Joshua 1

Thutha wa Musa ndungata ya Yahweh gũkua, Yahweh akĩra Joshua mũrũ wa Nuni ndungata ya Musa ũũ:

“Musa ndungata yakwa nĩ akuĩte. Rĩu ũkĩra, ũringe Jorodani, wee o hamwe na andũ aya othe, mũthiĩ bũrũri-inĩ ũrĩa ndĩramahe, bũrũri ũcio ndĩrahe ciana cia Isiraeli.

Nĩ ngũmũhe kũrĩa guothe mũgũkinyithia kũgũrũ kwanyu, o ta ũrĩa nderĩire Musa

Bũrũri wanyu ũgũkorũo uumĩte werũ-inĩ kwambata nginya Lebanoni o nginya rũũĩ rũrĩa rũnene, o ruo Rũũĩ rwa Farati—bũrũri wothe wa Ahiti—o nginya Iria-inĩ Rĩrĩa Inene mwena wa ithũĩro

Gũtirĩ mũndũ ũrĩhotaga gũgwĩtiiria rĩrĩa rĩothe ũgũkorũo muoyo. O ta ũrĩa ndaarĩ hamwe na Musa noguo ngũkorũo hamwe nawe. Ndigagũtirika o na kana ngũtiganĩrie

Gĩa na ũmĩrĩru na ũgĩe na hinya, nĩ gũkorũo nĩwe ũgũtũma andũ aya magae bũrũri ũrĩa ndehĩtire kũrĩ maithe mao ma tene atĩ nĩ ngaamahe.

“Wee gĩa na ũmĩrĩru na ũgĩe na hinya biũ, na ũrũmĩrĩre na kinyi Watho wothe ũrĩa Musa ndungata yakwa aagwathire ũrũmagĩrĩre. Ndũkanawagarare ũrore mwena wa ũrĩo kana wa ũmotho, nĩguo ũgekaga maũndũ na ũũgĩ kũrĩa guothe ũrĩthiaga

Ibuku rĩrĩ rĩa Watho rĩtiagĩrĩire kwehera kanua-inĩ gaku, na no mũhaka ũrĩthomage ũgecũrania ũhoro warĩo mũthenya na ũtukũ, nĩguo ũrũmagĩrĩre na kinyi kĩrĩa gĩothe kĩandĩkĩtwo thĩinĩ warĩo; nĩ gũkorũo weka ũguo njĩra ciaku nĩ ikũgaacĩra na wĩkage maũndũ na ũũgĩ

Na githĩ ti niĩ ngwathĩte? Gĩa na ũmĩrĩru na ũgĩe na hinya. Ndũkanyitwo nĩ guoya kana wĩtigĩre, nĩ gũkorũo Yahweh Kĩhoti waku arĩ hamwe nawe kũrĩa guothe ũrĩthiaga.”

Joshua agĩcoka agĩatha anene a andũ akĩmeera atĩrĩ:

“Thiĩi kambĩ-inĩ guothe mũheane watho ũyũ kũrĩ andũ, ‘Haarĩriai irio, tondũ thutha wa thikũ ithatũ nĩ mũkũringa Jorodani nĩguo mũtonye mwĩgwatĩre bũrũri ũrĩa Yahweh Kĩhoti wanyu aramũhe mũwĩgwatĩre.’”

Joshua agĩcoka akĩra Arubeni, Agadi, na nuthu ya mũhĩrĩga wa Manase ũũ:

“Ririkanai ũrĩa Musa ndungata ya Yahweh aamwathire akĩmwĩra atĩrĩ: ‘Yahweh Kĩhoti wanyu nĩ ekũmũhe ũhurũko na nĩ amũheete bũrũri ũyũ

Atumia anyu, ciana cianyu, o hamwe na mahiũ manyu nĩo megũikara bũrũri-inĩ ũrĩa Musa aamũheire mwena ũyũ wa Jorodani, ĩndĩ inyuothe njamba cia ita irĩ hinya mwagĩrĩirũo kũringa mũrĩ mbere ya ariũ a ithe wanyu mwĩbangĩte mũrĩ mbũtũ ya mbaara. No mũhaka mũmateithie

o nginya rĩrĩa Yahweh arĩhe ariũ a ithe wanyu ũhurũko, o ta ũrĩa amũheete, na o nao megwatĩre bũrũri ũrĩa Yahweh Kĩhoti wanyu ekũmahe. Na thutha ũcio mũcoke bũrũri-inĩ ũcio mwaheirũo mũikarage na mũwĩgwatĩre, bũrũri ũrĩa Musa ndungata ya Yahweh aamũheire mwena wa irathĩro wa Jorodani.’”

Nao makĩra Joshua ũũ: “Tũgwĩka ũrĩa wothe watwatha, na tũgũthiĩ kũrĩa guothe ũgũtũtũma

O ta ũrĩa twathikagĩrĩria maũndũ mothe marĩa Musa ooigaga, noguo tũrĩgũthikagĩrĩria. Yahweh Kĩhoti waku arokorũo hamwe nawe o ta ũrĩa aakoragwo hamwe na Musa

Mũndũ o wothe ũrĩa ũkaaremera uuge waku na age gwathĩkĩra ũndũ wothe ũrĩa ũkaamwatha, no kũũragwo akooragwo. Wee gĩa na ũmĩrĩru na ũgĩe na hinya.”