Hosea 14

“Cokerera Yahweh Kĩhoti waku, wee Isiraeli, Nĩ gũkorũo nĩ ũhĩngĩkĩte nĩ ũndũ wa mahĩtia maku.

Cokerera Yahweh na ciugo ici, Ũmwĩre atĩrĩ, ‘Tuohere mahĩtia maitũ na wĩtĩkĩre ũndũ ũrĩa mwega, Na ithuĩ nĩ tũgũkũrutĩra igongona rĩa gũkũgooca rĩa mĩromo itũ o ta ũrĩa tũngĩkũrutĩra tũtegwa.

Ashuri ndĩgaatũhonokia. Tũtigũtwarithia mbarathi, Na tũtigũcoka kwĩra wĩra wa moko maitũ atĩrĩ, “Wee ũrĩ Kĩhoti witũ!” Tondũ wee nĩwe wonanagia tha kũrĩ mwana wa ngoriai.’

Nĩ ngaamahonia matigane na ũregenyũki wao. Nĩ ngaamenda ndĩyendeire, Tondũ marakara makwa nĩ mamwehereire.

Ngaatuĩka ta ime harĩ Isiraeli; Agaacanũka o ta ihũa rĩa itoka Na atware mĩri yake na thĩ o ta mĩtĩ ya Lebanoni.

Honge ciake nĩ igaatherema, Riri wake ũgaakorũo ũtariĩ ta wa mũtĩ wa mũtamaiyũ, Na mũtararĩko wake ũkorũo ũtariĩ ta wa Lebanoni.

Nĩ magaatũũra rĩngĩ kĩĩruru-inĩ gĩake. Nĩ makaahanda ngano na marute kĩro o ta mũthabibũ. Ngumo yake ĩgaakorũo ĩtariĩ ta ndibei ya Lebanoni.

Efiraimu nĩ akooria atĩrĩ, ‘Ndĩ na ũhoro ũrĩkũ ũngĩ na mĩhianano?’ Nĩ ndamũigua na ndamũbaara ũrĩa atariĩ. Ngaakorũo ndariĩ ta mũtĩ mũruru wa mũthengera. Maciaro maku makoimaga harĩ niĩ.”

Hihi nũũ ũrĩ na ũũgĩ? Nĩ agĩtaũkĩrũo nĩ maũndũ macio. Nĩ ũrĩkũ mũbarĩrĩri? Nĩ akĩmamenye. Nĩ gũkorũo njĩra cia Yahweh nĩ nũngĩrĩru, Na andũ arĩa athingu nĩ marĩgeraga thĩinĩ wacio; No andũ arĩa agarari Watho nĩ marĩhĩngagwo njĩra-inĩ icio makagũa.