Samueli wa Mbere 15
Samueli agĩcoka akĩra Saulu ũũ: “Yahweh aandũmire ngũitĩrĩrie maguta ũtuĩke mũthamaki wa gũthamakĩra andũ ake Isiraeli; rĩu thikĩrĩria ũrĩa Yahweh ekuuga
Ũũ nĩguo Yahweh mũnene wa ita ekuuga: ‘Nĩ ngũtuĩra Aamaleki nĩ ũndũ wa ũrĩa meekire andũ a Isiraeli rĩrĩa maareganire nao marĩ njĩra-inĩ makiuma Misiri
Rĩu thiĩ ũtharĩkĩre Aamaleki, na ũmaniine hamwe na kĩrĩa gĩothe marĩ nakĩo. Ndwagĩrĩirũo kũmahonokia; wagĩrĩirũo kũmoraga, mũndũrũme o hamwe na mũtumia, mwana o hamwe na gakenge, ndegwa o hamwe na ng’ondu, ngamĩra o hamwe na ndigiri.’”
Saulu agĩgĩta andũ na akĩmatara marĩ Telaimu: Maarĩ thigari 200,000 cia gũthiĩ na magũrũ na arũme 10,000 a Yahuda.
Saulu agĩthiĩ nginya itũũra rĩa Amaleki na akĩmoheria mũkuru-inĩ
Saulu agĩcoka akĩra Akeeni atĩrĩ: “Thiĩi, eherai kuuma kũrĩ Aamaleki, nĩguo ndikamũniinanĩrie nao. Nĩ gũkorũo inyuĩ nĩũndũ nĩ mwekire ciana cia Isiraeli maũndũ mega hĩndĩ ĩrĩa cioimaga Misiri.” Nĩ ũndũ ũcio Akeeni makĩehera gatagatĩ-inĩ ka Amaleki
Thutha ũcio Saulu akĩũraga Aamaleki kuuma Havila o nginya Shuri, ĩrĩa ĩhakanĩte na Misiri
Akĩnyita Agagi mũthamaki wa Amaleki arĩ muoyo, no andũ acio angĩ othe akĩmaniina na rũhiũ rwa njora
No rĩrĩ, Saulu hamwe na andũ acio makĩhonokia Agagi na nyamũ iria njega biũ cia rũũru rwa mbũri na rwa ng’ondu, rũũru rwa ng’ombe, nyamũ iria norie, ndũrũme, na kĩrĩa gĩothe kĩarĩ kĩega. Matiendaga gũciananga. No indo iria ciothe itaarĩ kĩene na itangĩendeka, nĩcio maanangire.
Nakĩo kiugo kĩa Yahweh gĩgĩkinyĩra Samueli, akĩmwĩra ũũ:
“Nĩ ndĩrerira nĩ ũndũ wa gũtua Saulu mũthamaki, nĩ gũkorũo nĩ atigĩte kũnũmĩrĩra na nĩ agĩte kũhingia ciugo ciakwa.” Samueli agĩkĩigua ũũru mũno, na akĩrĩrĩra Yahweh ũtukũ mũgima
Rĩrĩa Samueli ookĩrire rũcinĩ tene agacemanie na Saulu, Samueli akĩrũo atĩrĩ: “Saulu athiire Karimeli, na ahanda gĩtugĩ kuo nĩ ũndũ wake mwene. Acoka ahũndũka aikũrũka Giligali.”
Rĩrĩa Samueli aakinyire kũrĩ we, Saulu akĩmwĩra ũũ: “Yahweh arokũrathima. Nĩ hingĩtie kiugo kĩa Yahweh.”
No Samueli akĩmũũria atĩrĩ: “Na nĩ mũgambo ũrĩkũ ũcio ndĩraigua matũ-inĩ makwa wa rũũru rwa mbũri na rwa ng’ondu o na mũgambo ũcio ndĩraigua wa ng’ombe?”
Saulu akĩmũcokeria atĩrĩ: “Irarehirũo kuuma kũrĩ Aamaleki, tondũ andũ nĩ marahonokirie nyamũ iria njega biũ cia rũũru rwa mbũri na rwa ng’ondu na rũũru rwa ng’ombe, cia kũrutĩra Yahweh Kĩhoti waku igongona; no nĩ tũranangire kĩrĩa kĩratigarire.”
Nĩ ũndũ ũcio Samueli akĩra Saulu ũũ: “Kinyia hau! Reke ngwĩre ũrĩa Yahweh aranjĩrire hwaĩ.” Agĩkĩmwĩra atĩrĩ: “Njĩĩra!”
Samueli agĩgĩthiĩ na mbere akiuga atĩrĩ: “Na githĩ nduoonaga ta ũtagĩrĩire rĩrĩa watuagwo mũtongoria wa mĩhĩrĩga ya Isiraeli na rĩrĩa Yahweh aagũitĩrĩirie maguta ũtuĩke mũthamaki wa Isiraeli
Thutha-inĩ Yahweh agĩkũhe wĩra agĩkwĩra atĩrĩ, ‘Thiĩ wanange Aamaleki acio ehia. Matharĩkĩre o nginya ũmaniine biũ.’
