Danieli 1

Mwaka-inĩ wa gatatũ wa wathani wa Mũthamaki Jehoiakimu wa Yahuda, Mũthamaki Nebukadineza wa Babuloni nĩ ookire Yahrushalayim na akĩmĩrigicĩria

Nake Yahweh akĩneana Mũthamaki Jehoiakimu wa Yahuda guoko-inĩ gwake, hamwe na indo imwe cia nyũmba ya Kĩhoti, nake agĩcitwara bũrũri wa Shinaru thĩinĩ wa nyũmba ya hoti yake. Akĩiga indo icio harĩa haaigagwo kĩgĩna kĩa hoti yake.

Mũthamaki akĩĩra Ashipenazi, mũtongoria wa anene a nyũmba yake amũrehere andũ a Isiraeli amwe, na thĩinĩ wao gũkorũo na amwe a rũciaro rwa ũthamaki na rwa andũ arĩa marĩ igweta

Maagĩrĩirũo gũkorũo marĩ andũ ethĩ matarĩ na kawathe, athaka, marĩ na ũũgĩ, ũmenyo, na ũtaũku, na marĩ na ũhoti wa gũtungata nyũmba-inĩ ya mũthamaki. Aabatiĩ kũmaruta mwandĩkĩre o na rũthiomi rwa Akalidei

Ningĩ mũthamaki akiuga maheagwo irio o mũthenya kuuma harĩ irio iria njega cia mũthamaki na ndibei kuuma harĩ ĩrĩa aanyuaga. Maagĩrĩire kũmenyerio ihinda rĩa mĩaka ĩtatũ, na mũthia-inĩ wa ihinda rĩu maagĩrĩirũo kũingĩra ũtungata-inĩ wa mũthamaki.

Gatagatĩ-inĩ kao kwarĩ na amwe a mũhĩrĩga wa Yahuda Danieli, Hananiya, Mishaeli, na Azariya

Nake mũtongoria wa anene a nyũmba ya mũthamaki akĩmahe marĩĩtwa; akĩhe Danieli rĩĩtwa Beliteshazaru, Hananiya akĩmwĩta Shadraka, Mishaeli akĩmwĩta Meshaki, nake Azariya akĩmwĩta Abedinego.

No Danieli agĩtua itua ngoro-inĩ yake atĩ ndegwĩthahia na irio icio njega cia mũthamaki kana ndibei ĩyo mũthamaki aanyuaga. Nĩ ũndũ ũcio akĩũria mũtongoria ũcio wa anene a nyũmba ya mũthamaki etĩkĩrio ndagethahie na njĩra ĩyo

Nake Kĩhoti agĩtũma mũtongoria ũcio wa anene a nyũmba ya mũthamaki onie Danieli ũtugi na amũiguĩre tha

No mũtongoria ũcio wa anene a nyũmba ya mũthamaki akĩĩra Danieli atĩrĩ: “Nĩ ndĩretigĩra mwathi wakwa mũthamaki, ũrĩa uugĩte irio iria mũrĩheagwo na ndibei. Ĩ angĩmuona mũhaana ũũru gũkĩra andũ arĩa angĩ ethĩ a riika rĩanyu? Mwahota gũtũma ngorũo na mahĩtia mbere ya mũthamaki.”

No Danieli akĩarĩria mũrori ũrĩa wathuurĩtwo nĩ mũtongoria ũcio wa anene a nyũmba ya mũthamaki arorage Danieli, Hananiya, Mishaeli, na Azariya akĩmwĩra:

“Ndagũthaitha ũgerie ndungata ciaku ihinda rĩa thikũ ikũmi, ũreke tũheagwo irio cia mũgũnda cia kũrĩa na maĩ ma kũnyua;

ũgaacoka ũringithanie ũrĩa tũhaana na ũrĩa andũ ethĩ arĩa angĩ mahaana, o acio marĩaga irio iria njega cia mũthamaki, na wĩke ndungata ciaku kũringana na ũrĩa ũkona.”

Nĩ ũndũ ũcio agĩtĩkĩra ihoya rĩao na akĩmageria ihinda rĩa thikũ ikũmi

Thutha wa thikũ ikũmi moonekaga magĩrĩte na marĩ na ũgima mwega wa mwĩrĩ gũkĩra andũ ethĩ arĩa angĩ othe maarĩaga irio njega cia mũthamaki

Kwoguo mũrori ũcio eeheragia irio icio njega iria maaheagwo o hamwe na ndibei akamahe irio cia mũgũnda

Nake Kĩhoti akĩhe andũ acio ana ethĩ ũmenyo na ũtaũku wa maũndũ marĩa mothe maandĩke o na ũũgĩ; na Danieli akĩheo ũtaũku wĩgiĩ cioneki cia mĩthemba yothe o na iroto.

Mũthia-inĩ wa ihinda rĩrĩa mũthamaki ooigĩte atĩ matwarũo kũrĩ we, mũtongoria wa anene a nyũmba ya mũthamaki akĩmatwara mbere ya Nebukadineza

Rĩrĩa mũthamaki aaririe nao, gũtirĩ mũndũ ũngĩ gĩkundi-inĩ kĩu gĩothe woonekire atariĩ ta Danieli, Hananiya, Mishaeli, na Azariya; nao magĩthiĩ na mbere gũtungata mbere ya mũthamaki

Ũndũ-inĩ o wothe wabataraga ũũgĩ na ũtaũku ũrĩa mũthamaki aamoragia igũrũ rĩaguo, oonaga makĩrĩte ago na aragũri othe arĩa maarĩ kũrĩa guothe aathanaga maita ikũmi

Nake Danieli agĩikara kũu nginya mwaka wa mbere wa Mũthamaki Kurusu.