Maũndũ ma Alawii 14

Yahweh agĩthiĩ na mbere kwaria na Musa akĩmwĩra atĩrĩ:

“Ũyũ nĩguo ũrĩkoragwo ũrĩ watho wa mũndũ ũrĩ na mangũ mũthenya ũrĩa arĩtheragio, hĩndĩ ĩrĩa arĩtwaragwo kũrĩ mũthĩnjĩri-Yahweh

Mũthĩnjĩri-Yahweh arĩthiaga nja ya kambĩ na akamũbaara. Angĩkorũo mũndũ ũcio ũrĩ na mangũ nĩ ahonete mangũ macio,

mũthĩnjĩri-Yahweh arĩmwathaga arehe nyoni igĩrĩ irĩ muoyo na itarĩ thahu, kamũtĩ ka mũtarakwa, ndigi cia rangi mũtune, na mũthobi nĩgetha atherio

Mũthĩnjĩri-Yahweh agĩrĩirũo gwathana nyoni ĩmwe yũragĩrũo nyũngũ-inĩ ya rĩũmba igũrũ rĩa maĩ ma handũ haratherera

No nyoni ĩyo ĩngĩ ĩrĩ muoyo agĩrĩirũo kũmĩoya hamwe na kamũtĩ ka mũtarakwa, ndigi cia rangi mũtune, na mũthobi, na acirikie irĩ hamwe thakame-inĩ ya nyoni ĩyo yũragĩirũo igũrũ rĩa maĩ ma handũ haratherera

Acoke aminjaminje thakame ĩyo maita mũgwanja harĩ mũndũ ũcio ũretheria mangũ na anĩrĩre atĩ mũndũ ũcio ndarĩ na thahu, nayo nyoni ĩyo ĩrĩ muoyo amĩrekererie werũ-inĩ.

“Mũndũ ũcio ũretheria no mũhaka athambie nguo ciake na enje njuĩrĩ yake yothe na ethambe na maĩ, na nĩ arĩthiragwo nĩ thahu. Thutha ũcio no acoke kambĩ-inĩ, no agĩrĩirũo gũikara nja ya hema yake ihinda rĩa thikũ mũgwanja

Mũthenya wa mũgwanja agĩrĩirũo kwenja njuĩrĩ yothe ĩrĩ mũtwe-inĩ wake na kĩreru-inĩ gĩake na mbutu ciake. Na thutha wa kwenja njuĩrĩ yake yothe, agĩrĩirũo gũthambia nguo ciake na ethambe na maĩ, na nĩ arĩthiragwo nĩ thahu.

“Mũthenya wa kanana agĩrĩirũo gũtwara tũtũrũme twĩrĩ tũtarĩ na kaũgũ, kamwatĩ kamwe karĩ mwaka-inĩ wako wa mbere na gatarĩ na kaũgũ, icunjĩ ithatũ harĩ ikũmi cia eba cia mũtu mũhinyu ũtukanĩtio na maguta ũrĩ igongona rĩa mũtu, na maguta gĩthimi kĩa logi ĩmwe;

nake mũthĩnjĩri-Yahweh ũrĩa ũrĩanagĩrĩra atĩ mũndũ ũcio ndarĩ na thahu agĩrĩirũo kũrehe mũndũ ũcio ũretheria, o hamwe na magongona macio, mbere ya Yahweh mũromo-inĩ wa hema ya gũtũnganwo

Mũthĩnjĩri-Yahweh arĩoyaga gatũrũme kamwe agakaruta karĩ igongona rĩa mahĩtia hamwe na maguta macio ma gĩthimi kĩa logi ĩmwe, na agacicũgia mbere na thutha irĩ igongona rĩa gũcũgio mbere ya Yahweh

Agacoka agathĩnjĩra gatũrũme kau harĩa igongona rĩa mehia na igongona rĩa njino ithĩnjagĩrũo, handũ hamũre, tondũ o ta igongona rĩa mehia, igongona rĩa mahĩtia rĩrĩkoragwo rĩrĩ rĩa mũthĩnjĩri-Yahweh. Kĩu nĩ kĩndũ kĩamũre mũno.

