Danieli 12

“Na rĩrĩ, hĩndĩ ĩyo, Mikaeli nĩ akaarũgama, o we mũnene ũrĩa ũrũgamaga nĩ ũndũ wa andũ anyu. Na nĩ gũkaagĩa ihinda rĩa mĩtangĩko rĩtarĩ rĩoneka kuuma rĩrĩa kwagĩire na rũrĩrĩ o nginya hĩndĩ ĩyo. Na ihinda-inĩ rĩu, andũ anyu nĩ makaahonoka, mũndũ o wothe ũgaakorũo andĩkĩtwo ibuku-inĩ

Na andũ aingĩ harĩ arĩa makomete rũkũngũ-inĩ rwa thĩ nĩ magookĩra, amwe mokĩre maheo muoyo wa tene na tene nao angĩ mokĩre maconorithio na matũũre mamenetwo tene na tene.

“Andũ arĩa marĩ na ũũgĩ magaakenga o ta mũtambũrũko wa igũrũ, nao arĩa marehaga andũ aingĩ harĩ ũthingu macangarare o ta njata, tene na tene.

“Wee Danieli-rĩ, hingĩra ciugo icio, na ũhinge ibuku rĩu na mũhũri o nginya ihinda rĩa mũthia. Andũ aingĩ nĩ magaathiĩ kũndũ na kũndũ, naguo ũmenyo nĩ ũkaaingĩha.”

Na niĩ Danieli ngĩrora na ngĩona angĩ erĩ marũgamĩte hau, ũmwe rũteere-inĩ rũmwe rwa karũũĩ na ũcio ũngĩ rũteere-inĩ rũu rũngĩ rwa karũũĩ

Ũmwe wao akĩũria mũndũ ũrĩa wehumbĩte nguo ya gatani, o ũcio warĩ igũrũ rĩa maĩ ma karũũĩ kau atĩrĩ: “Maũndũ macio ma magegania megũikara ihinda rĩigana atĩa magĩgaakinya mũthia?”

Ngĩcoka ngĩigua mũndũ ũcio wehumbĩte nguo ya gatani, o ũcio warĩ igũrũ rĩa maĩ ma karũũĩ kau akĩĩhĩta na Ũrĩa ũtũũraga muoyo tene na tene, ambararĩtie guoko gwake kwa ũrĩo na guoko gwake kwa ũmotho na igũrũ akiuga ũũ: “Megũikara ihinda rĩrĩa rĩtuĩtwo, mahinda marĩa matuĩtwo, na nuthu ihinda. Rĩrĩa hinya wa andũ arĩa amũre ũkaarĩka kũhehenjwo tũcunjĩ tũcunjĩ-rĩ, maũndũ macio mothe nĩ magaakinya mũthia.”

Niĩ-rĩ, nĩ ndaiguire, no ndiataũkĩirũo; nĩ ũndũ ũcio ngĩũria atĩrĩ: “Wee mwathi wakwa, marigĩrĩrio ma maũndũ macio magaakorũo marĩ marĩkũ?”

Nake akĩnjĩra atĩrĩ: “Wee Danieli wĩthiĩre, tondũ ciugo icio ciagĩrĩire gũikara irĩ hitho na ihingĩtwo o nginya ihinda rĩa mũthia

Andũ aingĩ nĩ magaatherio na meerũhio na maikare ta makumuthĩtwo magathera. Nao andũ arĩa aganu nĩ mageeka maũndũ ma waganu, na gũtirĩ mũndũ mwaganu ũgaataũkĩrũo; no andũ arĩa oogĩ nĩ magaataũkĩrũo.

“Na kuuma hĩndĩ ĩrĩa igongona rĩa hingo ciothe rĩkeeherio na kĩndũ kĩrĩa kĩrĩ thahu kĩrĩa kĩrehaga mwanangĩko kĩrũgamio, gũgaakorũo na thikũ 1,290.

“Kũrathimwo nĩ mũndũ ũrĩa ũgũikara atanyĩte na akinyĩrie mũthia wa thikũ 1,335!

“No wee-rĩ, thiĩ na mbere o nginya mũthia. Nĩ ũkaahurũka, no nĩ ũkaarũgama nĩguo wamũkĩre igai rĩaku mũthia-inĩ wa matukũ macio.”