Maũndũ ma Alawii 23

Yahweh agĩthiĩ na mbere kwarĩria Musa, akĩmwĩra ũũ:

“Arĩria ciana cia Isiraeli, ũciĩre ũũ: Ciathĩ cia Yahweh iria ciathanĩtwo, o iria mũkahunjanĩria ũhoro wacio wa atĩ nĩ itũngano nyamũre-rĩ, ciathĩ icio nĩ niĩ ndĩciathanĩte.

“‘Mĩthenya itandatũ wĩra no ũrutwo, no mũthenya wa mũgwanja nĩ Thabatũ ya kũhurũka biũ, nĩ kĩgomano kĩamũre. Mũtirĩrutaga wĩra o na ũrĩkũ. Mũthenya ũcio wagĩrĩire gũkorũo ũrĩ thabatũ ya Yahweh kũrĩa guothe mũrĩikaraga.

“‘Ici nĩcio ciathĩ cia Yahweh, igomano nyamũre iria mwagĩrĩirũo kwanĩrĩra mahinda-inĩ marĩa matuĩtwo nĩ ũndũ wacio:

Mweri wa mbere, mũthenya wa 14 wa mweri ũcio hwaĩ-inĩ gũkĩgĩa mairia nĩ Bathaka ya Yahweh.

“‘Mũthenya wa 15 wa mweri ũcio nĩ Gĩathĩ kĩa Mĩgate Ĩtarĩ Mĩimbie kĩa Yahweh. Mĩthenya mũgwanja mwagĩrĩirũo kũrĩa mĩgate ĩtarĩ mĩkĩre ndawa ya kũimbia

Mũthenya wa mbere, mũrĩkoragwo na kĩgomano kĩamũre. Mũtiagĩrĩirũo kũruta wĩra o na ũmwe mũritũ

No nĩ mũrĩrutaga igongona rĩa gũcinwo na mwaki harĩ Yahweh mĩthenya mũgwanja. Na mũthenya wa mũgwanja nĩ kũrĩkoragwo na kĩgomano kĩamũre. Mũtiagĩrĩirũo kũruta wĩra o na ũmwe mũritũ.’”

Yahweh agĩgĩthiĩ na mbere kwarĩria Musa, akĩmwĩra ũũ:

“Aria na ciana cia Isiraeli ũciĩre atĩrĩ, ‘Rĩrĩa mũkaaingĩra bũrũri-inĩ ũrĩa ndĩramũhe na mũgethe maciaro maguo, no mũhaka mũgaatwara gĩtĩa kĩa maciaro ma mbere ma magetha manyu kũrĩ mũthĩnjĩri-Yahweh

Nake acũgie gĩtĩa kĩu mbere na thutha arĩ hau mbere ya Yahweh nĩguo atũme mwĩtĩkĩrĩke. Mũthĩnjĩri-Yahweh agĩrĩirũo gũgĩcũgia mũthenya ũrĩa ũrũmĩrĩire Thabatũ

Mũthenya ũrĩa gĩtĩa kĩanyu gĩgũcũgio, no mũhaka mũrute gatũrũme karĩ mwaka-inĩ wako wa mbere na gatarĩ na kaũgũ, mũkarute karĩ igongona rĩa njino harĩ Yahweh

Igongona rĩarĩo rĩa mũtu rĩrĩkoragwo rĩrĩ icunjĩ igĩrĩ harĩ ikũmi cia eba cia mũtu mũhinyu ũtukanĩtio na maguta, ũrĩ igongona rĩa gũcinwo na mwaki harĩ Yahweh, rĩa mũtararĩko mwega. Igongona rĩarĩo rĩa ndibei rĩrĩkoragwo rĩrĩ gĩcunjĩ kĩmwe harĩ inya kĩa hini kĩa ndibei

Mũtiagĩrĩirũo kũrĩa mũgate o wothe, mũtu mũhĩhie, kana ngano ya mũgethano nginya mũthenya ũcio ũkinye, o nginya mũrehe igongona rĩa Kĩhoti wanyu. Ũcio nĩ watho wa gũtũũra ũrũmagĩrĩrũo njiarũa-inĩ cianyu ciothe kũrĩa guothe mũrĩikaraga.