Nĩ kĩĩ kĩratũmire wage gwathĩkĩra mũgambo wa Yahweh? Ithenya rĩa ũguo, ũrateng’ereire indo cia gũtahwo ũrĩ na ũkoroku na ũreka ũndũ mũũru maitho-inĩ ma Yahweh!”
Ĩndĩ Saulu akĩra Samueli atĩrĩ: “No ndĩragĩathĩkĩire mũgambo wa Yahweh! Nĩ ndĩrathiire ndĩraruta wĩra ũrĩa Yahweh aaheire, ndĩrarehe Agagi mũthamaki wa Amaleki, na ndĩrananga Aamaleki
No andũ nĩ marakuuire ng’ondu na ng’ombe kuuma harĩ indo cia gũtahwo, indo iria irarĩ njega biũ kuuma harĩ iria ciatuĩrĩirũo kwanangwo, nĩguo irutĩrũo Yahweh Kĩhoti waku igongona Giligali.”
Samueli agĩcoka akiuga ũũ: “Hihi Yahweh akenagio nĩ magongona ma njino na maruta gũkĩra gwathĩkĩra mũgambo wa Yahweh? Atĩrĩrĩ, gwathĩka nĩ kwa bata gũkĩra igongona, na gũthikĩrĩria nĩ kwa bata gũkĩra maguta ma ndũrũme;
nĩ gũkorũo ũremi no ũndũ ũmwe na rĩhia rĩa ũragũri, na gwĩka maũndũ na mwĩĩro no ũndũ ũmwe na kũhũthĩra hinya wa ũragũri kana ũhoi mĩhianano. Tondũ nĩ warega kiugo kĩa Yahweh, nake nĩ arega ũkorũo ũrĩ mũthamaki.”
Saulu agĩcoka akĩra Samueli atĩrĩ: “Nĩ njĩhĩtie, nĩ gũkorũo nĩ njagararĩte watho wa Yahweh na ngaagarara ciugo ciaku, tondũ ndĩretigĩrire andũ ndĩrathikĩrĩria ũrĩa maroigaga
Rĩu ndagũthaitha, ndekera mehia makwa, na tũcoke nawe nĩguo ngainamĩrĩre Yahweh.”
No Samueli akĩra Saulu ũũ: “Tũtigũcoka hamwe nawe tondũ nĩ ũregete kiugo kĩa Yahweh, na Yahweh nĩ aregete ũthiĩ na mbere gũkorũo ũrĩ mũthamaki wa Isiraeli.”
Na rĩrĩa Samueli aagarũrũkire nĩguo athiĩ, Saulu akĩnyita ruuno rwa igooti rĩake rĩtarĩ moko, no rĩgĩtarũka
Nĩ ũndũ ũcio Samueli akĩmwĩra atĩrĩ: “Ũmũthĩ Yahweh nĩ atarũra ũthamaki wa Isiraeli kuuma harĩ wee, na nĩ ekũũneana kũrĩ mũndũ ũngĩ mwega gũgũkĩra
Ningĩ, ũrĩa wĩtagwo Hinya-wa-Isiraeli ndegũtuĩka wa maheeni kana ericũkwo, tondũ We ti mũndũ atĩ nĩ ekwĩricũkwo.”
Nĩ ũndũ ũcio akiuga atĩrĩ: “Nĩ njĩhĩtie. No rĩrĩ, ndagũthaitha ũnyonie gĩtĩo mbere ya athuri a andũ akwa na mbere ya andũ a Isiraeli. Nĩ tũcoke nawe, na nĩ ngũinamĩrĩra Yahweh Kĩhoti waku.”
Samueli agĩgĩcoka arũmĩrĩire Saulu, na Saulu akĩinamĩrĩra Yahweh
Nake Samueli akiuga ũũ: “Rehe Agagi mũthamaki wa Amaleki hakuhĩ na niĩ.” Agagi agĩgĩthiĩ kũrĩ we akenete, nĩ gũkorũo Agagi eeĩraga atĩrĩ: ‘Hatarĩ nganja nĩ njehereire ũgwati wa gĩkuũ.’
No Samueli akiuga ũũ: “O ta ũrĩa rũhiũ rwaku rwa njora rũtũmĩte atumia makuĩrũo nĩ ciana, noguo nake maitũguo egũkorũo akuĩrĩirũo o na makĩria ma atumia arĩa angĩ.” Samueli arĩkia kuuga ũguo, agĩtinangia Agagi icunjĩ mbere ya Yahweh kũu Giligali.
Samueli agĩthiĩ Rama, nake Saulu akĩambata agĩthiĩ gwake mũciĩ Gibea ya Saulu
Samueli ndoonire Saulu rĩngĩ nginya mũthenya ũrĩa aakuire, nĩ gũkorũo Samueli nĩ aacakayagĩra Saulu. Na Yahweh akĩĩrira nĩ ũndũ wa gũtua Saulu mũthamaki wa Isiraeli.