Thaburi 2

Nĩ kĩĩ gĩtũmĩte ndũrĩrĩ itangĩke Na ikundi cia andũ ikang’ung’ua ũndũ wa tũhũ?

Athamaki a thĩ marũgamaga handũ hao Nao anene magacokanĩrĩra hamwe marĩ kĩndũ kĩmwe Nĩguo mokĩrĩre Yahweh na mokĩrĩre ũrĩa wake mũitĩrĩrie maguta.

Moigaga atĩrĩ: “Nĩ tũtuei mĩnyororo yao Na tũte mĩkanda yao!”

Ũrĩa ũikarĩire gĩtĩ kĩa ũnene igũrũ nĩ egũtheka; Yahweh nĩ ekũmanyũrũria.

Hĩndĩ ĩyo akaamaarĩria arĩ na marakara Na atũme metigĩre nĩ ũndũ wa marakara make mahiũ,

Oige ũũ: “Niĩ mwene nĩ nyamũrĩte mũthamaki wakwa Igũrũ rĩa Zayuni, kĩrĩma gĩakwa kĩrĩa kĩamũre.”

Reke menyithanie uuge wa Yahweh; Aanjĩrire atĩrĩ: “Wee ũrĩ mũrũ wakwa; Ũmũthĩ nĩ ndatuĩka thoguo.

Ũngĩhoya, nĩ ngũkũhe ndũrĩrĩ ituĩke igai rĩaku O na ngũhe ituri cia thĩ ituĩke ciaku.

Ũkaamoinanga na mũthĩgi wa kĩgera, Na ũmahehenje ta nyũngũ ya rĩũmba.”

Nĩ ũndũ ũcio, inyuĩ athamaki, onaniai ũtaũku; Ĩtĩkĩrai kũrũngwo, inyuĩ atuanĩri ciira a thĩ.

Tungatĩrai Yahweh mũrĩ na guoya, Na mũcanjamũke o mũkĩinainaga.

Tĩai mũriũ, nĩgetha We ndakarakare Na inyuĩ mũthire mwehere njĩra-inĩ, Tondũ marakara Make marĩrĩmbũkaga na ihenya. Kũrathimwo nĩ arĩa othe moragĩra harĩ We.