Thaburi 143

Atĩrĩrĩ Yahweh, igua ihoya rĩakwa; Thikĩrĩria ithaithana rĩakwa rĩa kũhoya ũteithio. Njigua nĩ ũndũ wa wĩhokeku waku. Njokeria ũhoro nĩ ũndu wa ũthingu waku.

Ndũgaciirithie ndungata yaku ũkĩrorereria ũrũngĩrĩru wayo, Tondũ gũtirĩ mũndũ wĩ muoyo ũngĩkorũo arĩ mũrũngĩrĩru mbere yaku.

Nĩ gũkorũo thũ nĩ ĩthingatĩte muoyo wakwa; Ĩhehenjete muoyo wakwa ĩkaũgũithia thĩ tĩri-inĩ. Ĩtũmĩte ndũũre ndĩhithĩte kũndũ nduma-inĩ o ta andũ arĩa maakuire tene.

Na tondũ wa uguo, roho wakwa nĩ mũhooteku Ngoro yakwa igagĩthethereka thĩinĩ wakwa.

Nĩ ndirikanire matukũ ma tene; Ndĩĩcũranagia igũrũ rĩgiĩ mawĩko maku mothe; Nĩ ndĩĩcũranagia na kĩyo ũhoro wa wĩra wa moko maku.

Ndambũrũkĩtie moko makwa kũrĩ wee; Ndariĩ o ta bũrũri mũng’aru ũrĩa ũkũnyoteire. (Sela)

Hiũha ũnjokerie o na ihenya, wee Yahweh; Roho wakwa nĩ ũrahoerera. Ndũkahithe ũthiũ waku kuuma harĩ niĩ, Ndikae gũkorũo ndariĩ ta arĩa maikũrũkaga magatonya irima-inĩ.

Reke njiguage maũndũ maku ma ũtugi rũcinĩ, Nĩ gũkorũo wee nĩwe ndĩhokete. Menyithia njĩra ĩrĩa njagĩrĩirũo kũgera, Tondũ wee nĩwe ndambũrũkĩirie muoyo wakwa ngakũnengera.

Honokia kũrĩ thũ ciakwa, wee Yahweh. Harĩ we nĩho ngwetha mwĩgitio.

Nduta gwĩka wendi waku, Tondũ wee nĩwe Kĩhoti wakwa. Reke roho waku mwega ũndongoragie nginya bũrũri wa arĩa arũngĩrĩru.

Rurumũkia muoyo wakwa, wee Yahweh, nĩ ũndũ wa rĩĩtwa rĩaku. Honokia kuuma harĩ mĩtangĩko, nĩ ũndũ wa ũthingu waku.

Ng'ũria thũ ciakwa nĩ ũndũ wa ũtugi waku; Ananga arĩa othe manyamaragia, Tondũ ndĩ ndungata yaku.