Thaburi 7

Atĩrĩrĩ Yahweh Kĩhoti wakwa, niĩ njũrĩire harĩ wee. Honokia na ũndeithũre kuuma harĩ arĩa othe maranyarira.

Kwaga ũguo, mekũndembũranga tũcunjĩ o ta ũrĩa mũrũthi wĩkaga, Manguue mathiĩ na niĩ hatarĩ na mũndũ wa kũndeithũra.

Wee Yahweh Kĩhoti wakwa, angĩkorũo nĩ hĩtĩtie ũndũ-inĩ ũyũ, Angĩkorũo nĩ njĩkĩte ũndũ ũtarĩ wa kĩhooto,

Angĩkorũo nĩ hĩtĩirie mũndũ ũnjĩkĩte maũndũ mega, Kana ngatunya thũ yakwa indo hatarĩ gĩtũmi-rĩ,

Ndĩrorũmĩrĩrũo nĩ thũ na ĩnginyĩre; Reke ĩrangĩrĩrie muoyo wakwa thĩ Na ĩtũme riri wakwa ũthirĩre rũkũngũ-inĩ. (Sela)

Arahũka ũrĩ na marakara wee Yahweh; Rũgama ũũkĩrĩre mang’ũrĩ ma thũ ciakwa; Arahũka nĩ ũndũ wakwa, na wathane atĩ kĩhooto gĩĩkĩke.

Reke ndũrĩrĩ igũthiũrũrũkĩrie; Nawe nĩ ũkoya ikinya ũciũkĩrĩre ũrĩ igũrũ.

Yahweh nĩ agaatuĩra ikundi cia andũ. Atĩrĩrĩ Yahweh, nduĩra ciira kũringana na ũthingu wakwa Na kũringana na wĩkindĩru wakwa.

Ndagũthaitha ũniine ciĩko njũru cia arĩa aganu. No arĩa athingu ũtũme maikare mehandĩte, Tondũ wee ũrĩ Kĩhoti mũthingu ũrĩa ũthuthuragia ngoro na methugunda ma na thĩinĩ biũ.

Kĩhoti nĩwe ngo yakwa, na nĩwe Mũhonokia wa arĩa arũngĩrĩru ngoro.

Kĩhoti nĩ Mũtuanĩri Ciira mũthingu, Na Kĩhoti nĩ amenyithanagia matuĩro make o mũthenya.

Mũndũ angĩaga kwĩrira, Kĩhoti anooraga rũhiũ rwake rwa njora; Akũnjaga ũta wake na akaũhaarĩria.

Ahaaragĩria matharaita make ma kũrehe gĩkuũ; Na akahaarĩria mĩguĩ yake ĩrĩa yakanaga mwaki.

Ta rora mũndũ ũrĩa ũgĩĩte nda ya waganu; Ohaga nda ya kĩũnũhu na agaciara maheeni.

Enjaga irima na akarĩrikia, No acokaga kũgwa irima-inĩ o rĩu ekwenjete.

Thĩna ũrĩa arehaga ũgaacoka igũrũ rĩa mũtwe wake we mwene; Ũhinya wake ũkaagwa igũrũ rĩa mũtwe wake.

Nĩ ngũgooca Yahweh nĩ ũndũ wa kĩhooto gĩake; Nĩ ngũina nyĩmbo ngooce rĩĩtwa rĩa Yahweh Ũrĩa ũrĩ Igũrũ Mũno.