Thama 34

Yahweh agĩcoka akĩra Musa atĩrĩ: “Icũhia ihengere igĩrĩ cia mahiga ta iria cia mbere, na niĩ nĩ ngwandĩka ihengere-inĩ icio ciugo o ta iria ciarĩ ihengere-inĩ iria cia mbere, iria woragire

Wĩhaarĩrie nĩ ũndũ wa rũcinĩ, tondũ nĩ ũkaambata Kĩrĩma-inĩ gĩa Sinai na ũrũgame mbere yakwa hau igũrũ rĩa kĩrĩma

Na gũtikagĩe mũndũ ũkwambata hamwe nawe, na gũtirĩ mũndũ wagĩrĩire kuoneka handũ o hothe kĩrĩma-inĩ kĩu. O na ng’ondu kana ng’ombe itiagĩrĩire kũrĩithio mbere ya kĩrĩma kĩu.”

Kwoguo Musa agĩicũhia ihengere igĩrĩ cia mahiga o ta iria cia mbere na agĩũkĩra rũcinĩ tene akĩambata Kĩrĩma-inĩ gĩa Sinai, o ta ũrĩa Yahweh aamwathĩte, na agĩkuua ihengere icio igĩrĩ cia mahiga irĩ guoko-inĩ gwake

Nake Yahweh agĩikũrũka arĩ thĩinĩ wa itu na akĩrũgama hakuhĩ nake na akĩanĩrĩra rĩĩtwa rĩa Yahweh

Yahweh akĩhĩtũkĩra mbere yake akĩanagĩrĩra ũũ: “Yahweh, Yahweh, Kĩhoti mũigua tha na mũcayanĩri, ndahiũhaga kũrakara na nĩ aiyũirũo nĩ wendo mwĩhokeku na ũhoro wa ma,

onanagia wendo mwĩhokeku harĩ andũ ngiri nyingĩ, akohanĩra mahĩtia o na mehia, no gũtirĩ hĩndĩ akaga kũherithia ũrĩa wĩhĩtie, aherithagia ariũ o na ariũ a ciana ciao nĩ ũndũ wa mahĩtia ma maithe, o nginya rũciaro rwa gatatũ na rũciaro rwa kana.”

Nake Musa akĩinamĩrĩra o na ihenya na agĩturumithia mũtwe thĩ

Agĩcoka akiuga ũũ: “Rĩu-rĩ, angĩkorũo nĩ njĩtĩkĩrĩkĩte maitho-inĩ maku, wee Yahweh, ndagũthaitha Yahweh ũtwarane hamwe na ithuĩ ũrĩ gatagatĩ-inĩ gaitũ, o na gũtuĩka tũrĩ andũ aremi, ningĩ ũtuohere mahĩtia o na mehia maitũ, o na ũtũtue andũ aku mwene.”

Nake akĩmwĩra atĩrĩ: “Nĩ ngũrĩkanĩra kĩrĩkanĩro hamwe na inyuĩ: Nĩ ngwĩka maũndũ ma magegania mbere ya andũ aku othe, maũndũ matarĩ mekwo rĩngĩ thĩinĩ wa thĩ yothe kana gatagatĩ-inĩ ka ndũrĩrĩ ciothe, na andũ othe arĩa mũtũũraga gatagatĩ-inĩ kao nĩ makoona wĩra wa Yahweh, tondũ nĩ ngwĩka ũndũ wa magegania mũno nĩ ũndũ wanyu.

“Menyagĩrĩrai maũndũ marĩa ndĩramwatha ũmũthĩ. Nĩ ngũingata Aamori, Akanaani, Ahiti, Aperizi, Ahivi, na Ajebusi mehere mbere yanyu

Menyererai gũkaagĩa na kĩrĩkanĩro hamwe na aikari a bũrũri ũrĩa mũrathiĩ, tondũ ũndũ ũcio no ũtuĩke mũtego harĩ inyuĩ

No nĩ mũgaatharia igongona ciao, mwanange itugĩ ciao cia kũhoywo, na mũtemange mĩtĩ yao ya kũhoywo

Mũtikanainamĩrĩre ihoti ĩngĩ, nĩ gũkorũo Yahweh nĩ oĩkaine atĩ endaga wĩrutĩri wa ngoro yothe. We nĩ Kĩhoti wendaga wĩrutĩri wa ngoro yothe

Menyererai gũkaagĩa na kĩrĩkanĩro hamwe na aikari a bũrũri ũrĩa mũrathiĩ, tondũ hĩndĩ ĩrĩa mekũhũũra ũmaraya na ihoti ciao na magacirutĩra magongona, nĩ mũrĩnyitwo ũgeni nĩ mũndũ na mũrĩe indo iria arutĩte igongona

Ningĩ hatarĩ nganja nĩ mũkoya airĩtu amwe ao nĩguo mahikio nĩ ariũ anyu, na airĩtu acio ao nĩ makaahũũra ũmaraya na ihoti ciao na matũme ariũ anyu mahũũre ũmaraya na ihoti ciao.

“Mũtikanatwekie cuma nĩguo mũthondeke ihoti nayo.

