Aefeso 6

Inyuĩ ciana, athĩkagĩrai aciari anyu mũrĩ na ũiguano na Yahweh, nĩ gũkorũo ũndũ ũcio nĩ wa ũthingu.

“Tĩaga thoguo na nyũkwa,” nĩrĩo Rĩathani rĩa mbere rĩrĩ na kĩĩranĩro:

“Nĩguo maũndũ maku mathiĩ wega na ũtũũre ihinda iraya thĩinĩ wa thĩ.”

Na inyuĩ maithe-rĩ, mũtikarakaragie ciana cianyu, no thiĩi na mbere gũcirera mũgĩcirũngaga na mũgĩcitaaraga na njĩra ya Yahweh.

Na inyuĩ ngombo-rĩ, athĩkagĩrai athani anyu a gũkũ thĩ, mũgĩĩtigagĩra na mũkĩinainaga mũrĩ na ngoro o imwe, ta ũrĩa mwathĩkagĩra Messiya,

to hĩndĩ ĩrĩa mũronwo, atĩ nogetha mũkenie andũ, no mwĩkage ũguo mũrĩ ta ngombo cia Messiya, mũgĩkaga wendi wa Yahweh na ngoro yothe

Tungatagai mũrĩ na mwerekera mwega, ta arĩ Yahweh mũratungatĩra no ti andũ,

tondũ nĩ mũũĩ atĩ ũndũ o wothe mwega mũndũ ekaga, nĩ akaarĩhwo nĩ Yahweh, arĩ ngombo kana arĩ mũndũ ũrĩ na wĩyathi

O na inyuĩ athani-rĩ, ĩkagai ngombo cianyu o ta ũguo, mũtegũciĩhĩtĩra, nĩ gũkorũo nĩ mũũĩ atĩ Mwathi wacio na wanyu arĩ igũrũ, na ndarĩ mũthutũkanio.

Ngĩrĩkĩrĩria-rĩ, thiĩi na mbere kũgĩa na hinya thĩinĩ wa Yahweh kũgerera ũhoti wa hinya wake

Mwĩhumbei indo ciothe cia mbaara cia Yahweh nĩguo mũhotage kũrũgama mwĩhandĩte mwĩtiirie mawara ma Mũcukani;

tondũ tũrĩ na mbaara, na tũtirarũa na mwĩrĩ na thakame, no tũrarũa na thirikari, na atongoria, na athani a thĩ ĩno ĩ na nduma, maroho moru marĩa marĩ igũrũ

Kwoguo mwĩhumbei indo ciothe cia mbaara cia Yahweh, nĩguo mũkaahota gwĩtiiria mũthenya ũrĩa wa ũũru, na mwarĩkia kũhingia maũndũ mothe, mũrũgame mwĩhandĩte.

Nĩ ũndũ ũcio-rĩ, rũgamai mwĩhandĩte, mwĩyohete mũcibi wa ũhoro ũrĩa wa ma njohero-inĩ cianyu, na mũkehumba gako ga gĩthũri karĩa ka ũthingu,

na mwĩkĩrĩte iratũ magũrũ-inĩ manyu mwĩhaarĩirie kũhunjia ũhoro ũrĩa mwega wa thayũ

Makĩria ma indo icio ciothe-rĩ, oyai ngo ĩrĩa nene ya wĩtĩkio, ĩrĩa mũrĩhotaga kũhoria nayo mĩguĩ yothe ĩrĩa ĩrĩ mwaki ya ũrĩa mũũru

Ningĩ ĩtĩkĩrai ngũbia ya ũhonokio, na rũhiũ rwa njora rwa roho, na nĩruo kiugo kĩa Yahweh,

mũgĩthiaga na mbere kũhoya mahoya ma mĩthemba yothe na gũthaithana hingo ciothe thĩinĩ wa Roho. Ũhoro-inĩ ũcio ikaragai mwĩiguĩte, mũgĩthaithanaga hingo ciothe nĩ ũndũ wa arĩa othe aamũre

Ningĩ hoyagai nĩ ũndũ wakwa, nĩguo heagwo ciugo hĩndĩ ĩrĩa ndatumũra kanua, nĩgetha hotage kwaria na ũcamba ngĩmenyithania hitho ĩrĩa nyamũre ĩgiĩ ũhoro ũrĩa mwega,

ũhoro o ũcio niĩ ndĩ barũthi waguo njohetwo mĩnyororo, na ningĩ nĩguo hotage kwaria ũhoro waguo na ũcamba, o ta ũrĩa njagĩrĩirũo kwaria.

Rĩu-rĩ, nĩguo o na inyuĩ mũmenye ũhoro wakwa na ũrĩa ndĩrathiĩ na mbere, Tikiko, mũrũ wa Ithe witũ nyendete na ndungata njĩhokeku thĩinĩ wa Messiya, nĩ ekũmũmenyithia maũndũ mothe

Ndĩramũtũma kũrĩ inyuĩ nĩ ũndũ wa gĩtũmi gĩkĩ, atĩ mũmenye ũrĩa ithuĩ tũtariĩ na nĩguo omĩrĩrie ngoro cianyu.

Ariũ a Ithe witũ marogĩa na thayũ na wendo hamwe na wĩtĩkio kuuma kũrĩ Yahweh Ithe witũ, na Mwathi Yahshua Messiya

Ũtugi mũnene ũroikara hamwe na arĩa othe mendete Mwathi witũ Yahshua Messiya na wendo ũtangĩthira.