Nehemiya 8

Nao andũ othe makĩũngana marĩ kĩndũ kĩmwe kĩhaaro-inĩ kĩa mũingĩ kĩrĩa kĩarĩ mbere ya Kĩhingo kĩa Maĩ, na makĩĩra Ezara ũrĩa mwandĩki oke na ibuku rĩa Watho wa Musa, ũrĩa Yahweh aathĩte Isiraeli

Nĩ ũndũ ũcio mũthenya wa mbere wa mweri wa mũgwanja, Ezara ũcio mũthĩnjĩri-Yahweh agĩtwara Watho ũcio mbere ya kĩũngano kĩu kĩa arũme, andũ-a-nja, na andũ othe arĩa mangĩahotire gũthikĩrĩria na mataũkĩrũo

Nake agĩthoma ibuku rĩu anĩrĩire kuuma rũcinĩ gũgĩthererũka nginya mũthenya gatagatĩ arĩ hau mbere kĩhaaro-inĩ kĩa mũingĩ kĩu kĩarĩ mbere ya Kĩhingo kĩa Maĩ, akĩrĩthomera arũme, andũ-a-nja, na andũ arĩa othe mangĩataũkĩirũo; nao andũ magĩthikĩrĩria na kinyi ũhoro ũrĩa warĩ ibuku-inĩ rĩu rĩa Watho

Na Ezara ũcio mwandĩki aarũgamĩte handũ igũrũ haakĩtwo na mbaũ, harĩa haathondeketwo tondũ wa ũndũ ũcio; na arĩa maarũgamĩte mwena wake wa ũrĩo maarĩ, Matithia, Shema, Anaia, Uriya, Hilikia, na Maaseia; nao arĩa maarũgamĩte mwena wake wa ũmotho maarĩ, Pedaia, Mishaeli, Malikiya, Hashumu, Hashi-badana, Zakaria, na Meshulamu.

Ezara agĩkĩhingũra ibuku rĩu andũ acio othe makĩonaga nĩ gũkorũo aarĩ handũ igũrũ rĩa andũ othe. Na rĩrĩa aarĩhingũrire, andũ othe makĩrũgama

Ezara agĩcoka akĩgooca Yahweh Kĩhoti ũrĩa wa ma, o we Ũrĩa mũnene, nao andũ acio othe makiuga, “Amein! Amein!” na makĩoya moko mao na igũrũ. Magĩcoka makĩinamĩrĩra Yahweh maturumithĩtie mothiũ mao thĩ

Nao Jeshua, Bani, Sherebia, Jamini, Akubu, Shabethai, Hodia, Maaseia, Kelita, Azaria, Jozabadu, Hanani, Pelaia, arĩa maarĩ Alawii, nĩ maataaragĩria andũ Watho ũcio, nao andũ acio magĩikara o marũgamĩte

Na magĩthiĩ na mbere gũthoma ibuku rĩu na kayũ, kuuma Watho-inĩ wa Kĩhoti ũrĩa wa ma, magĩtaaragĩria na njĩra ĩrataũkĩka na makonania wega ũrĩa Watho uugĩte; nĩ ũndũ ũcio magĩteithia andũ gũtaũkĩrũo nĩ ũhoro ũcio wathomagwo.

Nake Nehemia, ũrĩa warĩ ngavana hĩndĩ ĩyo, Ezara mũthĩnjĩri-Yahweh na mwandĩki, na Alawii arĩa maarutaga andũ ũhoro, makĩĩra andũ othe ũũ: “Mũthenya ũyũ nĩ mwamũre harĩ Yahweh Kĩhoti wanyu. Mũtigacakae kana mũrĩre.” Tondũ andũ othe nĩ maarĩraga maigua ciugo cia Watho

Akĩmeera ũũ: “Thiĩi, mũrĩe nyama noru na mũnyue kĩrĩa kĩrĩ cama, nao arĩa matarĩ na kĩndũ mahaarĩirie mũmaneanĩre irio; nĩ gũkorũo mũthenya ũyũ nĩ mwamũre harĩ Mwathi witũ, na mũtikaigue kĩeha, tondũ gĩkeno kĩrĩa kiumaga kũrĩ Yahweh nĩkĩo mwĩgitio wanyu.”

Nao Alawii nĩ maahooragĩria andũ, makĩmeeraga atĩrĩ: “Mũtikarĩre! tondũ mũthenya ũyũ nĩ mwamũre, na mũtikaigue kĩeha.”

Nĩ ũndũ ũcio andũ othe magĩthiĩ kũrĩa na kũnyua na kũneanĩra arĩa angĩ irio na gũkena mũno, nĩ gũkorũo nĩ maataũkĩirũo nĩ ciugo icio maamenyithĩtio.

Na mũthenya wa kerĩ, arĩa maarĩ atongoria a nyũmba cia maithe ma andũ othe, athĩnjĩri-Yahweh, na Alawii magĩcokanĩrĩra hamwe mathiũrũrũkĩirie Ezara ũcio mwandĩki nĩgetha magĩe na ũtaũku makĩria wĩgiĩ ciugo cia Watho ũcio

Nao makĩona handĩkĩtwo Watho-inĩ ũrĩa Yahweh aathanĩte kũgerera kũrĩ Musa atĩ andũ a Isiraeli maagĩrĩirũo gũikara ithũnũ-inĩ hĩndĩ ya gĩathĩ mweri-inĩ wa mũgwanja,

na atĩ maagĩrĩirũo kwanĩrĩra na kũmenyithania matũũra-inĩ mao mothe na Yahrushalayim guothe, makiugaga: “Thiĩi gĩcigo-inĩ kĩrĩa kĩrĩ irĩma na mũrehe mathangũ ma mĩtĩ ya mĩtamaiyũ, mĩtĩ ya mĩcinda-nũgũ, mĩtĩ ya mĩhandathi na mĩtĩ ya mĩkĩndũ, na mathangũ ma mĩtĩ ĩngĩ ĩrĩa ĩ mathangũ manene ma gũthondeka ithũnũ, kũringana na ũrĩa kwandĩkĩtwo.”

Nĩ ũndũ ũcio andũ magĩthiĩ na makĩrehe mathangũ ma gũthondeka ithũnũ ciao, o mũndũ igũrũ rĩa nyũmba yake, o hamwe na thĩinĩ wa nja ciao, thĩinĩ wa nja cia nyũmba ya Kĩhoti ũrĩa wa ma, kĩhaaro kĩa mũingĩ gĩa Kĩhingo kĩa Maĩ, na kĩhaaro kĩa mũingĩ gĩa Kĩhingo kĩa Efiraimu

Nĩ ũndũ ũcio, andũ othe a kĩũngano kĩu acio mooimĩte ithamĩrio magĩthondeka ithũnũ na maaikaraga ithũnũ-inĩ icio, nĩ gũkorũo andũ a Isiraeli matierĩgĩte gwĩka ũndũ ũcio na njĩra ĩyo kuuma hĩndĩ ya matukũ ma Joshua mũrũ wa Nuni nginya mũthenya ũcio, kwoguo gũkĩgĩa na gĩkeno kĩnene mũno

Na mũthenya o mũthenya ibuku rĩa Watho wa Kĩhoti ũrĩa wa ma nĩ rĩathomagwo, kuuma mũthenya wa mbere nginya mũthenya wa mũico. Na makĩgĩa na gĩkũngũĩro kĩu thikũ mũgwanja, naguo mũthenya wa kanana gũkĩgĩa na kĩgomano kĩamũre, o ta ũrĩa maagĩrĩirũo nĩ gwĩka.