Maũndũ ma Matukũ wa Keerĩ 5

Nĩ ũndũ ũcio Suleimani akĩrĩkia wĩra wothe ũrĩa aagĩrĩirũo kũruta wa nyũmba ya Yahweh. Suleimani agĩcoka akĩingĩria indo iria ithe Daudi aamũrĩte, na akĩiga betha, thahabu, na indo icio ingĩ ciothe igĩna-inĩ cia nyũmba ya Kĩhoti ũrĩa wa ma

Hĩndĩ ĩyo Suleimani agĩcokanĩrĩria athuri a Isiraeli, atongoria othe a mĩhĩrĩga, atongoria a nyũmba cia maithe ma ciana cia Isiraeli. Magĩgĩthiĩ Yahrushalayim nĩguo mambatie ithandũkũ rĩa kĩrĩkanĩro kĩa Yahweh kuuma Itũũra rĩa Daudi, na norĩo Zayuni

Arũme othe a Isiraeli makĩũngana mbere ya mũthamaki hĩndĩ ya gĩathĩ kĩrĩa gĩkagwo mweri-inĩ wa mũgwanja.

Nĩ ũndũ ũcio athuri othe a Isiraeli magĩũka, nao Alawii makĩoya Ithandũkũ rĩu

Makĩambatia Ithandũkũ rĩu, hema ya gũtũnganwo, na indo ciothe nyamũre iria ciarĩ hema-inĩ ĩyo. Athĩnjĩri-Yahweh na Alawii magĩciambatia

Mũthamaki Suleimani na kĩrĩndĩ gĩothe kĩa Isiraeli kĩrĩa gĩetĩtwo nĩguo gĩcemanie nake maarĩ mbere ya Ithandũkũ. Gũgĩkĩrutwo magongona ma ng’ondu na ng’ombe nyingĩ itangĩagerekire kana itarĩke

Athĩnjĩri-Yahweh magĩcoka makĩrehe ithandũkũ rĩa kĩrĩkanĩro kĩa Yahweh makĩrĩiga handũ harĩo, thĩinĩ wa rumu ya thĩinĩ biũ ya nyũmba ĩyo, Harĩa Hamũre Mũno, rungu rwa mathagu ma akerubi

Kwoguo mathagu ma akerubi maatambũrũkĩte igũrũ rĩa harĩa Ithandũkũ rĩu rĩarĩ, ũndũ akerubi acio maahumbĩrĩte Ithandũkũ rĩu o hamwe na mĩtĩ yarĩo kuuma na igũrũ

Mĩtĩ ĩyo yarĩ mĩraihu mũno ũndũ mĩthia ya mĩtĩ ĩyo yoonekaga mũndũ arĩ Harĩa Hamũre mbere ya rumu ĩyo ya thĩinĩ biũ, no ndĩoonekaga mũndũ arĩ nja. Na hau nĩho ĩrĩ nginyagia ũmũthĩ

Ithandũkũ rĩu rĩtiarĩ na kĩndũ tiga o ihengere igĩrĩ iria Musa aaigire ho arĩ Horebu, rĩrĩa Yahweh aathondekire kĩrĩkanĩro hamwe na andũ a Isiraeli rĩrĩa mooimaga Misiri.

Rĩrĩa athĩnjĩri-Yahweh mooimire harĩa hamũre magĩthiĩ nja (nĩ gũkorũo athĩnjĩri-Yahweh othe arĩa maarĩ ho nĩ meamũrĩire Yahweh, gũtekũmakania ikundi iria maarĩ),

aini othe Alawii arĩa maarĩ a Asafu, Hemani, Jeduthuni, o na a ariũ ao na ariũ a ithe wao meehumbĩte ngora ĩrĩa njega, manyitĩte thani iria ihũũrithanagio, inanda cia ndigi, na inanda cia mũgeeto; maarũgamĩte mwena wa irathĩro wa kĩgongona, na maarĩ hamwe na athĩnjĩri-Yahweh 120 arĩa maahuuhaga tũrumbeta

Hĩndĩ ĩrĩa arĩa maahuuhaga tũrumbeta na aini maagoocaga na magacokeria Yahweh ngatho marĩ na ũrũmwe, naguo mũgambo ũkambata kuuma tũrumbeta-inĩ, thani iria ihũũrithanagio, na indo icio ingĩ cia ũini hĩndĩ ĩyo maagoocaga Yahweh, “tondũ nĩ mwega; ũtugi wake ũtũũraga tene na tene,” nyũmba ĩyo, o nyũmba ĩyo ya Yahweh, ĩkĩiyũra itu

Athĩnjĩri-Yahweh matiahotire kũrũgama matungate nĩ ũndũ wa itu rĩu, nĩ gũkorũo riri wa Yahweh waiyũrĩte nyũmba-inĩ ĩyo ya Kĩhoti ũrĩa wa ma.