Thama 36

“Bezaleli mekũruta wĩra hamwe na Oholiabu na mũndũ wothe ũrĩ na ũũgĩ, ũrĩa Yahweh aheete ũũgĩ na ũtaũku wa kũmenya kũruta wĩra wothe wa ũtungata mwamũre o ta ũrĩa Yahweh athanĩte.”

Musa agĩcoka agĩta Bezaleli na Oholiabu o hamwe na mũndũ wothe warĩ na ũũgĩ, ũrĩa Yahweh eekĩrĩte ũũgĩ ngoro-inĩ yake, mũndũ wothe ngoro yake yamũtindĩkire kũruta wĩra ũcio eyendeire

Nao makĩoya kuuma kũrĩ Musa mĩhothi yothe ĩrĩa Aisiraeli maarehete nĩ ũndũ wa wĩra wa ũtungata mwamũre. O na kũrĩ ũguo, Aisiraeli magĩthiĩ o na mbere kũmũtwarĩra magongona ma kwĩyendera, rũcinĩ o rũcinĩ.

Na rĩrĩa maambĩrĩirie wĩra ũcio mwamũre, andũ arĩa othe maarĩ na ũũgĩ wa kũruta wĩra makĩambĩrĩria gũka ũmwe thutha wa ũrĩa ũngĩ,

na makĩra Musa atĩrĩ: “Andũ nĩ mararehe indo nyingĩ makĩria ma iria irabatarania wĩra-inĩ ũrĩa Yahweh athanĩte ũrutwo.”

Nĩ ũndũ ũcio Musa agĩathana atĩ andũ kambĩ-inĩ yothe merũo ũũ: “Arũme o na atumia, tigai kũrehe indo ingĩ cia mũhothi mwamũre.” Kwoguo andũ makĩgirio gũtwara indo ingĩ makĩria

Indo icio ciarĩ njiganu cia kũruta wĩra wothe ũrĩa wabataraga kũrutwo, o na igakĩra.

Nĩ ũndũ ũcio, andũ acio othe maarĩ na ũũgĩ wa kũruta wĩra magĩthondeka gĩikaro kĩu kĩamũre makĩhũthĩra itambaya ikũmi cia hema cia gatani yogothetwo wega, ndigi cia rangi wa mburuu, cia rangi wa papũ, na cia rangi mũtune; nao magĩcigemia na mĩcoro ya akerubi

O gĩtambaya kĩa hema kĩarĩ na ũraihu wa mĩkono 28 na wariĩ wa mĩkono 4. Itambaya icio ciothe cia hema nĩ ciaiganaine

Magĩcoka makĩnyitithania itambaya ithano hamwe, nacio itambaya icio ingĩ ithano magĩcinyitithania hamwe

Thutha ũcio magĩthondeka ikundo irĩ na tũrima na rũrigi rwa rangi wa mburuu mũthia-inĩ wa gĩtambaya kĩa mũico gĩtambaya-inĩ kĩmwe kĩnene harĩa ikũnyitithanĩrio. Na magĩka o ta ũguo mũthia-inĩ wa gĩtambaya kĩu kĩngĩ kĩnene harĩa ikũnyitithanĩrio

Magĩthondeka ikundo 50 irĩ na tũrima gĩtambaya-inĩ kĩmwe kĩa hema na ikundo 50 irĩ na tũrima mũthia-inĩ wa gĩtambaya kĩu kĩngĩ kĩa hema harĩa ikũnyitithanĩrio nĩguo ikundo icio irĩ na tũrima ikorũo iroranĩte

Magĩcoka magĩthondeka ngathĩka 50 cia thahabu na makĩnyitithania itambaya icio na ngathĩka icio, nakĩo gĩikaro kĩu kĩamũre gĩgĩtuĩka kĩndũ kĩmwe.

Ningĩ magĩthondeka itambaya cia hema cia guoya wa mbũri cia kũhumbĩra gĩikaro kĩu kĩamũre. Magĩthondeka itambaya 11

O gĩtambaya kĩa hema kĩarĩ na ũraihu wa mĩkono 30 na wariĩ wa mĩkono 4. Itambaya icio 11 nĩ ciaiganaine

Magĩcoka makĩnyitithania itambaya ithano hamwe, na makĩnyitithania itambaya icio ingĩ ithathatũ hamwe

Ningĩ magĩthondeka ikundo 50 irĩ na tũrima mũthia-inĩ wa gĩtambaya kĩa mũico gĩtambaya-inĩ kĩmwe kĩnene harĩa ikũnyitithanĩrio, na ikundo 50 irĩ na tũrima mũthia-inĩ wa gĩtambaya kĩu kĩngĩ harĩa ikũnyitithanĩrio

Magĩcoka magĩthondeka ngathĩka 50 cia gĩcango cia kũnyitithania hema ĩyo nĩguo ĩtuĩke kĩndũ kĩmwe.

