Hadassah 2

Na rĩrĩ, thutha wa maũndũ macio, rĩrĩa marakara ma Mũthamaki Ahasuerusu maathirire, akĩririkana ũndũ ũrĩa Vashiti eekĩte na ũrĩa aatuĩrĩirũo

Nacio ndungata cia mũthamaki ikiuga atĩrĩ: “Nĩ gũcario airĩtu gathirange na athaka, nĩ ũndũ wa mũthamaki

Mũthamaki nĩ athuure anene icigo-inĩ ciothe cia ũthamaki wake nĩguo marehe airĩtu arĩa othe gathirange na athaka gũkũ Shushani nyũmba-inĩ ya mũthamaki, mamarehe nyũmba-inĩ ya andũ-a-nja. Na maroragwo nĩ Hegai ndungata ya mũthamaki o we mũrũgamĩrĩri wa andũ-a-nja, na mathondekwo mathakare

Na mũirĩtu ũrĩa ũgũkenia mũthamaki mũno nĩwe ũgũtuĩka mũtumia wa mũthamaki ithenya rĩa Vashiti.” Ũndũ ũcio nĩ wakenirie mũthamaki, na ũguo nĩguo eekire.

Na rĩrĩ, kũu Shushani nyũmba-inĩ ya mũthamaki, nĩ kwarĩ Mũyahudi ũmwe wetagwo Moridekai mũrũ wa Jairu mũrũ wa Shimei mũrũ wa Kishu, Mũbenjamini,

ũrĩa watwarĩtwo ithamĩrio kuuma Yahrushalayim marĩ na andũ arĩa maatahĩtwo hamwe na Mũthamaki Jekonia wa Yahuda, ũrĩa Mũthamaki Nebukadineza wa Babuloni aatwarĩte ithamĩrio

Nĩwe warĩ mũreri wa Hadassah, o we wetagwo Esiteri, mwarĩ wa mũrũ wa nyina na ithe, tondũ ndaarĩ na ithe kana nyina. Mũirĩtu ũcio aarĩ mũthaka mũno na ningĩ aarĩ kĩĩrorerũa, na thutha wa gĩkuũ gĩa ithe na nyina, Moridekai akĩmuoya ta mwarĩ wake

Rĩrĩa uuge wa mũthamaki o hamwe na watho wake wamenyithanirio na rĩrĩa airĩtu aingĩ maatwarirũo Shushani nyũmba-inĩ ya mũthamaki maroragwo nĩ Hegai, Hadassah o nake nĩ aatwarirũo nyũmba-inĩ ya mũthamaki aroragwo nĩ Hegai mũrũgamĩrĩri wa andũ-a-nja.

Mũirĩtu ũcio nĩ aamũkenirie na agĩĩtĩkĩrĩka harĩ we, na nĩ ũndũ ũcio akĩbanga o na ihenya ũrĩa egũthondekwo nĩguo athakare, na irio iria arĩrĩaga, na akĩmũhe airĩtu mũgwanja a nyũmba ya mũthamaki. Ningĩ akĩmũthaamia hamwe na airĩtu acio maamũtungatagĩra akĩmatwara kũndũ kũrĩa kwega mũno nyũmba-inĩ ya andũ-a-nja.

Hadassah ndagwetire ũndũ o na ũmwe wĩgiĩ andũ ao kana andũ a mbarĩ ciao, tondũ Moridekai nĩ aamwĩrĩte ndakere mũndũ.

O mũthenya Moridekai aahĩtũkagĩra mbere ya nja ya nyũmba ya andũ-a-nja nĩguo amenye ũrĩa Hadassah ahaana na ũrĩa aathiaga na mbere.

