Maũndũ ma Matukũ wa Keerĩ 1
Na rĩrĩ, Suleimani mũrũ wa Daudi nĩ aakĩrĩrĩirie kũgĩa na hinya ũthamaki-inĩ wake, na Yahweh Kĩhoti wake aarĩ hamwe nake na agĩtũma anenehe mũno.
Suleimani agĩgĩtũmanĩra Isiraeli yothe, anene a andũ ngiri na anene a andũ igana, atuanĩri ciira, na atongoria othe a Isiraeli yothe, arĩa maatongoragia nyũmba cia maithe
Nake Suleimani hamwe na kĩũngano gĩothe magĩthiĩ handũ harĩa hatũũgĩru kũu Gibeoni, tondũ kũu nĩkuo hema ya gũtũnganwo ya Kĩhoti ũrĩa wa ma yarĩ, hema o ĩrĩa Musa ndungata ya Yahweh aakĩte werũ-inĩ
No rĩrĩ, Daudi nĩ aambatĩtie Ithandũkũ rĩa Kĩhoti ũrĩa wa ma kuuma Kiriathu-jearimu akarĩtwara handũ harĩa Daudi aathondekete nĩ ũndũ warĩo; aarĩambĩire hema kũu Yahrushalayim
Nakĩo kĩgongona gĩa gĩcango kĩrĩa Bezaleli mũrũ wa Uri mũrũ wa Huri aathondekete kĩaigĩtwo mbere ya gĩikaro kĩrĩa kĩamũre kĩa Yahweh; na Suleimani o hamwe na kĩũngano maahoyaga marĩ mbere yakĩo
Suleimani agĩkĩruta magongona kũu mbere ya Yahweh, na akĩrutĩra magongona 1,000 ma njino igũrũ rĩa kĩgongona kĩu gĩa gĩcango kĩa hema ya gũtũnganwo.
Ũtukũ ũcio Kĩhoti akiumĩrĩra Suleimani akĩmwĩra atĩrĩ: “Hoya kĩrĩa ũngĩenda ngũhe.”
Suleimani aigua ũguo akĩĩra Kĩhoti atĩrĩ: “Nĩ wonetie baba Daudi maũndũ manene mega ma ũtugi, na ũkandua mũthamaki ithenya rĩake
Rĩu wee Yahweh Kĩhoti-rĩ, reke ũndũ ũrĩa werĩire baba Daudi ũhinge, nĩ gũkorũo ũnduĩte mũthamaki igũrũ rĩa andũ aingĩ o ta rũkũngũ rwa thĩ
Kĩĩhe ũũgĩ na ũmenyo wa gũtongoria andũ aya, tondũ rĩrĩ, nũũ ũngĩkĩhota gũtuithania andũ aya aku aingĩ ũũ?”
Nake Yahweh akĩĩra Suleimani atĩrĩ: “Tondũ ũndũ ũcio nĩguo ngoro yaku yerirĩria, na ndũnahoya indo, ũtonga, na gĩtĩo kana gĩkuũ kĩa andũ arĩa magũthũire, na ningĩ ndũnahoya ũheo ũtũũro mũraihu, no wahoya ũheo ũũgĩ na ũmenyo wa gũtuithania andũ akwa arĩa ngũtuĩte mũthamaki igũrũ rĩao-rĩ,
nĩ ũkũheo ũũgĩ na ũmenyo; no ningĩ nĩ ngũkũhe indo na ũtonga na gĩtĩo iria gũtarĩ athamaki marĩ maakorũo nacio mbere yaku na gũtarĩ angĩ makaagĩa nacio thutha waku.”
Nake Suleimani akĩhũndũka kuuma handũ harĩa hatũũgĩru kũu Gibeoni, kuuma mbere ya hema ya gũtũnganwo, agĩthiĩ Yahrushalayim; na agĩthamakĩra Isiraeli
Suleimani agĩthiĩ na mbere kũingĩhia ngaari cia mbarathi na mbarathi; aarĩ na ngaari cia mbarathi 1,400, na mbarathi 12,000, na agĩciiga cikarage matũũra-inĩ ma ngaari cia mbarathi na hakuhĩ na mũthamaki kũu Yahrushalayim
Mũthamaki agĩtũma betha na thahabu cingĩhe thĩinĩ wa Yahrushalayim o ta mahiga, na mbaũ cia mũtarakwa ikĩingĩha o ta mĩtĩ ya mĩkũyũ ya Shefela
Mbarathi cia Suleimani ciagũrĩtwo kuuma Misiri, na gĩkundi kĩa ahũũri biacara kĩa mũthamaki kĩagũraga mbarathi icio irĩ ndũũru na thogora ũmwe
O ngaari ya mbarathi ĩrĩa yarutagwo Misiri yagũragwo icunjĩ 600 cia betha, nayo mbarathi yagũragwo icunjĩ 150 cia betha; magacoka magaciendia kũrĩ athamaki othe a Ahiti na athamaki a Siria.