“Mũthĩnjĩri-Yahweh arĩcokaga akoya thakame ĩmwe ya igongona rĩu rĩa mahĩtia, na mũthĩnjĩri-Yahweh ũcio akamĩhaka moni-inĩ ya gũtũ kwa ũrĩo kwa mũndũ ũcio ũretheria na kĩara-inĩ kĩrĩa kĩnene gĩa guoko gwake kwa ũrĩo na kĩara-inĩ kĩrĩa kĩnene gĩa kũgũrũ gwake kwa ũrĩo

Ningĩ mũthĩnjĩri-Yahweh akoya mamwe ma maguta macio ma gĩthimi kĩa logi ĩmwe na akamaitĩrĩria rũhĩ-inĩ rwake mwene rwa ũmotho

Mũthĩnjĩri-Yahweh agacoka agatobokia kĩara gĩake kĩa ũrĩo maguta-inĩ macio marĩ rũhĩ-inĩ rwake rwa ũmotho na agataatia maguta mamwe na kĩara gĩake maita mũgwanja mbere ya Yahweh

Thutha ũcio mũthĩnjĩri-Yahweh akahaka maguta mamwe ma marĩa matigara rũhĩ-inĩ rwake moni-inĩ ya gũtũ kwa ũrĩo kwa mũndũ ũcio ũretheria na kĩara-inĩ kĩrĩa kĩnene gĩa guoko gwake kwa ũrĩo na kĩara-inĩ kĩrĩa kĩnene gĩa kũgũrũ gwake kwa ũrĩo igũrũ rĩa thakame ya igongona rĩa mahĩtia

Mũthĩnjĩri-Yahweh agĩrĩirũo kũhaka maguta marĩa matigara rũhĩ-inĩ rwake mũtwe-inĩ wa mũndũ ũcio ũretheria, na njĩra ĩyo mũthĩnjĩri-Yahweh akaruta igongona rĩa kũhumbĩra mehia ma mũndũ ũcio mbere ya Yahweh.

“Mũthĩnjĩri-Yahweh arĩrutaga igongona rĩa mehia nĩguo ahumbĩre mehia ma mũndũ ũcio ũretheria thahu wake, na thutha ũcio agathĩnja nyamũ ya igongona rĩa njino

Ningĩ mũthĩnjĩri-Yahweh akarutĩra igongona rĩa njino na igongona rĩa mũtu kĩgongona-inĩ, na njĩra ĩyo mũthĩnjĩri-Yahweh akaruta igongona rĩa kũhumbĩra mehia ma mũndũ ũcio, nake agathirũo nĩ thahu.

“No mũndũ ũcio angĩkorũo arĩ mũthĩni na ndarĩ na ũhoti mũnene, agĩrĩirũo kũrehe gatũrũme kamwe karĩ igongona rĩa mahĩtia nĩ ũndũ wa igongona rĩa gũcũgio, nĩgetha ahumbĩre mehia make, na arehe gĩcunjĩ kĩmwe harĩ ikũmi kĩa eba kĩa mũtu mũhinyu ũtukanĩtio na maguta ũrĩ igongona rĩa mũtu, maguta ma gĩthimi kĩa logi ĩmwe,

na ndutura igĩrĩ kana njui igĩrĩ cia ndirahũgĩ, kũringana na ũhoti wake. Ĩmwe ĩrĩkoragwo ĩrĩ ya igongona rĩa mehia, nayo ĩyo ĩngĩ ĩrĩkoragwo ĩrĩ ya igongona rĩa njino

Mũthenya wa kanana agĩrĩirũo kũrehe indo icio kũrĩ mũthĩnjĩri-Yahweh mũromo-inĩ wa hema ya gũtũnganwo mbere ya Yahweh nĩguo atherio.

“Mũthĩnjĩri-Yahweh arĩoyaga gatũrũme kau ka igongona rĩa mahĩtia hamwe na maguta macio ma gĩthimi kĩa logi ĩmwe, na mũthĩnjĩri-Yahweh ũcio agacicũgia mbere na thutha irĩ igongona rĩa gũcũgio mbere ya Yahweh

Agacoka agathĩnja gatũrũme kau ka igongona rĩa mahĩtia, mũthĩnjĩri-Yahweh ũcio akoya thakame ĩmwe ya igongona rĩu rĩa mahĩtia akamĩhaka moni-inĩ ya gũtũ kwa ũrĩo kwa mũndũ ũcio ũretheria na kĩara-inĩ kĩrĩa kĩnene gĩa guoko gwake kwa ũrĩo na kĩara-inĩ kĩrĩa kĩnene gĩa kũgũrũ gwake kwa ũrĩo