“‘Mũrĩtaraga Thabatũ mũgwanja kuuma mũthenya ũrĩa ũrũmĩrĩire Thabatũ, mũthenya ũrĩa mwarehe gĩtĩa kĩa igongona rĩa gũcũgio. Ciagĩrĩire gũkorũo irĩ ciumia ng’ima

Mũrĩtaraga thikũ 50 o nginya mũthenya ũrĩa ũrũmĩrĩire Thabatũ ya mũgwanja, na thutha ũcio mũkaruta igongona rĩa ngano ya mũgethano kũrĩ Yahweh

Mwagĩrĩirũo kũrehe mĩgate ĩĩrĩ kuuma mĩciĩ-inĩ yanyu ĩrĩ igongona rĩa gũcũgio. Yagĩrĩire gũkorũo ĩthondeketwo na icunjĩ igĩrĩ cia eba cia mũtu mũhinyu. Na yagĩrĩire kũrugwo ĩkĩrĩtwo ndawa ya kũimbia, ĩrĩ maciaro ma mbere kũrĩ Yahweh

Na mĩgate ĩyo mwagĩrĩirũo kũmĩruta hamwe na tũtũrũme mũgwanja tũtarĩ na kaũgũ, o gatũrũme gakorũo karĩ ka mwaka ũmwe, na gategwa kamwe na ndũrũme igĩrĩ. Irĩkoragwo irĩ igongona rĩa njino rĩa kũrutĩrũo Yahweh hamwe na igongona rĩa mũtu rĩrĩa rĩagĩrĩire na magongona ma ndibei marĩa magĩrĩire, rĩrĩ igongona rĩa gũcinwo na mwaki, rĩa mũtararĩko mwega harĩ Yahweh

Na no mũhaka mũrute kabũri kamwe karĩ igongona rĩa mehia na tũtũrũme twĩrĩ tũrĩ igongona rĩa ũiguano, o gatũrũme gakorũo karĩ ka mwaka ũmwe

Mũthĩnjĩri-Yahweh agĩrĩirũo gũcicũgia mbere na thutha irĩ hamwe na mĩgate ya maciaro ma mbere, irĩ igongona rĩa gũcũgio mbere ya Yahweh, o hamwe na tũtũrũme tũu twĩrĩ. Ciagĩrĩire gũkorũo irĩ kĩndũ kĩamũre harĩ Yahweh irĩ cia mũthĩnjĩri-Yahweh

Mũthenya ũcio nĩ mũrĩanagĩrĩra kĩgomano kĩamũre nĩ ũndũ wanyu inyuĩ ene. Mũtiagĩrĩirũo kũruta wĩra o na ũmwe mũritũ. Ũcio nĩ watho wa gũtũũra ũrũmagĩrĩrũo kũrĩa guothe mũrĩikaraga njiarũa-inĩ cianyu ciothe.

“‘Rĩrĩa mũkũgetha maciaro ma bũrũri wanyu, ndũkanagethe rũteere-inĩ rwa mũgũnda waku ũhinyĩtie na ndwagĩrĩirũo kũngania matigari ma magetha maku. Wagĩrĩirũo gũcitiga nĩ ũndũ wa mũndũ ũrĩa mũthĩni na mũndũ wa kũngĩ ũrĩa ũikaranagia na inyuĩ. Niĩ nĩ niĩ Yahweh Kĩhoti wanyu.’”

Yahweh agĩgĩthiĩ na mbere kwarĩria Musa, akĩmwĩra atĩrĩ:

“Ĩra ciana cia Isiraeli ũũ, ‘Mweri-inĩ wa mũgwanja, mũthenya wa mbere wa mweri ũcio mwagĩrĩirũo kũhurũka biũ, nĩ kĩririkano kĩrĩmenyithanagio na njĩra ya kũhuuha coro, nĩ kĩgomano kĩamũre

Mũtiagĩrĩirũo kũruta wĩra o na ũmwe mũritũ, no mwagĩrĩirũo kũruta igongona rĩa gũcinwo na mwaki harĩ Yahweh.’”

Yahweh akĩarĩria Musa o rĩngĩ, akĩmwĩra atĩrĩ:

“No mũthenya wa ikũmi wa mweri wa mũgwanja nĩ Mũthenya wa Horohio. Mwagĩrĩirũo gũkorũo na kĩgomano kĩamũre, na no mũhaka mwĩnyerekie na mũrute igongona rĩa gũcinwo na mwaki harĩ Yahweh

Mũtiagĩrĩirũo kũruta wĩra o na ũrĩkũ mũthenya ũcio tondũ nĩ mũthenya wa Horohio ya kũmũhoroheria mbere ya Yahweh Kĩhoti wanyu

Mũndũ o wothe ũtekwĩnyerekia mũthenya-inĩ ũcio agĩrĩire kweherio gatagatĩ-inĩ ka andũ ao

Na mũndũ wothe ũrĩrutaga wĩra o na ũrĩkũ mũthenya ũcio, nĩ ndĩrĩmũniinaga ehere gatagatĩ-inĩ ka andũ ao

