Isaiya 22

Ĩno nĩ ndũmĩrĩri nditũ ĩkoniĩ Mũkuru wa Hizzayoni: Nĩ kĩĩ kĩũru nawe tondũ inyuothe mũthiĩte nyũmba igũrũ?

Wee waiyũirũo nĩ ngũĩ, Itũũra rĩrĩ mbugĩrĩrio, taũni yambararĩte. Andũ aku arĩa mooragirũo matioragirũo na rũhiũ rwa njora, O na matiakuĩrĩire mbaara-inĩ.

Athani aku othe arĩa ahinyanĩrĩria nĩ morĩte marĩ hamwe. Nĩ maanyitirũo mĩgwate o na gũtahũthĩrĩtwo ũta. Othe arĩa maarĩ kuo nĩ maanyitirũo mĩgwate, O na gũtuĩka nĩ moorĩte magathiĩ kũraihu.

Nĩkĩo ndoigire ũũ: “Eheriai maitho manyu harĩ niĩ, Na nĩ ngũrĩra ndĩ na ruo rũingĩ. Mũtigatinde mũkĩnyũmĩrĩria Nĩ ũndũ wa mwanangĩko wa mwarĩ wa andũ akwa.

Nĩ gũkorũo nĩ mũthenya wa gũtukanĩrũo na gũtoorio na kũmaka, Kuuma kũrĩ Mwathi, Yahweh mũnene wa ita, Mũkuru-inĩ wa Hizzayoni. Rũthingo nĩ rũkũmomorũo Na kũgĩe kĩrĩro kĩrĩma-inĩ.

Elamu nĩ yoete thiaka Hamwe na andũ mahaicĩte ngaari na mbarathi, Na Kiri ĩkaguũria ngo.

Mĩkuru yaku ĩrĩa mĩega biũ Ĩkaaiyũra ngaari cia mbaara, Nacio mbarathi irũgame harĩa ibatiĩ kũrũgama kĩhingo-inĩ,

Na gĩtama kĩa Yahuda nĩ gĩkeeherio.

na nĩ mũkoona mĩanya mĩingĩ ya Itũũra rĩa Daudi. Na nĩ mũgaacokanĩrĩria maĩ ma karia ka mwena wa mũhuro

Nĩ mũgaatara nyũmba cia Yahrushalayim, na mũmomore nyũmba nĩguo muongerere rũthingo hinya

Na nĩ mũgaathondeka karia gatagatĩ-inĩ ga thingo icio igĩrĩ ga gwĩkĩra maĩ ma karia karĩa gakũrũ, no mũtikaarora Mũũmbi Wako Ũrĩa Mũnene, na mũtikoona Ũrĩa wagathondekire tene.

Mũthenya ũcio Mwathi, Yahweh mũnene wa ita, Nĩ akoiga kũgĩe kĩrĩro na gũcakaywo, Mĩtwe yenjwo na kwĩhumbwo nguo cia makũnia.

No ithenya rĩa ũguo, kũrĩ na gĩkũngũĩro na gĩkeno, Ng’ombe igathĩnjwo o na ng’ondu igathĩnjwo, Nyama ikarĩo na ndibei ĩkanyuo. ‘Nĩ tũkĩrĩei na tũnyue, tondũ rũciũ nĩ tũgaakua!’”

Yahweh mũnene wa ita agĩcoka akĩnguũrĩria ũũ matũ-inĩ makwa: “‘Inyuĩ andũ aya mehia maya matikũhumbĩrũo nĩ ũndũ wanyu o nginya mũkue,’ ũguo nĩguo Mwathi, Yahweh mũnene wa ita ekuuga.”

Ũũ nĩguo Mwathi, Yahweh mũnene wa ita oigĩte: “Thiĩ kũrĩ mũramati ũyũ, kũrĩ Shebina, ũrĩa ũrũgamĩrĩire nyũmba, ũmũũrie,

‘Nĩ kĩĩ ũrenda gũkũ, na nũũ ũgũkoniĩ gũkũ, tondũ ũreyenjera mbĩrĩra gũkũ?’ Nĩ kwenja arenja mbĩrĩra yake handũ harĩa hatũũgĩru; nĩ gũicũhia araicũhia handũ hake ha kũhurũka ndũmba-inĩ ya ihiga

‘Atĩrĩrĩ, Yahweh nĩ agaakũharũrũkia na ũũru mũingĩ, wee mũndũ ũyũ, na akũnyite na hinya mũingĩ

Nĩ agaakuoha akũrũmĩtie na akũharũrũkie ta mũbira bũrũri-inĩ mwariĩ. Kũu nĩkuo ũgaakuĩra, na nĩkuo ngaari ciaku cia mbarathi iria irĩ riri igaakorũo, irĩ gĩconoko harĩ nyũmba ya mwathi waku

Na nĩ ngaakũrutũrũra kuuma gĩturũa-inĩ gĩaku na ngũingate wĩra-inĩ waku.

“‘Mũthenya ũcio nĩ ngeta ndungata yakwa Eliakimu mũrũ wa Hilikia,

na nĩ ngaamũhumba kanjũ yaku na ndĩmuohe mũcibi waku ndĩũrũmie, na neane wathani waku guoko-inĩ gwake. Na nĩ agaatuĩka ithe wa aikari a Yahrushalayim na a nyũmba ya Yahuda

Na nĩ ngaaigĩrĩra cabi ya nyũmba ya Daudi kĩande-inĩ gĩake. Nĩ akaahingũra na gũtirĩ mũndũ ũkaahinga; akaahinga na gũtirĩ mũndũ ũkaahingũra

Ngaamũhũũrĩra o ta mũcumarĩ handũ harũmu, na agaatuĩka ta gĩtĩ kĩa ũnene kĩrĩ riri harĩ nyũmba ya ithe

Na nĩ magaacuuria harĩ we riri wothe wa nyũmba ya ithe, njiarũa na rũciaro, indo ciothe iria nini, indo iria itariĩ ta mbakũri, o hamwe na ndigithũ ciothe iria nene.

Yahweh mũnene wa ita ekuuga atĩrĩ, “Mũthenya ũcio mũcumarĩ ũrĩa ũhũũrĩrĩirũo handũ harũmu nĩ ũkeeherio, na nĩ ũgaatinio ũgũe, naguo mũrigo ũrĩa ũracuurĩtio ho ũgũe ũthũkange, nĩ gũkorũo Yahweh we mwene nĩ oigĩte ũguo.’”