Thama 40

Yahweh agĩcoka akĩra Musa ũũ:

“Mũthenya wa mbere wa mweri wa mbere, nĩguo ũgaaka gĩikaro kĩu kĩamũre, o kĩo hema ya gũtũnganwo

Na ũige ithandũkũ rĩa Ũira thĩinĩ wakĩo, ũcoke wĩkĩre gĩtaama gĩa kũrĩthiĩka

Ũcoke ũingĩrie metha na ũbange indo ciayo na ũingĩrie mũtĩ wa kũigĩrĩrũo matawa na wakie matawa maguo

Ũcoke ũige kĩgongona gĩa thahabu gĩa gũcinĩra ũbumba mbere ya ithandũkũ rĩa Ũira na wĩkĩre mbathia ya mũromo wa gĩikaro kĩu kĩamũre.

“Ningĩ ũige kĩgongona gĩa kũrutĩra igongona rĩa njino mbere ya mũromo wa gĩikaro kĩu kĩamũre, o kĩo hema ya gũtũnganwo,

na ũige kĩraĩ gatagatĩ ka hema ya gũtũnganwo na kĩgongona kĩu na ũgĩkĩre maĩ

Ũcoke ũthondeke nja ĩthiũrũrũkĩrie gĩikaro kĩu kĩamũre na wĩkĩre mbathia ya mũromo wa nja ĩyo

Ningĩ woe maguta ma gũitanĩrĩrio ũitĩrĩrie gĩikaro kĩu kĩamũre na indo ciothe iria irĩ thĩinĩ wakĩo, na ũgĩtherie o hamwe na indo ciakĩo ciothe, nĩgetha gĩtuĩke kĩndũ kĩamũre

O nakĩo kĩgongona gĩa kũrutĩra igongona rĩa njino ũgĩitĩrĩrie maguta hamwe na indo ciakĩo ciothe na ũtherie kĩgongona kĩu, nĩgetha gĩtuĩke kĩgongona kĩamũre mũno

Na ũitĩrĩrie kĩraĩ maguta hamwe na handũ hakĩo ha gũkĩigĩrĩra na ũkĩamũre.

“Ningĩ ũrehe Haruni na ariũ ake mũromo-inĩ wa hema ya gũtũnganwo, na ũmathambie na maĩ

Na ũhumbe Haruni nguo iria nyamũre na ũmũitĩrĩrie maguta na ũmwamũre, nĩguo andungatagĩre arĩ mũthĩnjĩri-Yahweh

Thutha ũcio ũrehe ariũ ake, na ũmahumbe kanjũ

Ũmaitĩrĩrie maguta o ta ũrĩa ũgũitĩrĩria ithe wao, nĩguo mandungatagĩre marĩ athĩnjĩri-Yahweh, naguo ũhoro ũcio wao wa gũitĩrĩrio maguta nĩguo ũgũtũma matungatage marĩ athĩnjĩri-Yahweh njiarũa-inĩ ciao.”

Musa agĩka ũrĩa wothe Yahweh aamwathĩte. Ũguo noguo eekire.

Na rĩrĩ, gĩikaro kĩu kĩamũre gĩgĩakwo mweri wa mbere, mwaka wa kerĩ, mũthenya wa mbere wa mweri ũcio

Rĩrĩa Musa aakire gĩikaro kĩu kĩamũre, aaigire makinya makĩo thĩ, akĩigĩrĩra buremu, akĩharũkia mĩgamba yakĩo, na akĩrũgamia itugĩ ciakĩo

Agĩtambũrũkia hema igũrũ wa gĩikaro kĩu kĩamũre agĩcoka akĩigĩrĩra kĩandarũa gĩa kũhumbĩra hema igũrũ rĩayo, o ta ũrĩa Yahweh aamwathĩte.

