Aefeso 1

Nĩ niĩ Saũlũ, mũtũmwo wa Messiya Yahshua kũgerera wendi wa Yahweh, kũrĩ arĩa aamũre thĩinĩ wa Efeso, o acio ehokeku marĩ na ũiguano na Messiya Yahshua:

Mũrogĩa na ũtugi mũnene na thayũ kuuma kũrĩ Yahweh Ithe witũ, na Mwathi Yahshua Messiya.

Yahweh na Ithe wa Mwathi witũ Yahshua Messiya arorathimwo, nĩ gũkorũo nĩ atũrathimĩte na kĩrathimo gĩothe gĩa kĩĩroho kũrĩa igũrũ tũrĩ na ũiguano na Messiya,

ta ũrĩa aatũthurire tũkoragwo na ũiguano hamwe nake mbere ya kĩambĩrĩria gĩa thĩ, nĩguo tũtuĩke aamũre na tũikarage tũtarĩ na kameni mbere yake thĩinĩ wa wendo.

Nĩ gũkorũo nĩ aatuĩte o mbere tũtuwo ariũ ake mwene kũgerera Yahshua Messiya, kũringana na ũrĩa oonire arĩ wega na kũringana na wendi wake,

nĩgetha ũtugi wake mũnene ũrĩa ũrĩ riri ũgoocagwo, o ũcio aatũheire na ũtugi kũgerera mũrũ wake ũrĩa endete.

Kũgerera harĩ we nĩ tũrekagĩrĩrio na njĩra ya ũkũũri kũgerera thakame yake, tũkoherũo mehia maitũ, kũringana na ũtonga wa ũtugi wake mũnene.

Aatũmire ũtugi ũcio mũnene ũingĩhe harĩ ithuĩ ũhoro-inĩ wĩgiĩ ũũgĩ wothe na ũtaũku

na njĩra ya gũtũmenyithia hitho ĩrĩa nyamũre ĩgiĩ wendi wake. Kũringana na ũrĩa oonire arĩ wega, we mwene nĩ aatuire

kũgĩe na ũrũgamĩrĩri mũthia-inĩ wa mahinda marĩa matuĩtwo, nĩguo acokanĩrĩrie indo ciothe thĩinĩ wa Messiya, indo iria irĩ igũrũ na iria irĩ gũkũ thĩ. Thĩinĩ wake,

o we tũrĩ na ũiguano na tũgatuwo agai hamwe nake, tũthurĩtwo o mbere kũringana na muoroto wa ũrĩa ũhingagia maũndũ mothe o ta ũrĩa atuaga kũringana na wendi wake,

nĩgetha ithuĩ arĩa a mbere kũgĩa na kĩĩrĩgĩrĩro thĩinĩ wa Messiya tũtũmage riri wake ũgoocagwo.

No o na inyuĩ nĩ mwagĩire na kĩĩrĩgĩrĩro harĩ we thutha wa kũigua kiugo kĩa ũhoro wa ma, ũhoro ũrĩa mwega wa ũhonokio wanyu. Rĩrĩa mwetĩkirie, nĩ mwekĩrirũo mũhũri kũgerera we na Roho Mwamũre ũrĩa mwerĩirũo,

ũrĩa ũtũheaga ũũma o mbere wĩgiĩ igai riitũ, nĩ ũndũ wa kũrekereria kĩndũ kĩa Yahweh we mwene kũgerera ũkũũri, nĩgetha agĩe rũgooco rũrĩ na riri.

Na nĩkĩo o na niĩ, tondũ nĩ njiguĩte ũhoro wĩgiĩ wĩtĩkio ũrĩa mũkoragwo naguo harĩ Mwathi Yahshua na wendo ũrĩa muonagia arĩa othe aamũre,

itatigaga gũcokia ngatho nĩ ũndũ wanyu. Nĩ thiaga na mbere kũmũgweta mahoya-inĩ makwa,

atĩ Kĩhoti wa Mwathi witũ Yahshua Messiya, o we Ithe mwene riri, amũhe Roho wa ũũgĩ, na wa ũguũrio ũhoro-inĩ wĩgiĩ ũmenyo ũrĩa wa ma ũmwĩgiĩ

Nĩ atũmĩte maitho manyu ma ũtaũku maguũkĩrwo wega, nĩguo mũmenye kĩĩrĩgĩrĩro kĩrĩa aamwĩtĩire, ũtonga ũrĩ na riri ũrĩa aigĩte ũrĩ igai rĩa andũ arĩa aamũre,

na ũrĩa hinya wake ũnenehete mũno harĩ ithuĩ arĩa twĩtĩkĩtie. Nĩ kũringana na wĩra wa ũhoti wa hinya wake,

ũrĩa aahũthĩrire harĩ Messiya rĩrĩa aamũriũkirie kuuma kũrĩ arĩa akuũ na akĩmũikaria thĩ guoko-inĩ gwake kwa ũrĩo kũrĩa igũrũ,

akĩmũtũũgĩria mũno gũkĩra thirikari ciothe na wathani na hinya na ũnene na rĩĩtwa o rĩothe rĩĩtanagwo, na to mũtabarĩre-inĩ ũyũ wa maũndũ no nĩ nginya ũrĩa ũgoka.

Ningĩ nĩ aaigire indo ciothe rungu rwa makinya make na akĩmũtua mũtwe igũrũ rĩa maũndũ mothe megiĩ kĩũngano,

o kĩo mwĩrĩ wake, ũiyũru wa ũcio ũiyũragia maũndũ mothe na njĩra ciothe.