Thaburi 132

Rĩu Yahweh, ririkana Daudi Na mĩnyamaro yake yothe;

Ũrĩa eehĩtire harĩ Yahweh, Ũrĩa eehĩtire harĩ Ũrĩa ũrĩ Hinya wa Jakubu akiuga:

“Ndigatonya hema yakwa, nyũmba yakwa. Ndigakoma gĩtanda-inĩ gĩakwa, ũrĩrĩ-inĩ wakwa;

Ndikareka maitho makwa makome, Kana imone ciakwa icũnge

O nginya rĩrĩa ngonera Yahweh handũ, Hekarũ ya Ũrĩa ũrĩ Hinya wa Jakubu.”

Onei, nĩ twaiguire ũhoro warĩo Efiratha; Twarĩkorire mũtitũ-inĩ.

Nĩ tũingĩrei gĩikaro-inĩ gĩake; Nĩ tũinamĩrĩrei gaturũa-inĩ ka magũrũ make.

Arahũka, wee Yahweh, ũũke handũ haku ha kũhurũka, Wee, hamwe na Ithandũkũ rĩa hinya waku.

Athĩnjĩri-Yahweh aku marohumbwo ũthingu, Nao andũ aku arĩa mũiguaine nao magĩkũngũiye nĩ gũkena.

Nĩ ũndũ wa Daudi ndungata yaku, Ndũkahutatĩrie ũrĩa waku mũitĩrĩrie maguta ũthiũ waku.

Yahweh nĩ erĩire Daudi na mwĩhĩtwa na ma; Hatarĩ nganja ndangĩĩricũkwo kiugo gĩake kĩrĩa oigĩte atĩrĩ: “Mũndũ ũmwe wa mũthimo waku, Nĩ ngaamũikarĩria gĩtĩ-inĩ gĩaku kĩa ũnene.

Ariũ aku mangĩtũra mamenyereire kĩrĩkanĩro gĩakwa Na maũira makwa marĩa ndĩmarutaga, Ariũ ao o nao Nĩ magaaikarĩra gĩtĩ gĩaku kĩa ũnene tene na tene.”

Tondũ Yahweh nĩ athuurĩte Zayuni; Nĩkuo erirĩirie gũtuĩke gĩikaro gĩake akoiga ũũ:

“Gũkũ nĩkuo handũ hakwa ha kũhurũka tene na tene; Gũkũ nĩkuo ngũtũũra, tondũ ũndũ ũcio nĩguo ndĩĩrirĩirie.

Nĩ ndĩrĩkũrathimaga mũno na irio; Nĩ ndĩrĩhũnagia athĩni a kuo na mũgate.

Athĩnjĩri-Yahweh a kuo ndĩrĩmahumbaga ũhonokio, Nao andũ a kuo arĩa twĩ ũiguano nao nĩ marĩkũngũyagia nĩ gũkena.

Kũu nĩkuo ngaatũma rũhĩa rwa Daudi rũthundũkĩre. Nĩ haarĩirie tawa nĩ ũndũ wa ũrĩa wakwa mũitĩrĩrie maguta.

Nĩ ngaahumba thũ ciake njono, No thũmbĩ yake ya ũnene ĩrĩa ĩrĩ mũtwe wake nĩ kũgaacĩra ĩkaagaacĩra.”