Thutha ũcio akĩoya Ũira akĩwĩkĩra thĩinĩ wa Ithandũkũ na akĩharũkia mĩtĩ Ithandũkũ-inĩ rĩu na akĩigĩrĩra gĩkunĩko Ithandũkũ-inĩ

Akĩingĩria Ithandũkũ rĩu thĩinĩ wa gĩikaro kĩu kĩamũre na agĩĩkĩra gĩtaama gĩa kũhakania gĩgĩthiĩka ithandũkũ rĩa Ũira, o ta ũrĩa Yahweh aathĩte Musa.

Agĩcoka akĩiga metha thĩinĩ wa hema ya gũtũnganwo mwena wa rũgongo wa gĩikaro kĩu kĩamũre, mwena wa na nja wa gĩtaama kĩu,

na akĩbanga mĩgate igũrũ rĩayo mbere ya Yahweh, o ta ũrĩa Yahweh aathĩte Musa.

Akĩiga mũtĩ wa kũigĩrĩrũo matawa thĩinĩ wa hema ya gũtũnganwo mbere ya metha ĩyo, mwena wa mũhuro wa gĩikaro kĩu kĩamũre

Agĩakia matawa mbere ya Yahweh, o ta ũrĩa Yahweh aathĩte Musa.

Agĩcoka akĩiga kĩgongona gĩa thahabu thĩinĩ wa hema ya gũtũnganwo mbere ya gĩtaama,

nĩgetha gĩcinagĩrũo ũbumba ũranunga wega, o ta ũrĩa Yahweh aathĩte Musa.

Agĩcoka agĩĩkĩra mbathia ya mũromo wa gĩikaro kĩu kĩamũre.

Ningĩ akĩiga kĩgongona gĩa kũrutĩra igongona rĩa njino mũromo-inĩ wa gĩikaro kĩu kĩamũre, o kĩo hema ya gũtũnganwo, nĩgetha arutagĩre igongona rĩa njino na igongona rĩa mũtu igũrũ rĩakĩo, o ta ũrĩa Yahweh aathĩte Musa.

Agĩcoka akĩiga kĩraĩ gatagatĩ ka hema ya gũtũnganwo na kĩgongona kĩu na agĩgĩkĩra maĩ ma gwĩthamba

Musa na Haruni na ariũ ake meethambagĩra moko na magũrũ ho

Hĩndĩ ciothe rĩrĩa megũtonya thĩinĩ wa hema ya gũtũnganwo kana megũkuhĩrĩria kĩgongona kĩu, nĩ meethambaga o ta ũrĩa Yahweh aathĩte Musa.

Thutha ũcio agĩaka nja ĩrĩa yathiũrũrũkĩirie gĩikaro kĩu kĩamũre na kĩgongona na agĩĩkĩra mbathia ya mũromo wa nja ĩyo.

Na itu rĩkĩambĩrĩria kũhumbĩra hema ĩyo ya gũtũnganwo, naguo riri wa Yahweh ũkĩiyũra gĩikaro kĩu kĩamũre

Musa ndaahotire kũingĩra thĩinĩ wa hema ĩyo ya gũtũnganwo tondũ itu rĩu rĩaikarĩte igũrũ wayo, naguo riri wa Yahweh waiyũrĩte gĩikaro kĩu kĩamũre.

Na rĩrĩa itu rĩu rĩehera igũrũ wa gĩikaro kĩu kĩamũre, Aisiraeli magathiĩ na mbere na rũgendo, na ũguo nĩguo meekaga ng’endo-inĩ ciao ciothe

No rĩrĩ, itu rĩu rĩaga kwehera, matiathiaga na mbere na rũgendo nginya rĩrĩa rĩkeehera

Nĩ gũkorũo itu rĩa Yahweh rĩakoragwo igũrũ wa gĩikaro kĩu kĩamũre mũthenya, na mwaki ũgakorũo igũrũ wakĩo ũtukũ, na andũ othe a nyũmba ya Isiraeli nĩ moonaga ũndũ ũcio ng’endo-inĩ ciao ciothe.