Ayubu 42

Nake Ayubu agĩcokeria Yahweh akĩmwĩra atĩrĩ:

“Rĩu nĩ menyete atĩ no ũhote gwĩka maũndũ mothe Na atĩ gũtirĩ ũndũ ũbangĩte gwĩka ũngĩkũrema.

Wee woigire atĩrĩ, ‘Nũũ ũyũ ũrekĩra ũtaaro wakwa nduma atarĩ na ũmenyo?’ Na niĩ ngĩaria, no ndaririe itarĩ na ũtaũku Igũrũ rĩgiĩ maũndũ ma magegania mũno harĩ niĩ, marĩa itamenyaga.

Nawe ũkiuga ũũ, ‘Thikĩrĩria, na niĩ njarie. Nĩ ngũkũũria ciũria, nawe ũnjokerie.’

Matũ makwa nĩ maiguĩte ũhoro waku, No rĩu nĩ nguonete na maitho makwa.

Nĩkĩo ndĩraugũkwo maũndũ marĩa njugĩte, Na nĩ nderira na ndehurĩria rũkũngũ na mũhu.”

Thutha wa Yahweh kwĩra Ayubu ciugo icio, Yahweh akĩĩra Elifazu ũrĩa Mũtemani atĩrĩ:

Nĩ ũndũ ũcio oyai ndegwa mũgwanja na ndũrũme mũgwanja mũthiĩ kũrĩ Ayubu ndungata yakwa, mũkarute igongona rĩa njino nĩ ũndũ wanyu inyuĩ ene. Nake Ayubu ndungata yakwa nĩ ekũmũhoera. Na niĩ hatarĩ nganja nĩ ngwĩtĩkĩra ihoya rĩake atĩ ndikamwĩke kũringana na ũrimũ wanyu, tondũ mũtiarĩtie ũhoro wa ma ũngoniĩ ta ũrĩa Ayubu ndungata yakwa ekĩte.”

Elifazu ũrĩa Mũtemani, Bilidadi ũrĩa Mũshuhi, na Zofaru ũrĩa Mũnaamathi magĩgĩthiĩ na magĩka ũrĩa Yahweh aameerĩte meke. Nake Yahweh agĩtĩkĩra ihoya rĩa Ayubu.

Thutha wa Ayubu kũhoera arata ake, Yahweh akĩmwehereria mathĩna na akĩmũcokeria ũtonga wake. Yahweh akĩmũhe maita merĩ ma kĩrĩa aarĩ nakĩo hau kabere

Ariũ na aarĩ a nyina othe hamwe na arata arĩa othe aarĩ nao mbere ĩyo magĩthiĩ kũrĩ we na makĩrĩanĩra nake nyũmba-inĩ yake. Makĩmũhooreria na makĩmũũmĩrĩria nĩ ũndũ wa mathĩna mothe marĩa Yahweh eetĩkĩrĩtie mamũkore. O ũmwe wao akĩmũhe Kesita na gĩcũhĩ gĩa thahabu.

Yahweh agĩkĩrathima matukũ ma mũthia ma ũtũũro wa Ayubu gũkĩra ma kĩambĩrĩria, na Ayubu akĩgĩa ng’ondu 14,000, ngamĩra 6,000, ng’ombe 2,000, na ndigiri 1,000 cia mũgoma

Ningĩ nĩ aagĩire ariũ angĩ mũgwanja o na aarĩ angĩ atatũ.

Mũirĩtu wa mbere aamwĩtire Jemima, wa kerĩ akĩmwĩta Kezia, na wa gatatũ Kereni-hapuku

Gũtirĩ andũ-a-nja angĩ maarĩ athaka ta aarĩ acio a Ayubu bũrũri-inĩ ũcio wothe, na ithe wao nĩ aamaheire igai hamwe na ariũ a nyina.

Thutha wa maũndũ macio Ayubu aatũũrire mĩaka 140, na akĩona ciana ciake na ciana cia ciana ciake, njiarũa inya

Mũthia-inĩ, Ayubu agĩkua thutha wa gũtũũra ihinda iraya na akaiganĩra.