Mũthĩnjĩri-Yahweh agaitĩrĩria maguta mamwe rũhĩ-inĩ rwake mwene rwa ũmotho,

namo maguta macio marĩ rũhĩ-inĩ rwake rwa ũmotho akoya mamwe na kĩara gĩake kĩa ũrĩo agataatia maita mũgwanja mbere ya Yahweh

Na mũthĩnjĩri-Yahweh akahaka maguta mamwe ma macio marĩ rũhĩ-inĩ rwake moni-inĩ ya gũtũ kwa ũrĩo kwa mũndũ ũcio ũretheria na kĩara-inĩ kĩrĩa kĩnene gĩa guoko gwake kwa ũrĩo na kĩara-inĩ kĩrĩa kĩnene gĩa kũgũrũ gwake kwa ũrĩo, akahaka harĩa hothe ekũhakĩte thakame ya igongona rĩa mahĩtia

Thutha ũcio mũthĩnjĩri-Yahweh agĩrĩirũo kũhaka maguta marĩa matigara rũhĩ-inĩ rwake mũtwe-inĩ wa mũndũ ũcio ũretheria, na njĩra ĩyo akahumbĩra mehia ma mũndũ ũcio mbere ya Yahweh.

“Agĩrĩirũo kũruta ĩmwe ya ndutura icio kana ĩmwe ya njui icio cia ndirahũgĩ, kũringana na ũhoti wake,

o ĩrĩa angĩhota kũruta, ĩrĩ ya igongona rĩa mehia nayo ĩyo ĩngĩ ĩrĩ ya igongona rĩa njino hamwe na igongona rĩa mũtu; nake mũthĩnjĩri-Yahweh akaruta igongona rĩa kũhumbĩra mehia ma mũndũ ũcio ũretheria mbere ya Yahweh.

“Ũcio nĩguo watho wa mũndũ ũrarĩ na mũrimũ wa mangũ no ndarĩ na ũhoti wa kũruta kĩrĩa kĩrabatarania nĩguo atherio.”

Yahweh agĩcoka akĩra Musa na Haruni atĩrĩ:

“Rĩrĩa mũgaakinya bũrũri-inĩ wa Kanaani, ũrĩa ngũmũhe ũtuĩke igai rĩanyu, na hũũre nyũmba o yothe na mũrimũ wa mangũ bũrũri-inĩ ũcio wanyu,

mwene nyũmba ĩyo agĩrĩirũo gũthiĩ kũrĩ mũthĩnjĩri-Yahweh amwĩre ũũ, ‘Kũrĩ mũthemba wa mũrimũ ũgĩĩte nyũmba yakwa.’

Nake mũthĩnjĩri-Yahweh agĩrĩirũo kũheana watho nĩguo indo ciothe irutwo thĩinĩ wa nyũmba ĩyo atanathiĩ kũbaara mũrimũ ũcio, nĩgetha ndakanĩrĩre atĩ kĩndũ gĩothe kĩrĩ thĩinĩ wa nyũmba ĩyo kĩrĩ na thahu; thutha ũcio mũthĩnjĩri-Yahweh agathiĩ akaingĩra nyũmba ĩyo akamĩthuthuria

Agĩrĩirũo kũbaara harĩa hagĩtwo nĩ mũrimũ ũcio, na angĩkorũo thingo cia nyũmba ĩyo irĩ na tũrima twa rangi ũhaana ta wa yerũ ũtukanĩte na wa ngirini kana rangi ũhaana ta mũtune na tũrima tũu tũkorũo tũroneka tũrikĩire gũkĩra rũthingo ruo rwene,

mũthĩnjĩri-Yahweh agĩrĩirũo kuuma nja ya nyũmba ĩyo athiĩ gacĩra-inĩ ga gũtonya nyũmba ĩyo na amĩhinge kwa ihinda rĩa thikũ mũgwanja.

“Thutha ũcio mũthĩnjĩri-Yahweh agacoka mũthenya wa mũgwanja nĩgetha amĩthuthurie. Angĩkorũo mũrimũ ũcio nĩ ũtheremete kũu thingo-inĩ cia nyũmba ĩyo,

mũthĩnjĩri-Yahweh arĩrutaga watho na no mũhaka mahiga macio magĩĩtwo nĩ mũrimũ ũcio marutwo na mateo nja wa itũũra handũ hatarĩ hamũre

Agacoka agathana nyũmba ĩyo ĩkũrũrũo biũ mwena wa thĩinĩ, na mũthanga na thimiti iria ciarutwo ciagĩrĩire gũteo nja wa itũũra handũ hatarĩ hamũre

Magacoka magekĩra mahiga mangĩ hau mahiga macio maruta moima, na agĩrĩirũo kũhũthĩra thimiti ĩngĩ na athinge nyũmba ĩyo.

