Thaburi 33

Kũngũiyai nĩ ũndũ wa Yahweh, inyuĩ andũ arĩa athingu. Nĩ ũndũ mwagĩrĩru harĩ andũ arĩa arũngĩrĩru kũmũgooca.

Gocaai Yahweh mũkĩhũũraga kĩnanda kĩa mũgeto; Mũinĩrei nyĩmbo mũkĩhũũraga kĩnanda kĩgete na kĩrĩa kĩa ndigi ikũmi.

Mũinĩrei rwĩmbo rwerũ; Hũũrai kĩnanda kĩa ndigi mwĩ na ũgereki, mũgĩkenũkaga o gũkenũka

Nĩ gũkorũo kiugo kĩa Yahweh nĩ kĩrũngĩrĩru, Na maũndũ mothe marĩa ekaga nĩ ma kwĩhokeka.

Nĩ endete ũthingu na kĩhooto. Thĩ ĩiyũire ũtugi wa Yahweh o kũiyũra.

Igũrũ rĩombirũo kũgerera kiugo kĩa Yahweh, Na indo ciothe iria irĩ thĩinĩ warĩo ikĩũmbwo kũgerera mũheehũ wa kanua gake.

Acokanagĩrĩria maĩ ma iria kĩhumbu; Namo maĩ marĩa mahũyũkaga akamaiga thitoo.

Thĩ yothe nĩ ĩĩtigĩre Yahweh. Aikari a mabũrũri mothe nĩ mamũhe gĩtĩo kĩnene.

Nĩ gũkorũo we aaririe, na maũndũ marĩa aaririe makĩhinga; Aathanire, na maũndũ marĩa aathanire makĩrũma wega.

Yahweh nĩ athahĩtie njama cia ndũrĩrĩ iria itamwathĩkagĩra; Nĩ aharaganĩtie mĩbango ya irĩndĩ.

No matua ma Yahweh megũtũũra tene na tene; Methugunda ma ngoro yake nĩ ma kuuma njiarũa nginya njiarũa.

Kũrathimwo nĩ rũrĩrĩ rũrĩa Yahweh arĩ we Kĩhoti waruo, Andũ arĩa athuurĩte matuĩke ake.

Yahweh nĩ aroraga thĩ arĩ igũrũ; Nĩ onaga ariũ othe a andũ.

Arĩ kũu gĩikaro-inĩ gĩake-rĩ, Nĩ aroraga arĩa maikaraga thĩinĩ wa thĩ.

Nĩwe ũcongaga ngoro ciao othe; Nĩ athuthuragia mawĩra mao mothe.

Gũtirĩ mũthamaki ũhonokagio nĩ mbũtũ nene; Njamba ndĩngĩĩteithũra nĩ ũndũ tu wa hinya wayo mũnene.

Mbarathi nĩ kĩĩrĩgĩrĩro kĩa maheeni kĩa ũhonokio; Hinya wayo mũnene ti ũũma wa atĩ mũndũ no ahote gwĩthara.

Atĩrĩrĩ, riitho rĩa Yahweh nĩ rĩerekeire harĩ arĩa mamwĩtigĩrĩte, Rĩerekagĩra harĩ andũ arĩa metagĩrĩra ũtugi wake,

Nĩguo aamahonokie kuuma harĩ gĩkuũ Na amatũũrie muoyo hĩndĩ ya ng’aragu.

Ithuĩ twetagĩrĩra Yahweh. Nĩwe ũteithio witũ o na ngo itũ.

Ngoro citũ nĩ ikenaga nĩ ũndũ wake, Tondũ nĩ twĩhokete rĩĩtwa rĩake rĩamũre.

Atĩrĩrĩ Yahweh, ũtugi waku ũroikaraga igũrũ ritũ, O tũgĩthiaga na mbere gũgweterera.