Ningĩ magĩthondeka kĩandarũa kĩa njũũa cia ndũrũme ihakĩtwo rangi mũtune gĩa kũhumbĩra hema ĩyo na kĩandarũa kĩa njũũa cia sili gĩa kũigĩrĩrũo igũrũ rĩa kĩu kĩngĩ.

Ningĩ magĩthondeka buremu irũgamĩte cia gĩikaro kĩu kĩamũre makĩhũthĩra mbaũ cia mũgaa

O buremu yarĩ na ũraihu wa mĩkono ikũmi na wariĩ wa mũkono ũmwe na nuthu

Na o buremu yarĩ na tũng’ote twĩrĩ tũnyitithanĩtio. Ũguo nĩguo maathondekire buremu ciothe cia gĩikaro kĩu kĩamũre

Kwoguo magĩthondeka buremu cia mwena wa mũhuro wa gĩikaro kĩu kĩamũre, buremu 20, mwena ũrĩa ũrorete mũhuro

Ningĩ magĩthondeka makinya 40 ma betha ma kũigĩrĩrũo buremu icio 20, makinya merĩ rungu rwa buremu ĩmwe ma kũharũkio tũng’ote twayo twĩrĩ na makinya merĩ rungu rwa o buremu harĩ iria ciarũmĩrĩire ma kũharũkio tũng’ote twayo twĩrĩ

Naguo mwena wa rũgongo wa gĩikaro kĩu kĩamũre, magĩthondeka buremu 20:

na makinya ma cio 40 ma betha, makinya merĩ rungu rwa buremu ĩmwe na makinya merĩ rungu rwa o buremu harĩ icio ingĩ.

Na thutha wa gĩikaro kĩu kĩamũre mwena wa ithũĩro, magĩthondeka buremu ithathatũ

Na magĩthondeka buremu igĩrĩ irĩ itugĩ cia kona cierĩ cia mwena wa thutha wa gĩikaro kĩu kĩamũre

Itugĩ icio ciathondekirũo irĩ icunjĩ igĩrĩ kuuma thĩ nginya igũrũ, o nginya gĩcũhĩ-inĩ kĩa mbere. Ũguo nĩguo maathondekire itugĩ icio igĩrĩ cia kona

Kwoguo igĩkorũo irĩ buremu inyanya na makinya ma cio 16 ma betha, makinya merĩ rungu rwa o buremu.

Ningĩ magĩthondeka mĩgamba makĩhũthĩra mbaũ cia mũgaa, mĩgamba ĩtano ya kũnyita buremu cia mwena ũmwe wa gĩikaro kĩu kĩamũre

Na mĩgamba ĩtano ya kũnyita buremu cia mwena ũcio ũngĩ wa gĩikaro kĩu kĩamũre, na ĩngĩ ĩtano ya kũnyita buremu cia mwena wa na thutha wa gĩikaro kĩu, mwena wa ithũĩro

Magĩthondeka mũgamba wa gatagatĩ wa gũkĩrania gatagatĩ ka buremu icio kuuma mũico ũmwe nginya ũrĩa ũngĩ

Makĩhumbĩra buremu icio na thahabu, na magĩthondeka icũhĩ cia thahabu cia kũharũkio mĩgamba ĩyo, na makĩhumbĩra mĩgamba ĩyo na thahabu.

Ningĩ magĩthondeka gĩtaama na ndigi cia rangi wa mburuu, cia rangi wa papũ, cia rangi mũtune, na gatani yogothetwo wega. Magĩkĩgemia na mĩcoro ya akerubi

Magĩcoka magĩthondekera gĩtaama kĩu itugĩ inya cia mũtĩ wa mũgaa na magĩcihumbĩra na thahabu, o hamwe na tũhocio twa thahabu, na magĩtwekia betha magĩthondeka makinya mana ma kũigĩrĩrũo itugĩ icio

Magĩcoka magĩthondeka mbathia ya mũromo wa hema ĩyo na ndigi cia rangi wa mburuu, cia rangi wa papũ, cia rangi mũtune, na gatani yogothetwo wega itumanĩirio hamwe,

o hamwe na itugĩ ithano ciayo na tũhocio twacio. Magĩcihumbĩra na thahabu tũcũmbĩrĩ-inĩ twacio o hamwe na tũcũhĩ twacio twa kũnyitithania, no makinya ma cio matano maarĩ ma gĩcango.