“Nĩ mwagĩrĩirũo gũkũngũyagĩra Gĩathĩ kĩa Mĩgate Ĩtarĩ Mĩimbie. Mũrĩrĩaga mĩgate ĩtarĩ mĩkĩre ndawa ya kũimbia, o ta ũrĩa ndĩmwathĩte; mwĩkage ũguo thikũ mũgwanja ihinda-inĩ rĩrĩa rĩtuĩtwo rĩa mweri wa Abibu, tondũ mweri-inĩ ũcio wa Abibu nĩguo mwoimire Misiri.

“Mwana o wothe wa kahĩĩ wa irigithathi nĩ wakwa, o na nyamũ ya njamba ya irigithathi harĩ mahiũ maku mothe, o na angĩkorũo nĩ irigithathi rĩa ndegwa kana rĩa ng’ondu

Irigithathi rĩa ndigiri no mũhaka mũkaarĩkũũraga na ng’ondu ĩmwe. No mũngĩaga kũrĩkũũra, no mũhaka mũkariuna ngingo. Mwana o wothe wa kahĩĩ wa irigithathi harĩ ariũ anyu no mũhaka mũrĩmũkũũraga. Gũtirĩ mũndũ wagĩrĩirũo gũka mbere yakwa moko matheri.

“Mũrĩrutaga wĩra thikũ ithathatũ, no mũthenya wa mũgwanja mũkahurũka. Nginya hĩndĩ ya kũrĩma na hĩndĩ ya magetha, nĩ mũrĩhurũkaga.

“Na nĩ mũrĩkũngũyagĩra Gĩathĩ gĩa Ciumia na maciaro ma mbere ma magetha ma ngano, na mwaka ũgĩthira mũgakũngũĩra Gĩathĩ gĩa Gũcokanĩrĩria.

“O mwaka maita matatũ, arũme othe gatagatĩ-inĩ kanyu nĩ marĩthiaga mbere ya Yahweh, Kĩhoti ũrĩa wa ma, o we Kĩhoti wa Isiraeli

Nĩ gũkorũo nĩ ngũingata ndũrĩrĩ ciehere mbere yanyu, na nĩ ngwaramia mĩhaka ya bũrũri wanyu, na gũtirĩ mũndũ ũrĩĩriragĩria bũrũri wanyu hĩndĩ ĩyo mũrĩkoragwo mũgĩthiĩ mbere ya Yahweh Kĩhoti wanyu maita matatũ o mwaka.

“Ndũkanarute thakame ya igongona rĩakwa hamwe na kĩndũ gĩĩkĩrĩtwo ndawa ya kũimbia. Igongona rĩa gĩathĩ kĩa Bathaka rĩtiagĩrĩire kũrekagwo rĩraare rĩkinyie rũcinĩ.

“Kĩndũ kĩrĩa kĩega biũ kĩa maciaro ma mbere ma tĩri waku ũrĩgĩtwaraga nyũmba-inĩ ya Yahweh Kĩhoti waku. “Ndũkanatherũkie kori iria-inĩ rĩa nyina.”

Yahweh agĩcoka akĩra Musa atĩrĩ: “Andĩka ciugo icio, tondũ kũringana na ciugo icio, nĩ ngũrĩkanĩra kĩrĩkanĩro nawe na hamwe na Isiraeli.”

Na agĩikara kũu hamwe na Yahweh thikũ 40 ũtukũ na mũthenya. Ndaarĩire kĩndũ kana akĩnyua maĩ. Nake akĩandĩka ihengere-inĩ icio ciugo cia kĩrĩkanĩro, nĩcio Maathani Marĩa Ikũmi.

Musa agĩcoka agĩikũrũka kuuma Kĩrĩma-inĩ gĩa Sinai, na ihengere icio igĩrĩ cia Ũira ciarĩ guoko-inĩ gwake. Hĩndĩ ĩyo Musa aaikũrũkaga kuuma kĩrĩma-inĩ, ndaamenyaga atĩ ngothi ya ũthiũ wake nĩ yakengaga tondũ nĩ aakoretwo akĩaria na Yahweh

Rĩrĩa Haruni na Aisiraeli othe moonire Musa, makĩona atĩ ngothi ya ũthiũ wake nĩ yakengaga, na magĩĩtigĩra kũmũkuhĩrĩria.

No Musa akĩmeta, nao Haruni na atongoria othe a kĩrĩndĩ kĩu magĩthiĩ harĩ we, na Musa akĩmaarĩria

Thutha ũcio Aisiraeli othe magĩthiĩ hakuhĩ nake, nake akĩmahe maathani mothe marĩa Yahweh aamũheete arĩ Kĩrĩma-inĩ gĩa Sinai

Musa aarĩkia kwaria nao, eehumbagĩra ũthiũ na taama

No hĩndĩ ĩrĩa Musa atonya mbere ya Yahweh kwaria nake, aarutaga taama ũcio o nginya rĩrĩa ariuma. Thutha ũcio agĩthiĩ na akĩguũrĩria Aisiraeli maathani marĩa aaheetwo

Nao Aisiraeli makĩona atĩ ngothi ya ũthiũ wa Musa nĩ yakengaga; nake Musa agĩcokia taama ũthiũ o nginya rĩrĩa aathiire kwaria na Yahweh.