Samueli wa Keerĩ 1
Thutha wa Saulu gũkua, rĩrĩa Daudi aacokire oimĩte kũhoota Aamaleki, Daudi agĩikara Zikilagi thikũ igĩrĩ
Mũthenya wa gatatũ, mũndũ ũmwe agĩũka oimĩte kambĩ-inĩ ya Saulu nguo ciake irĩ ndembũre na arĩ na tĩri mũtwe. Rĩrĩa aakinyire harĩ Daudi, akĩĩgũithia na agĩturumithia mũtwe thĩ.
Daudi akĩmũũria atĩrĩ: “Uumĩte na kũ?” Nake akĩmũcokeria ũũ: “Nĩ gwĩthara ndethara kuuma kambĩ-inĩ ya Isiraeli.”
Daudi akĩmũũria atĩrĩ: “Maũndũ mahaana atĩa? Ta njĩĩra.” Nĩ ũndũ ũcio akĩmwĩra ũũ: “Andũ nĩ morĩte makoima mbaara-inĩ na andũ aingĩ nĩ matooretio na makooragwo. O na Saulu na mũrũwe Jonathani nĩ makuĩte.”
Daudi agĩcoka akĩũria mwanake ũcio wamũreheire ũhoro ũcio atĩrĩ: “Ũmenyete atĩa atĩ Saulu na mũrũwe Jonathani nĩ makuĩte?”
Mwanake ũcio akĩmũcokeria ũũ: “Ndĩrakorirũo ndĩ hau Kĩrĩma-inĩ kĩa Giliboa, nake Saulu aretiranĩtie hau na itimũ rĩake, na ngaari cia mbarathi na atwarithia a mbarathi marakoretwo maamũkinyĩra
Rĩrĩa arehũgũrire na aranyona, aranjĩta, na niĩ ndĩroiga atĩrĩ, ‘Ĩ niĩ ũyũ haha!’
Aranjũria atĩrĩ, ‘Nĩ wee ũ?’ Ndĩramũcokeria ũũ, ‘Niĩ ndĩ Mũamaleki.’
Aracoka aranjĩra atĩrĩ, ‘Ndagũthaitha nguhĩrĩria ũnjũrage, nĩ gũkorũo ndĩ na ruo rũnene mũno, no ndĩ o muoyo.’
Kwoguo ndĩramũkuhĩrĩria na ndĩramũũraga, tondũ ndĩronire ndangĩhona thutha wake gũkorũo agwĩte thĩ arĩ mũgurarie. Ndĩracoka ndĩroya thũmbĩ ĩrĩa ĩrarĩ mũtwe-inĩ wake na bangiri ĩrĩa ĩrarĩ guoko-inĩ gwake, na nĩ ndacirehe haha harĩ mwathi wakwa.”
Daudi aigua ũguo akĩnyita nguo ciake agĩcitembũra, na o nao arũme arĩa othe aarĩ nao magĩka o taguo
Nao magĩcakaya na makĩrĩra na makĩĩhinga kũrĩa o nginya hwaĩ-inĩ nĩ ũndũ wa Saulu, nĩ ũndũ wa mũrũwe Jonathani, nĩ ũndũ wa andũ a Yahweh, na nĩ ũndũ wa nyũmba ya Isiraeli, tondũ nĩ mooragĩtwo na rũhiũ rwa njora.
Daudi akĩũria mwanake ũcio wamũreheire ũhoro ũcio atĩrĩ: “Uumĩte kũ?” Akĩmwĩra ũũ: “Niĩ ndĩ mũrũ wa mũndũ wa kũngĩ, Mũamaleki.”
Daudi agĩcoka akĩmũũria ũũ: “Nĩ kĩĩ kĩratũmire wage gwĩtigĩra kuoya guoko gwaku na igũrũ ũũrage mũitĩrĩrie maguta wa Yahweh?”
Daudi arĩkia kuuga ũguo agĩta mwanake ũmwe akĩmwĩra atĩrĩ: “Ũka haha ũmũũrage.” Nĩ ũndũ ũcio akĩmũgũtha, agĩkua
Daudi aamwĩrire ũũ: “Thakame yaku ĩrĩ igũrũ rĩa mũtwe waku mwene, tondũ kanua gaku mwene nĩko karuta ũira igũrũ rĩaku koiga atĩrĩ, ‘Niĩ mwene nĩ niĩ ndĩroragire mũitĩrĩrie maguta wa Yahweh.’”
Daudi agĩcoka akĩina rwĩmbo rũrũ rwa gũcakaĩra Saulu na mũrũwe Jonathani
na akiuga andũ a Yahuda marutwo rwĩmbo rũu rwa macakaya rũrĩa rwĩtagwo “Rwĩmbo rwa Ũta,” rũrĩa rwandĩkĩtwo ibuku-inĩ rĩa Jasharu:
“Ũthaka waku, wee Isiraeli, nĩ ũũragĩirũo kũndũ gwaku kũrĩa gũtũũgĩru. Kaĩ arĩa marĩ hinya nĩ magũĩte-ĩ!
Mũtikaheane ũhoro ũcio thĩinĩ wa Gathu; Mũtikawanĩrĩre njĩra-inĩ cia Ashikeloni, Nĩgetha airĩtu a Afilisti matigacanjamũke, Nĩgetha airĩtu a arũme matarĩ aruu matigakene.
Inyuĩ irĩma cia Giliboa, Mũroaga kũgĩa na ime o na kana mbura ĩmuurĩre, O na kana mĩgũnda ĩkũruta maciaro ma mĩhothi mĩamũre, Tondũ ngo ya arĩa marĩ hinya nĩ ĩthahĩirio kũu, Ngo ya Saulu rĩu ti njitĩrĩrie maguta.
Kuuma thakame-inĩ ya arĩa moragĩtwo, kuuma maguta-inĩ ma arĩa marĩ hinya, Ũta wa Jonathani ndũrahũndũkaga, Na rũhiũ rwa njora rwa Saulu rũtiracokaga rũtahootanĩte.
Saulu na Jonathani mararĩ ende na a bata ũtũũro-inĩ wao, O na gĩkuũ-inĩ matinatigana. Mararĩ na mĩtũkĩ gũkĩra nderi, Na mararĩ na hinya gũkĩra mĩrũthi.
Inyuĩ airĩtu a Isiraeli, cakaĩrai Saulu, O we ũrĩa wamũhumbire nguo ndune na ng’emu, O we ũrĩa wekĩrire mathaga ma thahabu nguo-inĩ cianyu.
Kaĩ arĩa marĩ hinya nĩ magũĩrĩire mbaara-inĩ-ĩ! Jonathani arĩ kũndũ gwaku kũrĩa gũtũũgĩru oragĩtwo!
Ndĩ na kĩeha kĩnene mũno nĩ ũndũ waku Jonathani, mũrũ wa baba; Nĩ ndĩrakwendete mũno. Wendo waku harĩ niĩ ũrarĩ wa magegania gũkĩra wendo wa andũ-anja.
Kaĩ arĩa marĩ hinya nĩ magwĩte Na matharaita ma mbaara magathira-ĩ!”