Jakubu 1

Nĩ niĩ Jakubu, ndungata ya Yahweh na ya Mwathi Yahshua Messiya, Ndĩramwandĩkĩra inyuĩ a mĩhĩrĩga ĩrĩa ikũmi na ĩĩrĩ mũhurunjĩtwo thĩ yothe: Nĩ ndamũgeithia.

Ariũ na aarĩ a Ithe witũ, rĩrĩa rĩothe mwakorwo nĩ magerio ma mĩthemba mĩingĩ-rĩ, tuagai atĩ ũguo nĩ gĩkeno gĩtheri.

tondũ nĩ mũũĩ atĩ kũgerio kwa wĩtĩkio wanyu kũrehaga gũkirĩrĩria

Rekei gũkirĩrĩria kwanyu kũrute wĩra wakuo, nĩgetha mũtuĩke andũ aagĩrĩru kũna na agima, mũtarĩ na ũndũ mwagĩte.

Na rĩrĩ, mũndũ wanyu angĩkorwo aagĩte ũũgĩ-rĩ, nĩ ahoe Yahweh, ũrĩa ũheaga andũ othe na ũtana, na atarĩ na ũũru ngoro, nake nĩ ekũheo ũũgĩ ũcio.

No rĩrĩa ekũhoya-rĩ, nĩ ahoe etĩkĩtie, na ndagathanganie, tondũ mũndũ ũrĩa ũthanganagia ahaana ta ikũmbĩ rĩa iria inene, rĩrĩa rĩhurutagwo nĩ rũhuho na rĩkarũgarũgio ũũ na ũũ

Mũndũ ũcio ndagecirie atĩ nĩ akaheo kĩndũ o nakĩ nĩ Yahweh;

ũcio nĩ mũndũ wa ngoro igĩrĩ, ũtarĩ hĩndĩ akindagĩria maũndũ-inĩ mothe marĩa ekaga.

Mũrũ kana mwarĩ wa Ithe witũ ũrĩa wĩnyihagia aagĩrĩirwo nĩ kwĩraha nĩ ũndũ nĩ atũũgĩrĩtio.

No ũrĩa mũtongu nĩ erahage nĩ ũndũ wa kũnyihio gwake, tondũ agaathira ta ihũa rĩa gĩthaka.

Nĩgũkorwo riũa rĩrathaga rĩrĩ na ũrugarĩ mũhiũ wa gũcina narĩo rĩkahohia nyeki; nakĩo kĩro kĩayo gĩgaitĩka na ũthaka wayo ũkaanangwo. Ũguo no taguo mũndũ ũrĩa mũtongu akaahwererekera maũndũ-inĩ make.

Kũrathimwo-rĩ, nĩ mũndũ ũrĩa ũũmagĩrĩria rĩrĩa ekũgerio, tondũ aatoria magerio, nĩ akaheo thũmbĩ ya muoyo ĩrĩa Yahweh erĩire arĩa mamwendete.

Hĩndĩ ĩrĩa mwagerio, mũndũ o naũ ndakanoige atĩrĩ, “Yahweh nĩ arangeria.” Nĩgũkorwo Yahweh ndangĩhota kũgerio nĩ ũũru, o nake mwene ndageragia mũndũ o na ũrĩkũ;

no rĩrĩ, mũndũ nĩ kũgerio ageragio hĩndĩ ĩrĩa ekũguucĩrĩrio na akahenererio nĩ merirĩria make moru.

Namo merirĩria marĩkia kũoha nda, maciaraga mehia; namo mehia hĩndĩ ĩrĩa maakũra biũ, magaciara gĩkuũ.

Ariũ na aarĩ a Ithe witũ inyuĩ nyenda mũno-rĩ, mũtikanahenio.

Kĩheo gĩothe kĩega na gĩkinyanĩru kiumaga igũrũ, gĩikũrũkĩte kuuma kũrĩ Ithe wa motheri ma igũrũ, ũrĩa ũtagarũrũkaga ta ciĩruru iria igarũrũkaga.

Nĩwe watũciarire nĩ kwenda gwake mwene na ũndũ wa ũhoro-ũrĩa-wa-ma, nĩguo tũtuĩke ta maciaro ma mbere ma indo ciothe iria ombire.

Ariũ na aarĩ a Ithe witũ inyuĩ nyenda mũno, menyai ũũ: O mũndũ nĩ ahiũhage gũthikĩrĩria, no ndakahiũhage kwaria o na kana kũrakara,

nĩgũkorwo marakara ma mũndũ matirehaga mũtũũrĩre wa ũthingu ũrĩa Yahweh endaga.

Nĩ ũndũ ũcio-rĩ, eheriai maũndũ mothe marĩ magigi, na ũũru ũrĩa ũkĩrĩrĩirie kũingĩha, na mwĩnyihĩtie, mwĩtĩkĩre kiugo kĩrĩa kĩhandĩtwo thĩinĩ wanyu, o kĩrĩa kĩngĩmũhonokia.

Mũtigatuĩke o a gũthikagĩrĩria kiugo tu, no tuĩkai a gwĩka ũrĩa kiugĩte, nĩguo mũtikehenie inyuĩ ene

Mũndũ o wothe ũthikagĩrĩria kiugo no ndekaga ũrĩa kiugĩte-rĩ, ahaana ta mũndũ ũrĩa wĩroraga ũthiũ na gĩcicio,

na thutha wa kwĩrora, agethiĩra na akariganĩrwo o narua nĩ ũrĩa ahaana.

No mũndũ ũrĩa ũroraga wega Watho ũrĩa mũkinyanĩru kũna ũrĩa ũheanaga wĩyathi, na agathiĩ na mbere gwĩka ũguo, atekũriganĩrwo nĩ ũrĩa aiguĩte no akawĩkaga-rĩ, ũcio nĩ arĩrathimagĩrwo maũndũ marĩa ekaga.

Mũndũ o wothe angĩĩtua ena ũrutani mũna no aremwo nĩ gwatha rũrĩmĩ rwake-rĩ, mũndũ ũcio nĩ kwĩhenia ehenagia, na ũrutani ũcio wake nĩ wa tũhũ.

Ũrutani ũrĩa Yahweh Ithe witũ etĩkagĩra atĩ nĩ mũkinyanĩru kũna na ndũrĩ na mahĩtia nĩ ũyũ: nĩ kũroraga ciana cia ngoriai na atumia a ndigwa hĩndĩ ĩrĩa marĩ mathĩna-inĩ mao, na ningĩ mũndũ ethemage ndagathũkio nĩ maũndũ ma gũkũ thĩ.