Ezara 1

Nĩguo kiugo kĩa Yahweh kĩrĩa kĩaaririo nĩ Jeremia kĩhingio, mwaka-inĩ wa mbere wa Mũthamaki Kurusu wa Perisia, Yahweh nĩ aarahũrire roho wa Mũthamaki Kurusu wa Perisia nĩguo amenyithanie ũhoro kũndũ guothe ũthamaki-inĩ wake, ũrĩa ningĩ aandĩkire, akiuga atĩrĩ:

“Ũũ nĩguo Mũthamaki Kurusu wa Perisia ekuuga, ‘Yahweh Kĩhoti wa igũrũ nĩ aheete mothamaki mothe ma thĩ, na nĩ anjathĩte ndĩmwakĩre nyũmba thĩinĩ wa Yahrushalayim, ĩrĩa ĩrĩ Yahuda

Mũndũ wothe ũrĩ gatagatĩ-inĩ kanyu inyuĩ andũ ake othe, Kĩhoti wake arokorũo hamwe nake, nĩ ambate Yahrushalayim, ĩrĩa ĩrĩ Yahuda, nĩguo agaake rĩngĩ nyũmba ya Yahweh Kĩhoti wa Isiraeli, Kĩhoti ũrĩa wa ma o ũcio nyũmba yake yarĩ Yahrushalayim

Mũndũ o wothe ũtũũraga arĩ mũgeni, o harĩa hothe angĩkorũo arĩ, nĩ ateithio nĩ arĩa mariganĩtie nake mamũhe betha na thahabu, indo na mahiũ, o hamwe na magongona ma kwĩyendera nĩ ũndũ wa nyũmba ya Kĩhoti ũrĩa wa ma, ĩrĩa yarĩ Yahrushalayim.’”

Nao arĩa maarĩ atongoria a nyũmba cia maithe ma Yahuda na Benjamini na athĩnjĩri-Yahweh na Alawii—mũndũ wothe roho wake waarahũrirũo nĩ Kĩhoti—makĩĩhaarĩria kwambata gũthiĩ gwaka rĩngĩ nyũmba ya Yahweh, ĩrĩa yarĩ Yahrushalayim

Arĩa othe maamathiũrũrũkĩirie makĩmanyita mbaru na njĩra ya kũmahe indo cia betha na thahabu, iheo, mahiũ, na indo ingĩ cia goro, o hamwe na magongona mothe ma kwĩyendera.

Ningĩ Mũthamaki Kurusu akĩruta indo cia nyũmba ya Yahweh iria Nebukadineza aakuuĩte kuuma Yahrushalayim agaciiga nyũmba-inĩ ya hoti yake

Mũthamaki Kurusu wa Perisia agĩciruta irũgamĩrĩirũo nĩ Mithiredathu mũigi kĩgĩna, ũrĩa wacitarire na agĩcineana kũrĩ Sheshibaza mũtongoria wa Yahuda.

Na rĩrĩ, indo icio ciatarũo ciarĩ: Ikabu 30 cia thahabu, ikabu 1,000 cia betha, indo ingĩ 29,

tũbakũri 30 twa thahabu, tũbakũri 410 twa betha, na indo ingĩ 1,000

Indo ciothe cia thahabu na cia betha ciarĩ 5,400. Nake Sheshibaza agĩciambatia ciothe rĩrĩa andũ arĩa maarĩ ithamĩrio-inĩ maarutirũo Babuloni magĩcoka Yahrushalayim.