Mũtiagĩrĩirũo kũruta wĩra o na ũrĩkũ. Ũcio nĩ watho wa gũtũũra ũrũmagĩrĩrũo njiarũa-inĩ cianyu ciothe kũrĩa guothe mũrĩikaraga

Ĩyo nĩ Thabatũ yanyu ya kũhurũka biũ, na mwagĩrĩirũo kwĩnyerekia hwaĩ-inĩ wa mũthenya wa kenda wa mweri ũcio. Mwagĩrĩirũo gũkũngũĩra Thabatũ yanyu kuuma hwaĩ-inĩ wa mũthenya ũcio nginya hwaĩ-inĩ wa mũthenya ũcio ũngĩ ũrũmĩrĩire.”

Yahweh agĩthiĩ na mbere kwarĩria Musa, akĩmwĩra atĩrĩ:

“Ĩra ciana cia Isiraeli ũũ, ‘Mũthenya wa 15 wa mweri ũcio wa mũgwanja nĩ Gĩathĩ gĩa Ithũnũ kĩrĩa kĩrĩkũngũyagĩrũo thikũ mũgwanja harĩ Yahweh

No mũhaka gũgakoragwo na kĩgomano kĩamũre mũthenya wa mbere, na mũtiagĩrĩirũo kũruta wĩra o na ũmwe mũritũ

Thikũ mũgwanja no mũhaka mũkaruta igongona rĩa gũcinwo na mwaki harĩ Yahweh. Naguo mũthenya wa kanana mwagĩrĩirũo gũkorũo na kĩgomano kĩamũre, na nĩ mwagĩrĩirũo kũruta igongona rĩa gũcinwo na mwaki harĩ Yahweh. Kĩu nĩ kĩgomano kĩamũre. Mũtiagĩrĩirũo kũruta wĩra o na ũmwe mũritũ.

“‘Ici nĩcio ciathĩ cia Yahweh iria mwagĩrĩirũo nĩ kwanĩrĩra irĩ igomano nyamũre cia kũrutagwo igongona rĩa gũcinwo na mwaki harĩ Yahweh: igongona rĩa njino na igongona rĩa mũtu rĩa igongona rĩu na magongona ma ndibei kũringana na mũtaratara wa o mũthenya

Macio nĩ magongona mangĩ hatatarĩtwo indo iria irĩrutagwo hĩndĩ ya Thabatũ cia Yahweh, na iheo cianyu, magongona manyu ma mwĩhĩtwa, magongona manyu ma kwĩyendera, iria mwagĩrĩirũo kũheana kũrĩ Yahweh

No rĩrĩ, mũthenya wa 15 wa mweri wa mũgwanja, mwacokanĩrĩria magetha ma bũrũri wanyu, mwagĩrĩirũo gũkũngũĩra gĩathĩ kĩa Yahweh thikũ mũgwanja. Mũthenya wa mbere ũrĩkoragwo ũrĩ wa kũhurũka biũ na o naguo mũthenya wa kanana nĩ wa kũhurũka biũ

Mũthenya wa mbere mũrĩoyaga maciaro ma mĩtĩ ĩrĩa mĩega, mathĩgĩ ma mĩtĩ ya mĩkĩndũ, honge cia mĩtĩ ĩrĩ na mathangũ maingĩ na mĩtĩ ya mĩcũgũcũgũ ya rũĩ-inĩ, na mũgakena mbere ya Yahweh Kĩhoti wanyu thikũ mũgwanja

Mũrĩkũngũyagĩra ihinda rĩu thikũ mũgwanja o mwaka rĩrĩ gĩathĩ kĩa Yahweh. Mwagĩrĩirũo kũrĩkũngũyagĩra mweri-inĩ wa mũgwanja ũrĩ watho wa gũtũũra ũrũmagĩrĩrũo njiarũa-inĩ cianyu ciothe

Mwagĩrĩirũo gũikara ithũnũ-inĩ thikũ mũgwanja. Andũ othe a Isiraeli magĩrĩirũo gũikara ithũnũ-inĩ,

nĩguo njiarũa cianyu iria igooka thutha ikaamenya atĩ nĩ ndatũmire ciana cia Isiraeli cikare ithũnũ-inĩ rĩrĩa ndacirutaga bũrũri-inĩ wa Misiri. Niĩ nĩ niĩ Yahweh Kĩhoti wanyu.’”

Nĩ ũndũ ũcio Musa akĩra ciana cia Isiraeli ũhoro wĩgiĩ ciathĩ icio ciaigĩtwo cia Yahweh.