Thaburi 22

El wakwa, El wakwa, ũndiganĩirie nĩkĩ? Nĩ kĩĩ gĩtũmĩte ũikare haraya ũkaga kũũhonokia, Ũkaraihĩrĩria kĩrĩro gĩakwa kĩa mĩtangĩko?

Kĩhoti wakwa, ndindaga ngĩgũkaĩra mũthenya, na ndũnjĩtĩkaga; O na ũtukũ ndikiraga.

No wee ũrĩ mwamũre, Ũrigicĩirio nĩ rũgooco rwa Isiraeli.

Maithe maitũ nĩwe meehokete; Nĩ maakwĩhokete, nawe nĩ wamahonokagia.

Nĩwe maakayagĩra, na makahonokio; Maakwĩhokaga, na matiaconorithagio.

No niĩ ndĩ kĩgunyũ ndirĩ mũndũ, Nyũrũragio na nganyararũo nĩ andũ.

Arĩa othe manyonaga nĩ manyũrũragia; Manyiiraga makainia mĩtwe yao marĩ na kĩnyũrũri makoiga atĩrĩ:

“Eeneanire harĩ Yahweh. Reke We amũhonokie! Reke We amũhonokie tondũ nĩ amwendete mũno!”

Wee nĩwe wandutire nda ya maitũ, Na nowe watũmire njigue ndĩ mũgitĩre ndĩ nyondo-inĩ cia maitũ.

Ndaneanirũo harĩ wee ũmenyerere kuuma o ndaciarũo; Kuuma ndĩ o nda ya maitũ, ũkoretwo ũrĩ Kĩhoti wakwa.

Ndũgaikare haraya na niĩ, nĩ gũkorũo thĩna ũrĩ hakuhĩ Na ndirĩ na mũteithia ũngĩ.

Thiũrũrũkĩirio nĩ tũtegwa tũingĩ; Ngarigicĩrio nĩ ndegwa irĩ hinya cia Bashani.

Ciathamagia kanua gothe kũnjerekera, O ta mũrũthi ũrararama ũgĩtambura kĩrĩa wanyita tũcunjĩ tũcunjĩ.

Niĩ njitĩtwo thĩ o ta maĩ; Mahĩndĩ makwa mothe nĩ marekanĩtie. Ngoro yakwa ĩhaanĩte o ta mũhũra; Ĩtwekaga ĩrĩ thĩinĩ wakwa biũ.

Hinya wakwa ũniarĩte o ta gĩcere kĩa nyũngũ; Rũrĩmĩ rwakwa rũnyitanĩte na kĩni gĩakwa; Ũrandwara thĩ rũkũngũ-inĩ rwa gĩkuũ.

Nĩ gũkorũo thiũrũrũkĩirio nĩ ngui; Cindigicĩirie o ta gĩkundi kĩa eki-naĩ, O ta mũrũthi, iratharĩkĩra moko na magũrũ makwa.

Mahĩndĩ makwa mothe no ndĩmatare. Mandoraga na makangũũrĩra maitho.

Magayanaga nguo ciakwa, Na magacukĩra nguo yakwa mĩtĩ.

No wee Yahweh-rĩ, ndũgaikare o haraya. Wee nĩwe hinya wakwa; hiũha ũndeithie.

Honokia kuuma harĩ rũhiũ rwa njora, Ũhonokie muoyo wakwa wa goro kuuma ndwara-inĩ cia ngui;

Honokia kuuma kanua-inĩ ka mũrũthi na kuuma hĩa-inĩ cia ndegwa cia gĩthaka; Njigua na ũũhonokie.

Nĩ ngũmenyithania rĩĩtwa rĩaku kũrĩ ariũ a Ithe witũ; Nĩ ngũkũgooca ndĩ thĩinĩ wa kĩũngano.

Inyuĩ mwĩtigĩrĩte Yahweh, mũgoocei! Inyuothe a mbeũ ya Jakubu, mũkumiei! Inyuothe a mbeũ ya Isiraeli, mwĩtigĩrei.

Nĩ gũkorũo we ndanyararĩte kana akamena mĩnyamaro ya ũrĩa ũrahinyĩrĩrio; Ndamũhithĩte ũthiũ wake. Hĩndĩ ĩrĩa aamũkaĩire akĩhoya ũteithio, nĩ aaiguire.

Nĩ ngũkũgooca ndĩ thĩinĩ wa kĩũngano kĩnene; Nĩ ngũhingia mĩĩhĩtwa yakwa ndĩ mbere ya arĩa mamwĩtigĩrĩte.

Andũ arĩa ahooreri marĩrĩaga na makahũna; Arĩa macaragia Yahweh nĩ marĩmũgoocaga. Mũrokenera ũtũũro tene na tene.

Ituri ciothe cia thĩ nĩ ikaaririkana na irore kũrĩ Yahweh. Mĩhĩrĩga yothe ya ndũrĩrĩ nĩ ĩkaainamĩrĩra mbere yaku.

Nĩ gũkorũo ũthamaki nĩ wa Yahweh; Nĩwe wathaga ndũrĩrĩ.

Andũ arĩa othe magaacĩrĩte thĩinĩ wa thĩ makaarĩa na mainamĩrĩre; Arĩa othe maraikũrũka rũkũngũ-inĩ nĩ magaaturia maru mbere yake; Gũtirĩ o na ũmwe wao ũngĩhota kũhonokia muoyo wake.

Njiarũa ciao nĩ ikaamũtungatĩra; Rũciaro rũrĩa rũgooka nĩ rũkaamenyithio ũhoro wa Yahweh.

Nĩ magooka na maheane ũhoro wa ũthingu wake. Nĩ makeera andũ arĩa matarĩ maraciarũo maũndũ marĩa ekĩte.