“No angĩkorũo mũrimũ ũcio nĩ ũgũcoka rĩngĩ na ũtuthũke thĩinĩ wa nyũmba ĩyo thutha wa mahiga macio kũrutwo na nyũmba ĩyo gũkũrũrũo na ĩgathingwo rĩngĩ,

mũthĩnjĩri-Yahweh agĩrĩirũo kũingĩra amĩthuthurie. Angĩkorũo mũrimũ ũcio nĩ ũtheremete thĩinĩ wa nyũmba ĩyo, ũcio nĩ mũrimũ mũũru mũno wa mangũ ũrĩ thĩinĩ wa nyũmba ĩyo. Nyũmba ĩyo ĩrĩ na thahu

Agacoka agathana nyũmba ĩyo ĩmomorũo—mahiga mayo, mbaũ ciayo, na mũthanga na thimiti yothe ya nyũmba ĩyo—na igakuuo igatwarũo nja ya itũũra handũ hatarĩ hamũre

No mũndũ o wothe angĩingĩra nyũmba ĩyo thikũ o yothe harĩ thikũ icio nyũmba ĩyo ĩhingĩtwo arĩkoragwo na thahu o nginya hwaĩ-inĩ;

na mũndũ o wothe angĩkoma thĩinĩ wa nyũmba ĩyo agĩrĩirũo gũthambia nguo ciake, na mũndũ o wothe angĩrĩĩra thĩinĩ wa nyũmba ĩyo agĩrĩirũo gũthambia nguo ciake.

“No mũthĩnjĩri-Yahweh angĩũka na one mũrimũ ũcio ndũtheremete thĩinĩ wa nyũmba thutha wa nyũmba ĩyo gũthingwo rĩngĩ, mũthĩnjĩri-Yahweh ũcio agĩrĩirũo kwanĩrĩra atĩ nyũmba ĩyo ndĩrĩ na thahu, tondũ mũrimũ ũcio nĩ ũthirĩte

Nĩgetha atherie thahu wa nyũmba ĩyo, arĩoyaga nyoni igĩrĩ, kamũtĩ ka mũtarakwa, ndigi cia rangi mũtune, na mũthobi

Agĩrĩirũo kũũragĩra nyoni ĩmwe nyũngũ-inĩ ya rĩũmba igũrũ rĩa maĩ ma handũ haratherera

Acoke oe kamũtĩ kau ka mũtarakwa, mũthobi, ndigi cia rangi mũtune, na nyoni ĩyo ĩngĩ ĩrĩ muoyo acirikie thakame-inĩ ya nyoni ĩyo yũragĩirũo igũrũ rĩa maĩ ma handũ haratherera, thutha ũcio agĩrĩirũo kũmĩminjaminja aroretie nyũmba-inĩ ĩyo maita mũgwanja

Arĩtheragia thahu wa nyũmba ĩyo na thakame ya nyoni ĩyo, maĩ macio ma handũ haratherera, nyoni ĩyo ĩngĩ ĩrĩ muoyo, kamũtĩ kau ka mũtarakwa, mũthobi ũcio, na ndigi icio cia rangi mũtune

Agacoka akarekereria nyoni ĩyo ĩrĩ muoyo werũ-inĩ nja wa itũũra, na njĩra ĩyo akaruta igongona rĩa mehia nĩ ũndũ wa nyũmba ĩyo, nayo ĩgathirũo nĩ thahu.

“Ũcio nĩguo watho ũkoniĩ ũndũ wothe wĩgiĩ mangũ, mũrimũ wa ngothi ya mũtwe kana mũrimũ ũrĩ nderu-inĩ,

mangũ marĩ nguo-inĩ kana nyũmba-inĩ,

na ũndũ wothe wĩgiĩ kũimba, ironda, na gũtũnda,

nĩgetha kũmenyekage rĩrĩa kĩndũ kĩrĩ na thahu na rĩrĩa kĩndũ gĩtarĩ na thahu. Ũcio nĩguo watho wĩgiĩ mangũ.”