Jona 4

No ũndũ ũcio ndwakenirie Jona o na hanini, na akĩrakara mũno

Agĩkĩhoya Yahweh akĩmwĩra ũũ: “Tainee rĩu Yahweh, githĩ ũguo to guo ndoigĩte rĩrĩa ndarĩ bũrũri-inĩ witũ? Nĩkĩo o mbere ndageririe kũũrĩra Tarishishi; nĩ gũkorũo nĩ ndoĩ atĩ wee ũrĩ Kĩhoti mũcayanĩri na mũigua tha, ndũhiũhaga kũrakara na nĩ ũiyũirũo nĩ ũtugi na ndwendaga kũrehera andũ ũũru

Rĩu Yahweh, ndagũthaitha ũndute muoyo, nĩ gũkorũo nĩ kaba ngue handũ ha ndũũre muoyo.”

Nake Yahweh akĩmũũria atĩrĩ: “Hihi nĩ wagĩrĩirũo kũrakara ũguo?”

Jona agĩcoka agĩthiĩ nja ya itũũra rĩu agĩikara thĩ mwena wa irathĩro warĩo. Agĩĩthondekera gĩthũnũ hau na agĩikara thĩ kĩĩruru-inĩ gĩakĩo nĩguo one ũrĩa itũũra rĩu rĩgwĩkwo

Nake Yahweh Kĩhoti agĩtũma hakũre mũũngũ igũrũ rĩa hau Jona aarĩ, nĩguo hagĩe na kĩĩruru kĩmũhumbĩre mũtwe na aigue omĩrĩirio. Nake Jona agĩkena mũno nĩ ũndũ wa mũũngũ ũcio.

No mũthenya ũyũ ũngĩ, Kĩhoti agĩtũma kĩgunyũ rũcinĩ tene gĩkĩrĩa mũũngũ ũcio, naguo ũkĩũma

Hĩndĩ ĩrĩa riũa rĩaambĩrĩirie kwara, ningĩ Kĩhoti agĩtũma rũhuho rũhiũ rwa mwena wa irathĩro, narĩo riũa rĩgĩcina Jona mũtwe nginya akĩũrũo nĩ hinya. Nake aaikaraga akĩhoyaga akue na akoiga ũũ, “Nĩ kaba ngue handũ ha ndũũre muoyo.”

Kĩhoti akĩũria Jona atĩrĩ: “Hihi nĩ wagĩrĩirũo kũrakara ũguo nĩ ũndũ wa mũũngũ ũcio?”

No Yahweh akĩmwĩra: “Ũraigua ũũru nĩ ũndũ wa mũũngũ ũcio, na gũtirĩ wĩra ũraũrutĩire, o na tiwe ũraũkũrĩtie; ũrakũrire na ũtukũ ũmwe ũracoka ũrathira na ũtukũ ũmwe

Githĩ o na niĩ ndiagĩrĩirũo kũiguĩra Nineve tha, itũũra rĩu inene, o rĩu rĩikaraga andũ makĩria ma 120,000 arĩa matakũũranaga wega na ũũru, o hamwe na nyamũ ciao nyingĩ?”