O mũirĩtu aarĩ na ihinda rĩake rĩa gũthiĩ harĩ Mũthamaki Ahasuerusu thutha wa kũrĩkia ihinda rĩa mĩeri ikũmi na ĩĩrĩ ĩrĩa airĩtu acio maagĩrĩirũo kũniina, tondũ ũũ nĩguo maabatiĩ kũhingia ihinda rĩao rĩa gũthakario—mĩeri ĩtandatũ makĩhũthĩra maguta ma manemane na mĩeri ĩtandatũ makĩhũthĩra maguta ma balisamu na maguta ma mĩthemba mĩingĩ ma ũthaka

Thutha ũcio mũirĩtu nĩ aakoragwo ehaarĩirie gũthiĩ harĩ mũthamaki, na kĩrĩa gĩothe eetagia nĩ aaheagwo akiuma nyũmba ya andũ-a-nja agĩthiĩ nyũmba ya mũthamaki

Aatonyaga hwaĩ-inĩ, na rũcinĩ agacoka nyũmba ya kerĩ ya andũ-a-nja, aroragwo nĩ Shaashagazu ndungata ya mũthamaki, ĩrĩa yaroraga thuriya cia mũthamaki. Ndangĩathiire rĩngĩ harĩ mũthamaki tiga tu mũthamaki akenirio nĩwe na amwĩte na rĩĩtwa.

Na rĩrĩa riita rĩa Hadassah mwarĩ wa Abihaili mũrũ wa nyina na ithe wa Moridekai ũrĩa wamuoete ta mwarĩ wake, rĩakinyire rĩa gũthiĩ harĩ mũthamaki, Hadassah ndarĩ kĩndũ eetirie o tiga indo iria Hegai ndungata ya mũthamaki o we mũrũgamĩrĩri wa andũ-a-nja, aamũgweteire. (Hĩndĩ ĩyo yothe Hadassah nĩ eetĩkĩrĩkaga harĩ mũndũ wothe ũrĩa wamuonaga.)

Hadassah aatwarirũo kũrĩ Mũthamaki Ahasuerusu nyũmba-inĩ yake mweri wa ikũmi, na noguo mweri wa Tebethu, mwaka-inĩ wa mũgwanja wa wathani wake

Na mũthamaki akĩenda Hadassah gũkĩra atumia acio angĩ othe, na Hadassah akĩendeka nĩwe na agĩĩtĩkĩrĩka harĩ we gũkĩra airĩtu acio angĩ gathirange. Nĩ ũndũ ũcio akĩmwĩkĩra gĩtambaya kĩa ũnene mũtwe na akĩmũtua mũtumia wa mũthamaki ithenya rĩa Vashiti

Na mũthamaki akĩgĩa na iruga inene nĩ ũndũ wa anene othe arĩa maarĩ rungu rwake o hamwe na ndungata ciake, iruga rĩa Hadassah. Agĩcoka akĩrekera andũ icigo-inĩ ciake, na agĩikara akĩheanaga iheo kũringana na ũhoti wa mũthamaki.

Na rĩrĩa airĩtu acio gathirange maarehirũo hamwe riita rĩa kerĩ, Moridekai aaikarĩte kĩhingo-inĩ kĩa mũthamaki

Hadassah ndarĩ ũndũ ooigire wĩgiĩ nyũmba yao na andũ ao, o ta ũrĩa Moridekai aamwĩrĩte; Hadassah aathiire o na mbere gwĩka ũrĩa Moridekai aamwĩraga, o ta ũrĩa eekaga rĩrĩa aarĩ rungu rwake.

Matukũ-inĩ macio rĩrĩa Moridekai aaikaraga kĩhingo-inĩ kĩa mũthamaki, anene erĩ a kwa mũthamaki arĩa maarĩ aikaria a mĩrango, nĩo Bigithani na Tereshu, makĩrakara na makĩbanga kũũraga Mũthamaki Ahasuerusu

No Moridekai akĩmenya ũhoro ũcio, na o rĩo akĩĩra Hadassah mũtumia wa mũthamaki. Nake Hadassah akĩaria na mũthamaki na rĩĩtwa rĩa Moridekai

Kwoguo ũhoro ũcio ũgĩtuĩrio na ũkĩmenyeka nĩ wa ma, na arũme acio erĩ magĩcuurio mũtĩ-inĩ; na ũhoro ũcio wothe ũkĩandĩkwo mbere ya mũthamaki ibuku-inĩ rĩa maũndũ ma matukũ macio.