Hosea 4

Thikĩrĩriai kiugo kĩa Yahweh, inyuĩ andũ a Isiraeli, Nĩ gũkorũo Yahweh arĩ na cira na aikari a bũrũri, Tondũ gũtirĩ na ũhoro wa ma kana tha kana ũmenyo wĩgiĩ Kĩhoti thĩinĩ wa bũrũri.

Mĩĩhĩtwa ya maheeni, kwaria maheeni na ũũragani Na ũici na ũtharia nĩ itheremete mũno, Na gĩĩko kĩmwe kĩa ũiti wa thakame kĩrũmagĩrĩrũo nĩ gĩĩko kĩngĩ kĩa ũiti wa thakame.

Nĩkĩo bũrũri ũgaacakaya Na aikari othe arĩa marĩ thĩinĩ waguo nĩ makoorũo nĩ hinya; Nyamũ cia gĩthaka na nyoni cia rĩera-inĩ, O na thamaki cia iria-inĩ, nĩ igaathira.

“No rĩrĩ, mũndũ o wothe ndakamaciirithie kana amarũnge, Tondũ andũ anyu matariĩ ta andũ arĩa maciirithagia mũthĩnjĩri-Yahweh.

Nĩ ũndũ ũcio, nĩ ũkaahĩngwo mũthenya barigici, Na ũkĩhĩngwo, mũnabii o nake nĩ akaahĩngwo, ta arĩ ũtukũ. Na nĩ ngaakiria maitũguo.

Andũ akwa nĩ magaakirio, nĩ gũkorũo gũtirĩ na ũmenyo. Tondũ nĩ ũregete ũmenyo, Na niĩ nĩ ngaakũrega ũtige gũtungata ũrĩ mũthĩnjĩri-Yahweh wakwa; Ningĩ tondũ nĩ ũriganĩirũo nĩ Watho wa Kĩhoti waku, Niĩ mwene nĩ ngaariganĩrũo nĩ ariũ aku.

O ũrĩa moongererekaga, noguo maanjĩhagĩria makĩria. Nĩ ngaagarũra riri wao ũtuĩke gĩconoko.

Marĩaga kuumana na mehia ma andũ akwa, Na magakorokera mahĩtia mao.

Ũrĩa gũgaathiĩ harĩ andũ acio noguo gũgaathiĩ harĩ mũthĩnjĩri-Yahweh; Nĩ ngaamaciirithia nĩ ũndũ wa njĩra ciao, Na nĩ ngaamarehithĩria moimĩrĩro ma ciĩko ciao.

Nĩ makaarĩa no matikaahũna. Nĩ makaahũũra ũmaraya, no matikaingĩha, Tondũ nĩ matigĩte gwĩciria ũhoro wa Yahweh.

Ũmaraya na ndibei, na ndibei ya mũhihano Nĩ cieheragia wendi wa gwĩka maũndũ marĩa magĩrĩire.

Andũ akwa macaragia ũhoro kuuma kũrĩ mĩhianano yao ya mbaũ, Mageka ũrĩa rũthanju rwao rũkũmeera meke; Tondũ roho wa ũmaraya nĩ ũtũmaga mahĩtie njĩra, Na kũgerera ũmaraya wao makarega gwathĩkĩra Kĩhoti wao.

Marutagĩra magongona irĩma igũrũ, Na magatogia magongona tũrĩma igũrũ, Rungu rwa mĩtĩ ya mĩgandi na mĩribina na mũtĩ o wothe mũnene, Tondũ kĩĩruru kĩayo nĩ kĩega. Nĩkĩo aarĩ anyu mahũũraga ũmaraya Na aka a ariũ anyu mageka ũtharia.

Ndigaaciirithia aarĩ anyu nĩ ũndũ wa ũmaraya wao, O na aka a ariũ anyu nĩ ũndũ wa ũtharia wao. Tondũ nao arũme mathiaga na maraya Na makaruta magongona hamwe na maraya ma hekarũ; Andũ ta acio matarĩ na ũtaũku nĩ makaaniinwo.

O na gũtuĩka nĩ ũrahũũra ũmaraya, wee Isiraeli, Yahuda aroaga kwĩhia. Mũtigathiĩ Giligali kana mũthiĩ Bethi-aveni, Na mũtikehĩte muuge atĩrĩ, ‘O ta ũrĩa Yahweh atũũraga muoyo!’

Tondũ Isiraeli nĩ atuĩkĩte mũremi, o ta ngʼombe nemi. Hihi Yahweh rĩu nĩ ekũmarĩithia o ta gatũrũme kũndũ kũrĩ na wariĩ?

Efiraimu nĩ anyitanĩte na mĩhianano. Tigana nake!

Rĩrĩa njohi yao yathira, Mahũũraga ũmaraya. Na athani ake nĩ mendete gĩconoko mũno.

Rũhuho nĩ rũkaamũkũnja na mathagu maruo, Na nĩ magaaconoka nĩ ũndũ wa magongona mao.”