Kohelethu 1

Ici nĩ ciugo cia mũrutani, mũrũ wa Daudi, mũthamaki thĩinĩ wa Yahrushalayim.

“Nĩ tũhũ mũtheri!” ũguo nĩguo mũrutani ekuuga, “Nĩ tũhũ mũtheri! Maũndũ mothe nĩ ma tũhũ!”

Mũndũ-rĩ, nĩ ũguni ũrĩkũ onaga kuumana na wĩra wake wothe mũritũ Ũrĩa arutaga na kĩyo mũhuro wa riũa?

Rũciaro rũmwe rũthiraga, gũgoka rũciaro rũngĩ, No thĩ ĩtũũraga tene na tene.

Riũa rĩrathaga, na rĩgathũa; Ningĩ rĩgacoka narua kũrĩa rĩrathagĩra rĩngĩ.

Rũhuho rũthiaga mwena wa mũhuro na rũgathiũrũrũka rwerekeire mwena wa rũgongo; Rũikaraga rũgĩthiũrũrũkaga rũtegũtigithĩria; rũhuho rũikaraga rũgĩthiũrũrũkaga.

Tũrũũĩ tuothe tũthereraga tũkeitĩrĩra iria-inĩ, no iria rĩtiyũraga. Kũrĩa tũrũũĩ tũu tuumaga, no kuo tũcokaga nĩguo tũtherere o rĩngĩ.

Maũndũ mothe nĩ ma mĩnoga; O na gũtirĩ mũndũ ũngĩaria ũhoro wa mo. Riitho rĩtiiganagia kuona; O na gũtũ gũtiiganagia kũigua.

Maũndũ marĩa manakorwo kuo no mo makoragwo kuo, Na maũndũ marĩa manekwo no mo mekagwo rĩngĩ; Gũtirĩ ũndũ mwerũ mũhuro wa riũa.

Hihi nĩ kũrĩ ũndũ mũndũ angiuga ũhoro waguo atĩrĩ, “Ta rora ũndũ ũyũ—nĩ mwerũ”? Warĩ kuo kuuma o tene; Warĩ kuo mbere ya mahinda maitũ;

Gũtirĩ mũndũ ũririkanaga andũ a mahinda ma tene; O na gũtirĩ mũndũ ũkaaririkana andũ arĩa magooka thutha; O na matikaaririkanwo nĩ andũ arĩa magaacoka gũka thutha ũcio.

Niĩ mũrutani, ngoretwo ndĩ mũthamaki wa Isiraeli thĩinĩ wa Yahrushalayim

Nĩ ndatuire na ngoro yakwa kwĩruta na gũthuthuria na ũũgĩ maũndũ mothe marĩa mekĩtwo mũhuro wa riũa—wĩra wa mĩtangĩko ũrĩa Kĩhoti aheete ariũ a andũ nĩguo maũrutage.

Ngĩona mawĩra mothe marĩa meekagwo mũhuro wa riũa, Na rĩrĩ, maũndũ mothe maarĩ ma tũhũ, o ta gũteng’erania na rũhuho.

Kĩndũ kĩrĩa kĩogomu gĩtingĩrũngĩka, Na kĩndũ kĩrĩa gĩtarĩ ho gĩtingĩtarũo.

Na niĩ ngiuga ũũ ngoro-inĩ yakwa: “Atĩrĩrĩ, nĩ ngĩĩte na ũũgĩ mũingĩ mũno, gũkĩra mũndũ ũngĩ o wothe wanakorũo kuo mbere yakwa thĩinĩ wa Yahrushalayim, nayo ngoro yakwa ĩkĩgĩa na ũũgĩ mũingĩ o na ũmenyo.”

Nĩ nderutanĩirie na ngoro yakwa kũmenya ũhoro wa ũũgĩ na kũmenya ũhoro wa ũgũrũki, o na ũhoro wa ũrimũ, na ũndũ ũcio o naguo no ta gũteng’erania na rũhuho.

Nĩ gũkorũo ũũgĩ mũingĩ ũrehaga kĩeha kĩingĩ, Ũũ atĩ mũndũ wothe wongagĩrĩra ũmenyo nĩ ruo ongagĩrĩra.