Jeremiya 10

Thikĩrĩriai kiugo kĩrĩa Yahweh amwarĩirie, inyuĩ andũ a nyũmba ya Isiraeli

Ũũ nĩguo Yahweh ekuuga: “Mũtikerute njĩra ya ndũrĩrĩ, Na mũtigetigĩre imenyithia cia kũrĩa igũrũ Tondũ ndũrĩrĩ nĩ ciĩtigagĩra nĩ ũndũ wacio.

Nĩ gũkorũo mĩtugo ya ikundi icio cia andũ nĩ ya maheeni. Nĩ mũtĩ tu wa mũtitũ ũtemetwo, Ũkarutĩrũo wĩra nĩ moko ma bundi akĩhũthĩra kĩndũ gĩake kĩa wĩra.

Maũgemagia na betha na thahabu Na makaũrũmia makĩhũthĩra nyundo na mĩcumarĩ nĩgetha ndũkagũe.

O ta kĩmakia-nyamũ mũgũnda-inĩ wa rũkiri, mĩhianano ĩyo ndĩngĩhota kwaria; No mũhaka ĩkuuo, tondũ ndĩngĩhota gũthiĩ. Mũtikamĩĩtigĩre, nĩ gũkorũo gũtirĩ ũũru ĩngĩrehe, O na gũtirĩ wega ĩngĩka.”

Yahweh, gũtirĩ ũngĩ ũhaana tawe, Wee ũrĩ mũnene, na rĩĩtwa rĩaku nĩ inene na nĩ rĩrĩ hinya.

Nũũ ũtagĩrĩirũo gũgwĩtigĩra, wee Mũthamaki wa ndũrĩrĩ? Nĩ gũkorũo nĩ wagĩrĩire gwĩtigĩrũo; Tondũ gatagatĩ-inĩ ka andũ arĩa othe ogĩ a ndũrĩrĩ na gatagatĩ-inĩ ka mothamaki mao mothe, Gũtirĩ o na ũmwe ũhaana tawe.

Othe nĩ andũ ariitu na nĩ akĩgu. Ũrutani uumĩte harĩ mũtĩ nĩ maheeni matheri.

Betha ĩrĩa hũũre ĩrehagwo kuuma Tarishishi na thahabu ĩkarehwo kuuma Ufazu, Wĩra wa bundi, wĩra wa moko ma mũturi wa cuma. Nguo ciayo nĩ cia ndigi cia rangi wa mburuu na cia rangi wa papũ. Mĩhianano ĩyo yothe ĩthondekagwo nĩ aruti wĩra marĩ na ũũgĩ.

No Yahweh nĩ Kĩhoti wa ma. Nĩwe Kĩhoti ũrĩa ũtũũraga muoyo na Mũthamaki wa tene na tene. Nĩ ũndũ wa marakara make thĩ nĩ ĩgaathingitha, Na gũtirĩ ndũrĩrĩ ikaahota gwĩtiiria mang’ũrĩ make.

Ũũ nĩguo mwagĩrĩirũo kũmeera: “Ihoti icio itoombire igũrũ na thĩ Nĩ igaathira ciehere thĩinĩ wa thĩ na mũhuro wa igũrũ rĩu.”

Nĩwe Mũũmbi wa thĩ kũgerera hinya wake, O we wahandire bũrũri ũrĩa ũrĩ maciaro kũgerera ũũgĩ wake Na nowe watambũrũkirie igũrũ kũgerera ũtaũku wake.

Rĩrĩa atũma mũgambo wake ũiguĩke, Maĩ marĩa marĩ igũrũ nĩ marurumaga, Na agatũma matu mambate kuuma ituri cia thĩ. Atũmaga kũgĩe rũheni hamwe na mbura, Na akarehe rũhuho kuuma thitoo-inĩ ciake.

Mũndũ wothe ekaga maũndũ atarĩ na wĩcirio na atarĩ na ũmenyo; Mũturi o wothe wa cuma nĩ agaaconorithio nĩ ũndũ wa mũhianano ũcio wa gwacũhio; Nĩ gũkorũo mũhianano wake wa cuma nĩ wa maheeni, Na mĩhianano ĩyo ndĩkoragwo na roho thĩinĩ wayo.

Mĩhianano ĩyo nĩ ya maheeni, nĩ wĩra wa kũnyararũo. Rĩrĩa mũthenya wayo wa ituĩro ũgaakinya, nĩ ĩgaathira.

Ũcio Igai rĩa Jakubu ndahaana ta indo icio, Tondũ nĩwe wombire indo ciothe, Na Isiraeli nĩwe rũthanju rwa igai rĩake. Rĩĩtwa rĩake nĩ Yahweh mũnene wa ita.

Cokanĩrĩria mũrigo waku kuuma thĩ, Wee mũndũ-wa-nja ũyũ ũikaraga ũrigicĩirio.

Nĩ gũkorũo ũũ nĩguo Yahweh ekuuga: “Nĩ ngũikia aikari a kuo moime thĩinĩ wa bũrũri ihinda-inĩ rĩrĩ, Na nĩ ngũtũma magĩe na mĩtangĩko.”

Kaĩ ndĩ na haaro nĩ ũndũ wa nguraro yakwa-ĩ! Kĩronda gĩakwa gĩtingĩhona. Na niĩ ngiuga atĩrĩ: “Hatarĩ nganja mũrimũ ũyũ nĩ wakwa, na no mũhaka ndĩũkirĩrĩrie.

Hema yakwa nĩ yanangĩtwo, na tũmĩkanda tuothe twa hema yakwa nĩ tũtuĩtwo. Ariũ akwa nĩ mandiganĩirie na matirĩ ho. Gũtirĩ mũndũ ũtigarĩte wa gũtambũrũkia hema yakwa kana kũigĩrĩra itambaya cia hema yakwa.

Nĩ gũkorũo arĩithi mekĩte maũndũ mategwĩciria, Na matituĩrĩtie ũhoro harĩ Yahweh. Nĩkĩo matekĩte maũndũ na ũtaũku, Na ndũũru ciao ciothe nĩ ihurunjũkĩte.”

Thikĩrĩria! Kũrĩ na ũhoro ũroka! Mũrurumo mũnene kuuma bũrũri wa mwena wa rũgongo, Ũrĩa ũgũtũma matũũra ma Yahuda matuĩke kũndũ gũtiganĩrie, matuĩke kĩmamo kĩa ngui cia gĩthaka.

Ũũii Yahweh, nĩ njũĩ wega atĩ njĩra ya mũndũ ndĩkoragwo moko-inĩ make mwene. Mũndũ tiwe wagĩrĩirũo o na gũtongoria ikinya rĩake.

Ũũii Yahweh, nũnga na matuĩro ma cira marũngĩrĩru, No ti ũrĩ na marakara, nĩgetha ndũkaniine nduĩke kĩndũ hatarĩ.

Itũrũra mang’ũrĩ maku harĩ ndũrĩrĩ iria itatindanagĩra nawe Na harĩ mbarĩ iria itakayagĩra rĩĩtwa rĩaku. Tondũ nĩ itamburĩte Jakubu, Ikamũtambura nginya ikamũniina, Na igatũma bũrũri wake ũtuĩke kũndũ gũtiganĩrie.