Maũndũ ma Matukũ wa Mbere 13

Na rĩrĩ, Daudi akĩaranĩria na anene a andũ ngiri na anene a andũ igana o hamwe na atongoria othe

Daudi agĩcoka akĩĩra kĩũngano gĩothe kĩa Isiraeli atĩrĩ: “Angĩkorũo nĩ mũkuona arĩ wega na ũndũ ũcio ũkorũo wĩtĩkĩrĩkĩte harĩ Yahweh Kĩhoti witũ, rekei tũtũme ndũmĩrĩri kũrĩ ariũ a ithe witũ arĩa matigarĩte icigo-inĩ ciothe cia Isiraeli na kũrĩ athĩnjĩri-Yahweh na Alawii matũũra-inĩ mao na kũndũ gwa kũrĩithia moke manyitanĩre na ithuĩ

Na tũcokie Ithandũkũ rĩa Kĩhoti witũ.” Nĩ gũkorũo matiarĩrũmbũirie matukũ-inĩ ma Saulu

Kĩũngano gĩothe gĩgĩtĩkĩra gwĩka ũguo, nĩ gũkorũo andũ othe nĩ moonire ũndũ ũcio wagĩrĩire

Nĩ ũndũ ũcio Daudi agĩcokanĩrĩria andũ othe a Isiraeli, kuuma rũũĩ-inĩ rwa Misiri o nginya Lebo-hamathu, nĩguo makagĩĩre Ithandũkũ rĩa Kĩhoti ũrĩa wa ma kuuma Kiriathu-jearimu.

Daudi na andũ othe a Isiraeli makĩambata magĩthiĩ Baala, kũu Kiriathu-jearimu ĩrĩa ya Yahuda, nĩgetha makagĩĩre kuuma kuo Ithandũkũ rĩa Kĩhoti ũrĩa wa ma, Yahweh, o we ũrĩa ũikarĩire gĩtĩ kĩa ũnene igũrũ rĩa akerubi, harĩa andũ makayagĩra rĩĩtwa rĩake

O na kũrĩ ũguo, makĩigĩrĩra Ithandũkũ rĩu rĩa Kĩhoti ũrĩa wa ma gakaari-inĩ kerũ ga gũkururio na makĩrĩkuua kuuma nyũmba-inĩ ya Abinadabu, na Uza na Ahio nĩo maatongoragia gakaari kau ga gũkururio

Daudi na andũ othe a Isiraeli no gũkũngũĩra maakũngũyagĩra mbere ya Kĩhoti ũrĩa wa ma na hinya wao wothe, makĩinaga nyĩmbo na inanda cia mũgeeto, inanda ingĩ cia ndigi, manyanga, thani iria ihũũrithanagio, na tũrumbeta

No rĩrĩa maakinyire kĩhuuhĩro-inĩ gĩa Kidoni, Uza agĩtambũrũkia guoko gwake akĩnyita Ithandũkũ rĩu, nĩ gũkorũo ng’ombe ciarĩ hakuhĩ kũrĩgũithia

Nĩ ũndũ ũcio marakara ma Yahweh makĩrĩrĩmbũkĩra Uza, na Akĩmũũraga nĩ ũndũ wa gũtambũrũkia guoko gwake harĩ Ithandũkũ rĩu, agĩgĩkuĩra hau mbere ya Kĩhoti

No Daudi akĩrakara nĩ ũndũ wa marakara ma Yahweh kũrĩrĩmbũkĩra Uza; na handũ hau hetagwo Perezu-uza nginyagia ũmũthĩ.

Nĩ ũndũ ũcio Daudi agĩĩtigĩra Kĩhoti ũrĩa wa ma mũthenya ũcio na akĩũria atĩrĩ: “Ingĩrehe Ithandũkũ rĩa Kĩhoti ũrĩa wa ma atĩa kũrĩ niĩ?”

Daudi ndaigana gũtwara Ithandũkũ rĩu kũrĩa aarĩ thĩinĩ wa Itũũra rĩa Daudi, ĩndĩ ooigire rĩtwarũo nyũmba-inĩ ya Obedi-edomu Mũgiiti

Ithandũkũ rĩu rĩa Kĩhoti ũrĩa wa ma rĩarĩ hamwe na andũ a nyũmba ya Obedi-edomu, rĩgĩikara kũu nyũmba-inĩ yake mĩeri ĩtatũ, na Yahweh agĩthiĩ o na mbere kũrathima andũ a nyũmba ya Obedi-edomu na kĩrĩa gĩothe aarĩ nakĩo.