Nehemiya 1

Ici nĩ ciugo cia Nehemia mũrũ wa Hakalia: Na rĩrĩ, mweri-inĩ wa Kisilevu, mwaka wa 20, ndarĩ Shushani, nyũmba-inĩ ya mũthamaki

Ihinda-inĩ rĩu Hanani, ũmwe wa ariũ a baba, o hamwe na andũ angĩ magĩũka moimĩte Yahuda, ngĩmoria ũhoro wĩgiĩ Ayahudi arĩa maatigarĩte, arĩa maahonokete kuuma ithamĩrio, na ngĩmoria ũhoro wa Yahrushalayim

Nao makĩnjokeria atĩrĩ: “Arĩa matigarĩte kũu gĩcigo-inĩ kĩa bũrũri o acio maahonokire kuuma ithamĩrio, nĩ marathĩnĩka mũno na makanyararũo. Thingo cia Yahrushalayim nĩ momoku, na ihingo ciayo igacinwo na mwaki.”

Rĩrĩa ndaiguire ciugo icio, o hĩndĩ ĩyo ngĩikara thĩ na ngĩambĩrĩria kũrĩra na gũcakaya thikũ cigana ũna, ngĩikara ndĩhingĩte na ngĩhoyaga ndĩ mbere ya Kĩhoti wa igũrũ

Ngiuga atĩrĩ: “Wee Yahweh Kĩhoti wa igũrũ, Kĩhoti mũnene na wa magegania ũrĩa ũhingagia kĩrĩkanĩro gĩake na akonania tha ciake harĩ arĩa mamwendete na makahingia maathani make,

ndagũthaitha ũtege gũtũ gwaku na ũhingũre maitho maku nĩguo ũthikĩrĩrie mahoya ma ndungata yaku marĩa ndĩrakũhoya ũmũthĩ, ũtukũ na mũthenya, megiĩ ndungata ciaku ciana cia Isiraeli, o ngiumbũraga mehia marĩa andũ a Isiraeli makwĩhĩirie. Nĩ twĩhĩtie, niĩ na nyũmba ya ithe witũ

Nĩ twĩkĩte ũndũ mũũru mũno harĩ wee nĩ ũndũ wa kwaga kũhingia maathani, mawatho, na matuĩro ma ciira marĩa waheire Musa ndungata yaku.

“Ndagũthaitha ũririkane uuge ũrĩa waathire Musa ndungata yaku ũkĩmwĩra ũũ: ‘Mũngĩkaaga kwĩhokeka, ngaamũhurunja gatagatĩ-inĩ ga ikundi cia andũ

No mũngĩkanjokerera na mũhingie maathani makwa na mũmathĩkĩre, o na andũ anyu mangĩgakorũo mahurunjũkĩte o nginya gĩturi-inĩ kĩa igũrũ, nĩ ngaamacokanĩrĩria kuuma kũu na ndĩmarehe handũ harĩa thuurĩte nĩguo rĩĩtwa rĩakwa rĩikarage ho.’

O nĩ ndungata ciaku na andũ aku, arĩa wakũũrire kũgerera hinya waku mũingĩ na guoko gwaku kũrĩ hinya

Wee Yahweh, ndagũthaitha ũtege gũtũ gwaku ũthikĩrĩrie mahoya ma ndungata yaku na mahoya ma ndungata ciaku iria ikenagio nĩ gwĩtigĩra rĩĩtwa rĩaku, ningĩ ndagũthaitha ũtũme ndungata yaku ĩgaacĩre ũmũthĩ, na ũreke mũndũ ũyũ anjaĩre.” Hĩndĩ ĩyo niĩ ndarĩ mũtwarĩri mũthamaki gĩa kũnyua.