ũkandekereria thiĩ na rũhuho; Ũgacoka ũkanjũgia kĩhuhũkanio-inĩ.

Nĩ gũkorũo nĩ njũĩ atĩ nĩ ũgũtũma nyone gĩkuũ, Ũndware nyũmba ĩrĩa andũ othe arĩa marĩ muoyo magaacemania.

No gũtirĩ mũndũ ũngĩtharĩkĩra mũndũ uunĩkangĩte Akĩhoya ũteithio hĩndĩ ĩrĩa arĩ na thĩna.

Githĩ ndiarĩragĩra arĩa marahiũrania na mahinda maritũ? Githĩ ndianyitagwo nĩ kĩeha nĩ ũndũ wa athĩni?

O na gũtuĩka nderĩgagĩrĩra maũndũ mega, marĩa moru nĩmo mookire; Nderĩgagĩrĩra ũtheri, ĩndĩ nduma nĩyo yokire.

Kũruruma kũrĩa ndaiguaga thĩinĩ wakwa gũtiathiraga; Matukũ ma mĩnyamaro nĩ maangorire.

Thiaga ndukĩte gĩthiithi; gũtikoragwo na ũtheri wa riũa. Ndũgamaga kĩrĩndĩ-inĩ ngahoya ũteithio.

Nduĩkĩte mũrũ wa nyina na ngui cia gĩthaka Na mũrata wa nyaga.

Ngothi yakwa nĩ ĩirĩte na ĩkonũka; Namo mahĩndĩ makwa makahĩa nĩ ũndũ wa ũrugarĩ.

Kĩnanda gĩakwa kĩa mũgeeto kĩhũthagĩrũo o gũcakaya, Naguo mũtũrirũ wakwa ũkahũthĩrũo kũruta mũgambo wa kĩrĩro.