Luka 15
Na rĩrĩ, etia a mbeca cia igooti othe na ehia makĩmũthiũrũrũkĩria nĩguo mamũthikĩrĩrie
Nao Afarisai na aandĩki-marũa maangʼungʼuaga makerana atĩrĩ: “Mũndũ ũyũ amũkagĩra ehia na akarĩanĩra nao.”
Nake akĩmahe ngerekano ĩno, akiuga:
“Nĩ mũndũ ũrĩkũ gatagatĩ-inĩ kanyu arĩ na ngʼondu 100, ĩmwe ĩngĩũra, ũtangĩtiga icio 99 werũ-inĩ agacarie ĩyo ĩmwe yũrĩte nginya arĩmĩona
Na rĩrĩa amĩona, amĩigagĩrĩra ciande-inĩ ciake na agakena mũno
Na akinya mũciĩ, etaga arata na andũ a itũũra rĩake, akamera atĩrĩ, ‘Kenai hamwe na niĩ, tondũ nĩ ndona ngʼondu yakwa ĩrĩa ĩrorĩte.’
Ngũmwĩra atĩrĩ, rĩrĩa mwĩhia ũmwe erira, ũguo noguo gũkoragwo na gĩkeno kĩnene igũrũ nĩ ũndũ wake, gũkĩra nĩ ũndũ wa andũ athingu 99 matarabatara kwĩrira.
“Kana nĩ mũndu-wa-nja ũrĩkũ ũrĩ na thendi ikũmi cia drakma, ĩmwe ya drakma icio ĩngĩũra, ũtakagia tawa na akahaata nyũmba yake akamĩcaria na kĩyo nginya rĩrĩa arĩmĩona
Na rĩrĩa amĩona, etaga arata na andũ a itũũra rĩake, akamera atĩrĩ, ‘Kenai hamwe na niĩ, tondũ nĩ ndona thendi ya drakma ĩrĩa ĩrorĩte.’
Ngũmwĩra atĩrĩ, ũguo noguo araika a Yahweh magĩaga na gĩkeno rĩrĩa mwĩhia ũmwe erira.”
Agĩcoka akiuga atĩrĩ: “Mũthuri ũmwe aarĩ na ariũ erĩ
Ũrĩa warĩ mũnyinyi akĩĩra ithe atĩrĩ, ‘Baba, he igai rĩa indo iria ciagĩrĩire gũtuĩka ciakwa.’ Nĩ ũndũ ũcio akĩmagayania indo ciake
Matukũ manini thutha ũcio, mũriũ ũcio mũnyinyi agĩcokanĩrĩria indo ciake ciothe agĩthiĩ bũrũri wa kũraya na arĩ kũu akĩananga indo icio ciake na mũtũũrĩre wa ikeno cia waganu
Rĩrĩa aacihũthĩrire ciothe, gũkĩgĩa ngʼaragu nene bũrũri-inĩ ũcio wothe, nake agĩtuĩka mũgiĩki
Agĩthiĩ akĩĩgwatania na mũikari ũmwe wa bũrũri ũcio, ũrĩa wamwĩrire athiĩ mĩgũnda-inĩ yake akarĩithagie ngũrũe
Na eeriragĩria kũrĩa maciaro ma mũtĩ wa mũkarabi marĩa ngũrũe ciarĩaga, no gũtirĩ mũndũ wamũheaga kĩndũ.
“Hĩndĩ ĩrĩa aacokereirũo nĩ meciria, akiuga atĩrĩ, ‘Nĩ andũ aigana mandĩkĩtwo wĩra nĩ baba monaga mũgate wa kũmaigana, na niĩ gũkũ nĩ gũkua ndĩrakua nĩ ngʼaragu
Ngũũkĩra thiĩ kũrĩ baba ndĩmwĩre: “Baba, nĩ njĩhĩirie igũrũ na ngakwĩhĩria
Ndiagĩrĩirũo gwĩtwo mũrũguo rĩngĩ. Reke nduĩke ta ũmwe wa andũ arĩa wandĩkĩte.”’
Nĩ ũndũ ũcio agĩũkĩra agĩthiĩ kũrĩ ithe. Na arĩ o haraya ithe akĩmuona, akĩringwo nĩ tha, akĩhanyũka, akĩmũhĩmbĩria na akĩmũmumunya.
Nake mũriũ ũcio akĩmwĩra, ‘Baba, nĩ njĩhĩirie igũrũ na ngakwĩhĩria. Ndiagĩrĩirũo gwĩtwo mũrũguo rĩngĩ.’
No ithe akĩĩra ngombo ciake atĩrĩ, ‘Rehei narua kanjũ ĩrĩa njega mũno, mũmũhumbe, na mũmwĩkĩre mbete guoko na mũmwĩkĩre iratũ
Mũcoke mũrehe njaũ ĩrĩa norie, mũmĩthĩnje tũrĩe na tũkũngũĩre,
nĩ gũkorũo mũriũ ũyũ wakwa ararĩ mũkuũ no rĩu nĩ acokete muoyo; nĩ arorĩte no rĩu nĩ onekete.’ Nao makĩambĩrĩria gũkũngũĩra.
“Hĩndĩ ĩyo mũrũwe ũrĩa mũkũrũ aarĩ mũgũnda, na rĩrĩa aacokire na agĩkuhĩrĩria mũciĩ, akĩigua andũ makĩina nyĩmbo magĩthũngũthaga.
Nĩ ũndũ ũcio agĩĩta ndungata ĩmwe akĩmĩũria ũrĩa gwathiaga na mbere
Nayo ĩkĩmwĩra, ‘Mũrũ wa nyũkwa nĩ okire, nake thoguo athĩnja njaũ ĩrĩa norie tondũ amwamũkĩrire arĩ na ũgima mwega wa mwĩrĩ.’
No we akĩrakara na akĩrega kũingĩra thĩinĩ. Nake ithe akiuma nja akĩambĩrĩria kũmũthaitha
Agĩcokeria ithe akĩmwĩra ũũ, ‘Hĩĩ! githĩ, ndikoretwo ngĩkũrutĩra wĩra mĩaka ĩno yothe na ndirĩ ndagarara watho waku o na riita rĩmwe, no niĩ ndũrĩ wahe kabũri o na rĩ nĩguo ngenere hamwe na arata akwa!
No o na ihenya hĩndĩ ĩrĩa mũrũguo ũyũ akinya, o ũyũ waanangire indo ciaku na ahũũri maraya, wamũthĩnjĩra njaũ ĩrĩa norie!’
Nake ithe akĩmwĩra, ‘Mũrũ wakwa, ũkoretwo hamwe na niĩ hĩndĩ ciothe, na indo iria ciothe ndĩ nacio nĩ ciaku
Nĩ twagĩrĩirũo gũkũngũĩra na gũkena, nĩ gũkorũo mũrũ wa nyũkwa nĩ arakuĩte na rĩu nĩ acokete muoyo; nĩ arorĩte no rĩu nĩ onekete.’”