Kepha wa Keerĩ 1
Nĩ niĩ Simoni Kepha, ndungata na mũtũmwo wa Yahshua Messiya, Ngũmwandĩkĩra marũa maya inyuĩ arĩa mũrĩkĩtie kwamũkĩra wĩtĩkio wa goro o ta ũrĩa tũrĩ naguo nĩ ũndũ wa ũthingu wa Yahweh na Yahshua Messiya, ũrĩa arĩ we Mũtũhonokia:
Wega na thayũ iromũingĩhĩra nĩ ũndũ wa kũmenyana na Yahweh, o na Yahshua Mwathi witũ.
Rĩu-rĩ, hinya wake wa kuuma na igũrũ nĩ ũtũheete kĩrĩa gĩothe gĩtũbataragia nĩguo tũhote gũtũũra muoyo na twĩamũrĩire Yahweh, nĩ ũndũ wa kũmenyana nake ũcio watwĩtire tũgĩe na riri wake mwene o na wagĩrĩru wake.
Nĩ ũndũ wa maũndũ macio-rĩ, nĩ atũheete maũndũ manene mũno ma ciĩranĩro ciake cia goro, nĩgetha nĩ ũndũ wacio mũgwatanagĩre nake mũtũũrĩre-inĩ wa na igũrũ wake na mwĩthemage kuuma kũrĩ ũbuthu wa gũkũ thĩ ũrĩa ũrehagwo nĩ merirĩria moru.
Na nĩ ũndũ wa gĩtũmi kĩu kĩũmbe, kĩĩrutanĩriei mũno nĩguo muonganĩrĩrie wĩtĩkio wanyu na wagĩrĩru; naguo wagĩrĩru mũwonganĩrĩrie na ũmenyo;
naguo ũmenyo mũwonganĩrĩrie na kwĩgirĩrĩria merirĩria ma mwĩrĩ; nakuo kwĩgirĩrĩria merirĩria macio-rĩ, mũkuonganĩrĩrie na gũkirĩrĩria; nakuo gũkirĩrĩria mũkuonganĩrĩrie na kwĩyamũrĩra Yahweh;
nakuo kwĩyamũrĩra Yahweh mũkuonganĩrĩrie na gũtuga ariũ na aarĩ a Ithe witũ; nakuo gũtuga ariũ na aarĩ a Ithe witũ mũkuonganĩrĩrie na wendani.
Nĩgũkorwo mũngĩgĩa na mawega macio na mamũingĩhĩre mũno-rĩ, nĩ marĩgiragia mũgũtare kana mwage maciaro harĩ ũhoro wa kũmenya Mwathi witũ Yahshua Messiya.
No mũndũ angĩaga maũndũ macio-rĩ, mũndũ ũcio ndarona wega na nĩ mũtumumu, na nĩ ariganĩirwo atĩ aatheririo akĩninĩrwo gĩko biũ nĩguo atigane na mehia make ma tene.
Nĩ ũndũ ũcio, ariũ na aarĩ a Ithe witũ-rĩ, ĩkagĩrai kĩyo makĩria nĩguo mũtũme gwĩtwo kwanyu na gũthurwo kwanyu kũrũme biũ. Nĩgũkorwo mũngĩĩka maũndũ macio-rĩ, gũtirĩ hĩndĩ mũkaagũa,
na nĩ mũgetĩkĩrio na ũtugi mũtonye thĩinĩ wa ũthamaki wa tene na tene wa Yahweh na Mũhonokia witũ Yahshua Messiya.
Nĩ ũndũ ũcio ngũtũũra ndĩmũririkanagia maũndũ macio, o na mwakorwo nĩ mũmamenyete, na nĩ mũhandĩtwo wega thĩinĩ wa ũhoro wa ma ũrĩa mũrĩ naguo.
Na ngwĩciria nĩ kwagĩrĩire ndĩmũririkanagie maũndũ maya hĩndĩ ĩrĩa yothe ngũtũũra thĩinĩ wa hema ĩno ya mwĩrĩ ũyũ,
tondũ nĩ njũĩ atĩ ica ikuhĩ nĩ ngũmĩĩaũra, o ta ũrĩa Mwathi witũ Yahshua Messiya aanyonirie.
Na nĩ ngwĩrutanĩria mũno nyone atĩ ndaarĩkia gũkua nĩ mũrĩhotaga kũririkana maũndũ maya hĩndĩ ciothe.
Hĩndĩ ĩrĩa twamũmenyithirie ũhoro wa hinya na wa gũũka kwa Mwathi witũ Yahshua Messiya-rĩ, tũtiahũthĩrire ngʼano cia gwĩtungĩra na wara, no ithuĩ nĩ kwĩonera tweyoneire ũkaru wake na maitho maitũ.
Nĩgũkorwo nĩ aheirwo gĩtĩo na riri kuuma kũrĩ Yahweh Ithe, hĩndĩ ĩrĩa mũgambo wamũkorire uumĩte kũrĩ Ũrĩa Mwene Riri ũrĩa Mũnene ũkiuga atĩrĩ, “Ũyũ nĩwe Mũrũ wakwa ũrĩa nyendete mũno; nĩ ngenaga mũno nĩ ũndũ wake.”
Ithuĩ ene nĩ tweiguĩrĩire mũgambo ũcio ũkiuma igũrũ hĩndĩ ĩrĩa twarĩ nake kĩrĩma-inĩ kĩrĩa kĩamũre.
Na ningĩ ũhoro ũrĩa warathirwo nĩ anabii ũrĩa twĩ naguo nĩ wĩkĩrĩtwo hinya makĩria, na no mwĩke wega mũngĩũthikĩrĩria, ũhaana ta ũtheri ũkwara handũ harĩ nduma, o nginya gũkĩe nake ũcio Mũrehi-wa-Ũtheri akenge ngoro-inĩ cianyu.
No mbere ya maũndũ mothe-rĩ, no nginya mũmenye atĩ gũtirĩ ũhoro wanarathwo Maandĩko-inĩ Maamũre ũngĩtaũrwo nĩ mũndũ na ũtaũri wake mwene.
Nĩgũkorwo kĩhumo kĩa ũnabii gĩtioimanire na kwenda kwa mũndũ, no andũ nĩ maaririe ũhoro uumĩte kũrĩ Yahweh, o ta ũrĩa Roho Mwamũre aamatongoririe.