Maũndũ ma Matukũ wa Keerĩ 15

Na rĩrĩ, roho wa Kĩhoti ũgĩũka igũrũ rĩa Azaria mũrũ wa Odedi

Nĩ ũndũ ũcio agĩthiĩ gũcemania na Asa na akĩmwĩra atĩrĩ: “Thikĩrĩria, wee Asa na andũ othe a Yahuda na Benjamini! Yahweh arĩ hamwe na inyuĩ angĩkorũo nĩ mũgũthiĩ na mbere gũkorũo hamwe nake; na angĩkorũo nĩ mũkũmũcaria, nĩ ekũreka mũmuone, ĩndĩ mũngĩmũtiganĩria, nake nĩ ekũmũtiganĩria

Kwa ihinda iraya, andũ a Isiraeli matiarĩ na Kĩhoti ũrĩa wa ma, matiarĩ na mũthĩnjĩri-Yahweh wa kũmaruta, na matiarĩ na watho

No rĩrĩa marĩ na mĩtangĩko nĩ maacokagĩrĩra Yahweh Kĩhoti wa Isiraeli na makamũcaria, nake nĩ aarekaga mamuone

Matukũ-inĩ macio, gũtirĩ mũndũ ũngĩoimagarire na thayũ, tondũ kwarĩ na ngũĩ nyingĩ gatagatĩ ka aikari othe a mabũrũri

Rũrĩrĩ rũmwe rwahehenjagwo nĩ rũrĩa rũngĩ, narĩo itũũra rĩmwe rĩkahehenjwo nĩ rĩrĩa rĩngĩ, tondũ Kĩhoti nĩ aatũmĩte makorũo na ngũĩ na mĩtangĩko ya mĩthemba yothe

Ĩndĩ inyuĩ, gĩai na hinya na mũtigakue ngoro, tondũ wĩra wanyu nĩ ũkaarĩhwo.”

Rĩrĩa Asa aaiguire ciugo icio, na ũrathi wa Odedi ũrĩa mũnabii, akĩgĩa na ũmĩrĩru na akĩeheria mĩhianano ĩrĩ magigi kuuma bũrũri wothe wa Yahuda na Benjamini na kuuma matũũra-inĩ marĩa aatahĩte gĩcigo-inĩ kĩrĩa kĩrĩ irĩma kĩa Efiraimu na agĩcokia kĩgongona kĩa Yahweh kĩrĩa kĩarĩ mbere ya gĩthaku kĩa Yahweh

Ningĩ agĩcokanĩrĩria andũ othe a Yahuda na Benjamini na ageni arĩa maaikaraga hamwe nao kuuma Efiraimu na Manase na Simeoni, tondũ nĩ moorĩte magoka kũrĩ we kuuma Isiraeli marĩ aingĩ mũno rĩrĩa moonire atĩ Yahweh Kĩhoti wake aarĩ hamwe nake

Nĩ ũndũ ũcio makĩgomana hamwe kũu Yahrushalayim mweri-inĩ wa gatatũ mwaka-inĩ wa 15 wa wathani wa Asa

Mũthenya ũcio makĩrutĩra Yahweh magongona kuuma harĩ indo cia gũtahwo iria mookĩte nacio, ng’ombe 700 na ng’ondu 7,000

Makĩria ma ũguo, makĩgĩa na kĩrĩkanĩro gĩa gũcaria Yahweh Kĩhoti wa maithe mao ma tene na ngoro yao yothe na muoyo wao wothe

Mũndũ wothe ũngĩagire gũcaria Yahweh Kĩhoti wa Isiraeli aagĩrĩire kũũragwo, o na arĩ mũnini kana mũnene, arĩ mũndũrũme kana mũndũ-wa-nja

Nĩ ũndũ ũcio makĩĩhĩta mwĩhĩtwa kũrĩ Yahweh na mũgambo mũnene, makĩanagĩrĩra makenete, na makĩhuuhaga tũrumbeta na coro

Nao andũ othe a Yahuda magĩkena nĩ ũndũ wa mwĩhĩtwa ũcio, tondũ meehĩtĩte mwĩhĩtwa ũcio na ngoro yao yothe na makĩmũcaria na kĩyo nake akĩreka mamuone, na Yahweh agĩthiĩ na mbere kũmahe ũhurũko mĩena yothe.

Mũthamaki Asa o na nĩ eeheririe cũwe Maaka kuuma gaturũa-inĩ gake ga gũkorũo arĩ nyina wa mũthamaki, tondũ nĩ aathondekete mũhianano ũrĩ magigi nĩ ũndũ wa ũthathaiya wa mũtĩ wa kũhoywo. Asa agĩtemanga mũhianano ũcio ũrĩ magigi wa cũwe na akĩũhehenja na akĩũcinĩra Mũkuru-inĩ wa Kidironi

Ĩndĩ kũndũ kũrĩa gũtũũgĩru gũtieheririo thĩinĩ wa Isiraeli.O na kũrĩ ũguo, Asa nĩ eeheanĩte na ngoro yothe ũtũũro-inĩ wake wothe

Na akĩrehe indo nyũmba-inĩ ya Kĩhoti ũrĩa wa ma iria we na ithe maamũrĩte—betha, thahabu, na indo cia mĩthemba ĩtiganĩte

Gũtiarĩ na mbaara nginya mwaka-inĩ wa 35 wa wathani wa Asa.