Filemona 1
Nĩ niĩ Saũlũ, njohetwo nĩ ũndũ wa Messiya Yahshua, na Timotheo mũrũ wa Ithe witũ, Tũratũma marũa maya kũrĩ Filemona mũrata witũ ũrĩa twendete na mũruti wĩra hamwe na ithuĩ,
na kũrĩ mwarĩ wa Ithe witũ Apufia, o na kũrĩ Arikipo, ũrĩa ũrũagĩrĩra Ũhoro wa Yahweh hamwe na ithuĩ, o na kũrĩ ũngano ũrĩa ũcemanagia gwaku mũciĩ.
Mũrogĩa na wega na thayũ kuuma kũrĩ Yahweh Ithe witũ, na kuuma kũrĩ Mwathi Yahshua Messiya.
Rĩrĩa ngũkũririkana mahoya-inĩ makwa-rĩ, nĩ njokagĩria Kĩhoti wakwa ngatho hĩndĩ ciothe,
tondũ nĩ njiguaga ũhoro wa wĩtĩkio waku thĩinĩ wa Mwathi Yahshua, na ũrĩa wendete andũ arĩa othe aamũre.
Nĩ hoyaga atĩ ũgĩe na kĩyo rĩrĩa ũkũgwatanĩra nao ũhoro wa wĩtĩkio waku, nĩgetha magĩe na ũmenyo wa maũndũ mothe mega marĩa tũrĩ namo thĩinĩ wa Messiya.
Wendani waku nĩ ũheete gĩkeno kĩnene mũno na ũkanyũmĩrĩria, nĩ tondũ wee, mũrũ wa Ithe witũ, nĩ ũcanjamũrĩte ngoro cia andũ arĩa aamũre.
Nĩ ũndũ wa ũguo-rĩ, o na gũtuĩka no ngwathe ndĩ thĩinĩ wa Yahshua Messiya, atĩ wĩke ũrĩa wagĩrĩire-rĩ, nĩ kaba ngũthaithe ũwĩke nĩ ũndũ wa wendo.
Nĩ ũndũ ũcio-rĩ, niĩ Saũlũ o na ndĩ mũthuri mũkũrũ, na ningĩ ndĩ muohe nĩ ũndũ wa Messiya Yahshua-rĩ,
ngũgĩgũthaitha nĩ ũndũ wa mũrũ wakwa Onesimo, ũrĩa watuĩkire mũrũ wakwa ndĩ gũkũ kĩoho-inĩ.
Mbere ĩyo ndaarĩ kĩene kũrĩwe, no rĩu nĩ atuĩkĩte mũndũ wa bata harĩwe o na harĩ niĩ.
Nake nĩ ngũmũcokia kũrĩwe, na ngĩmũtũma no ta arĩ ngoro yakwa mwene ndĩragũtũmĩra
Nĩ ingĩrendire gũikara nake, nĩgetha andeithagie handũ-inĩ haku, rĩu njohetwo nĩ ũndũ wa Ũhoro-ũrĩa-Mwega.
No ndiendire gwĩka ũndũ o na ũrĩkũ wee ũtetĩkĩrĩte, nĩgetha ũndũ o wothe mwega wee ũngĩĩka ũkorwo ũrĩ wa kwĩyendera no ti wa kũringĩrĩrio
No gũkorwo gĩtũmi gĩa akweherere kahinda kanini-rĩ, nĩgetha agũcokerera mũtũũranie nake nginya tene,
no ndagacoke arĩ o ngombo, no akorwo akĩrĩte ngombo, acoke arĩ mũrũ wa Ithe witũ mwende mũno. Nĩ wa bata mũno harĩ niĩ, no harĩwe nĩ wa bata makĩria, arĩ ta mũndũ o na ta mũrũ wa Ithe witũ thĩinĩ wa Mũhonokia.
Nĩ ũndũ ũcio angĩkorwo nĩ ũtuaga tũrĩ rũmwe nawe-rĩ, mwamũkĩre o ta ũrĩa ũngĩnyamũkĩra niĩ mwene.
Nake angĩkorwo nĩ agwĩkĩte ũũru o na ũrĩkũ, kana hihi arĩ na thirĩ waku-rĩ, andĩka atĩ thirĩ ũcio nĩ wakwa.
Nĩ niĩ Saũlũ ndĩrakwandĩkĩra na guoko gwakwa mwene. Nĩ ngakũrĩha thirĩ ũcio, o na gũtuĩka ndikwenda kũgweta atĩ o na wee mwene ũrĩ thirĩ wakwa.
Rĩu-rĩ mũrũ wa Ithe witũ, niĩ ingĩenda ngĩe na uumithio uumĩte kũrĩwe thĩinĩ wa Yahweh; canjamũra ngoro yakwa thĩinĩ wa Messiya.
Ndakwandĩkĩra marũa maya ndĩhokete atĩ ndũngĩaga kũnjathĩkĩra, na ngĩmenyaga atĩ nĩ ũgwĩka o na makĩria ya ũrĩa ngũũrĩtie wĩke.
Hamwe na ũguo-rĩ, thondekera handũ ha gũikara, tondũ ndĩ na mwĩhoko atĩ nĩ ndĩĩtĩkĩrio njũke kũrĩ inyuĩ nĩ ũndũ wa mahoya marĩa mũhoyagĩra.
Epafara, ũrĩa tuohetwo nake nĩ ũndũ wa Messiya Yahshua, nĩ akũgeithia.
O na Mariko, na Arisitariko, na Dema, na Luka, arĩa tũrutithanagia wĩra nao, nĩ makũgeithia.
Wega wa Mwathi witũ Yahshua Messiya ũrogĩa na roho waku.