Yahuda 1
Nĩ niĩ Yahuda, ndungata ya Yahshua Messiya, na mũrũ wa nyina na Jakubu, Ndĩraandĩkĩra arĩa metĩtwo, o arĩa mendetwo nĩ Yahweh Ithe, na makamenyagĩrĩrwo nĩ Yahshua Messiya:
Mũroingĩhĩrwo nĩ tha, na thayũ, o na wendani.
Arata akwa endwa, o na gũtuĩka nĩ ndĩrendete mũno kũmwandĩkĩra ũhoro wa ũhonokio ũrĩa tũgwatanĩire na inyuĩ-rĩ, nĩ ndĩronire kwagĩrĩire ndĩmwandĩkĩre nĩguo ndĩmũringĩrĩrie mũrũagĩrĩre wĩtĩkio ũrĩa wehokeirwo andũ arĩa aamũre ihinda rĩmwe rĩa kũigana.
Nĩgũkorwo andũ amwe arĩa ũhoro wao wa gũtuĩrwo cira waandĩkĩtwo o tene nĩ metonyereirie na hitho thĩinĩ wanyu. Acio nĩ andũ matetigagĩra Yahweh, na nĩ magarũraga Wega wa Yahweh witũ ũtuĩke wa kũmetĩkĩria kũhũra ũmaraya, na magakaanaga Yahshua Messiya, o we wiki Mwathi na Kĩhoti witũ.
O na mwakorwo nĩ mũmenyete ũhoro ũyũ wothe-rĩ, nĩ ngwenda kũmũririkania atĩ Yahweh nĩ akũũrire andũ ake akĩmaruta bũrũri wa Misiri, no thutha-inĩ akĩnina arĩa matetĩkĩtie.
Nao araika arĩa maaregire gũkindĩria wathani-inĩ wao na magĩtiganĩria kũndũ kwao gwa gũtũũra-rĩ, acio nĩ amahingĩire nduma-inĩ, nao moheetwo na mĩnyororo ya tene na tene metereirio ituĩro rĩa cira wa Mũthenya ũrĩa mũnene.
Ningĩ o ũndũ ũmwe nao, Sodomu, na Gomora, na matũũra marĩa maariganĩtie nĩ meneanire harĩ ũmaraya na waganu wa mwĩrĩ ũtarĩ wa ndũire. Acio nĩo maatuĩkire kĩonereria kĩa arĩa maherithagio na mwaki wa tene na tene.
O na ningĩ noguo, aroti acio mathũkagia mĩĩrĩ yao ene, na makaregana na wathani, na magacambagia ciũmbe cia kũu igũrũ
No rĩrĩ, o na Mikaeli, mũraika ũrĩa mũnene, hĩndĩ ĩrĩa maakararanagĩria mwĩrĩ wa Musa na ũrĩa mũũru-rĩ, ndaigana kũgeria kũmũcambia, no oigire atĩrĩ, “Yahweh arogũkaania!”
No andũ acio-rĩ, marumaga maũndũ mothe marĩa matahotaga kũmenya; namo maũndũ marĩa mamenyete na ũndũ wa mũciarĩre, ta nyamũ iria iteciragia-rĩ, maũndũ macio nĩmo meninaga namo.
Kaĩ makĩrĩ na haaro-ĩ! Marũmĩrĩire njĩra ya Kaini; ningĩ magetonyia na ihenya ihĩtia-inĩ rĩa Balamu nĩguo mone uumithio; o na makĩninwo ũremi-inĩ wa gũũkĩrĩra wathani ta Kora.
Andũ acio nĩ imeni rĩrĩa megũũka maruga-inĩ manyu ma Wendani, makarĩanĩra na inyuĩ mategwĩtigĩra o na atĩa. Nĩ arĩithi arĩa merĩithagia o ene. Mahaana ta matu matarĩ na mbura, makĩhurutwo nĩ rũhuho; o na ningĩ mahaana ta mĩtĩ ĩtarĩ na matunda hĩndĩ ya kĩmera, ĩmunyĩĩtwo na mĩri ĩkoma biũ.
Mahaana ta makũmbĩ ma iria marĩa matangĩgirĩrĩka, makĩhũyũkaga ciĩko ciao cia thoni ta mũhũyũ; ningĩ matariĩ ta njata ciũrũraga, iria ciigĩirwo nduma ĩrĩa ndumanu mũno nginya tene.
Enoku, ũrĩa wa rũciaro rwa mũgwanja kuuma harĩ Adamu, nĩ arathire ũhoro ũkoniĩ andũ acio akiuga ũũ: “Onei! Yahweh nĩ aroka arĩ na andũ ake arĩa aamũre ngiri na ngiri
nĩguo atuĩre o mũndũ cira, na aiguithie kĩhooto andũ othe arĩa matetigĩrĩte Yahweh, nĩ ũndũ wa ciĩko ciothe cia kũremera Yahweh, iria maaneka mategwĩtigĩra Yahweh, o na nĩ ũndũ wa ciugo ciothe njũru iria ehia arĩa matamwĩtigĩrĩte manaaria cia gũũkĩrĩra Yahweh.”
Andũ aya nĩ angʼongʼori, na a gũcarĩria andũ arĩa angĩ mahĩtia; marũmagĩrĩra merirĩria mao moru; nĩ megathaga o ene, na makahenagĩrĩria andũ arĩa angĩ, nĩguo megune o ene.
No rĩrĩ, inyuĩ arata akwa endwa, ririkanai ũrĩa atũmwo a Mwathi witũ Yahshua Messiya maamwĩrire o mbere
Maamwĩrire atĩrĩ, “Mahinda ma kũrigĩrĩria-rĩ, nĩ gũkagĩa na anyũrũrania arĩa makarũmagĩrĩra merirĩria mao ene matarĩ ma gwĩtigĩra Yahweh.”
Acio nĩo andũ arĩa mamwamũranagia, arĩa marũmagĩrĩra merirĩria ma mwĩrĩ, no matirĩ na Roho.
No inyuĩ arata akwa endwa, ikaragai mũkĩongererekaga hinya thĩinĩ wa wĩtĩkio wanyu ũrĩa Mwamũre mũno na mũhoyage mũrĩ thĩinĩ wa Roho Mwamũre
Ikaragai thĩinĩ wa Wendani wa Yahweh mũgĩetagĩrĩra tha cia Mwathi witũ Yahshua Messiya nĩguo ikaamũkinyia muoyo-inĩ wa tene na tene.
Cayagĩrai andũ arĩa marĩ na mathangania,
tharai arĩa angĩ kuuma mwaki-inĩ mũmahonokie; arĩa angĩ-rĩ, maiguĩrei tha, mũrĩ na guoya, na mũgĩthũũraga o na nguo ciao iria ciĩkĩrĩtwo maroro nĩ mwĩrĩ mũthahie.
Na rĩu, kũrĩ ũrĩa ũngĩhota kũmũgitĩra mũtikagũe, na kũmũrũgamia mbere ya ũthiũ wake ũrĩa wĩ riri mũtarĩ na ũũgũ, na mũrĩ na gĩkeno kĩnene:
Yahweh we wiki Mũhonokia witũ arogĩa na riri, na ũkaru, na hinya, o na wathani, thĩinĩ wa Yahshua Messiya Mwathi witũ, o kuuma kĩambĩrĩria, o na rĩu, na nginya tene na tene! Amein.