Aefeso 5

Nĩ ũndũ ũcio-rĩ, tuĩkai a kwĩgerekania na Yahweh, ta ciana ciendetwo mũno,

na mũtũũre mwendaine o ta ũrĩa Messiya aatwendire na akĩĩruta nĩ ũndũ witũ arĩ iruta rĩrĩ na mũtararĩko mwega na igongona rĩrutĩirwo Yahweh.

No rĩrĩ, thĩinĩ wa thiritũ yanyu gũtikanaiguĩke gũkĩgwetwo ũmaraya, kana ũndũ o na ũrĩkũ wa waganu, kana ũkoroku, tondũ maũndũ macio matiagĩrĩire harĩ andũ a Yahweh arĩa aamũre

O na gũtikanagĩe mĩario ya ũũra-thoni, o na kana mĩario ya ũrimũ, o na kana mĩario ya itherũ rĩtarĩ rĩega. Mĩario ta ĩyo ndĩagĩrĩire kũgwetagwo; nĩ kaba gũcokagĩria Yahweh ngatho

Tondũ nĩ mũũĩ wega na ma atĩ: gũtirĩ mũhũri-maraya, kana mũndũ mwaganu, o na kana mũndũ mũkoroku; mũndũ ũrĩa wĩkaga ũguo nĩ mũhoi mĩhianano, andũ ta acio gũtirĩ ũrĩ na igai thĩinĩ wa ũthamaki wa Messiya na wa Yahweh.

Mũtikareke mũndũ o na ũ amũhenie na ciugo cia tũhũ, nĩgũkorwo maũndũ ta macio nĩmo matũmaga mangʼũrĩ ma Yahweh makinyĩre andũ arĩa matamwathĩkagĩra.

Nĩ ũndũ ũcio-rĩ, mũtikagĩe ngwatanĩro nao.

Nĩgũkorwo hĩndĩ ĩmwe mwarĩ nduma, no rĩu mũrĩ ũtheri thĩinĩ wa Yahweh. Tũũrai ta ciana cia ũtheri

(nĩ ũndũ maciaro ma ũtheri monekaga thĩinĩ wa ũhoro wothe wa gwĩkana wega, na wa ũthingu, o na ũhoro wa ma),

na mũtuĩrie muone maũndũ marĩa makenagia Yahweh

Mũtikananyitanĩre na andũ arĩa mekagĩra maũndũ nduma-inĩ marĩa matarĩ maciaro, nĩ kaba mũmoimbũrage.

Nĩgũkorwo o na nĩ thoni kũgweta maũndũ marĩa mekagĩrwo hitho-inĩ nĩ andũ acio aremi

No ũndũ o wothe ũrĩa ũrehetwo ũtheri-inĩ nĩ wonekaga,

nĩgũkorwo ũtheri ũcio nĩguo ũtũmaga kĩndũ o gĩothe kĩoneke. Kĩu nĩkĩo gĩtũmaga kwĩrwo atĩrĩ: “Arahũka, wee ũkomete, ũriũke uume kũrĩ arĩa akuũ, nake Yahweh nĩ egũkwarĩra.”

Nĩ ũndũ ũcio-rĩ, mwĩmenyererei wega ũrĩa mũrĩtũũraga, mũtigatũũrage ta andũ matarĩ ogĩ, no tũũrai ta andũ ogĩ,

mũkĩhũthagĩra mweke o wothe mũrĩ naguo tondũ matukũ maya nĩ moru.

Nĩ ũndũ ũcio mũtigaikare ta andũ akĩĩgu, no ikaragai mũmenyete wega ũrĩa Yahweh endaga.

Ningĩ-rĩ, mũtikarĩĩo nĩ ndibei, nĩ ũndũ ũrĩu nĩguo ũtwaragĩrĩria mũndũ ũmaramari-inĩ. Handũ ha ũguo-rĩ, iyũrwoi nĩ Roho.

Aranagĩriai mũndũ na ũrĩa ũngĩ na ciugo cia thaburi, na nyĩmbo cia kũinĩra Yahweh, o na nyĩmbo cia kũguna maroho. Inagai na mũtungage nyĩmbo ngoro-inĩ cianyu nĩ ũndũ wa Yahweh,

na mũcokagĩrie Yahweh o we Ithe witũ ngatho maũndũ-inĩ mothe, thĩinĩ wa rĩĩtwa rĩa Mwathi witũ Yahshua Messiya.

Mwĩnyihanagĩriei mũndũ na ũrĩa ũngĩ nĩ ũndũ wa ũrĩa mũtĩĩte Messiya.

Inyuĩ atumia-rĩ, mwĩnyihagĩriei athuri anyu o ta arĩ Yahshua mũrenyihĩria

Nĩgũkorwo mũthuri nĩwe mũtwe wa mũtumia o ta ũrĩa Messiya nake arĩ we mũtwe wa Ũngano, o guo mwĩrĩ wake, na nowe Mũhonokia waguo.

Na rĩrĩ, o ta ũrĩa ũngano wĩnyihagĩria Messiya, ũguo no taguo nao atumia magĩrĩirwo nĩ kwĩnyihĩria athuri ao maũndũ-inĩ mothe.

Inyuĩ athuri-rĩ, endagai atumia anyu, o ta ũrĩa Messiya eendire ũngano na akĩĩruta nĩ ũndũ waguo

nĩguo awamũre aũtue mwamũre-rĩ, nĩ kũũthambia aũthambirie na maĩ na ũndũ wa kiugo,

nĩguo ahote kwĩrehere we mwene ũngano ũrĩ na riri, ũtarĩ irooro kana handũ hagũtharu, o na kana kaũgũ kangĩ o gothe, no ũtuĩke ũngano Mwamũre na ũtarĩ na ũcuke

O ũguo, noguo athuri magĩrĩirwo nĩ kwenda atumia ao o ta arĩ mĩĩrĩ yao ene. Mũndũ ũrĩa wendete mũtumia wake nĩwe mwene wĩyendete

Nĩgũkorwo gũtirĩ mũndũ ũthũire mwĩrĩ wake mwene, no nĩ kũhe aũheaga irio na akaũmenyerera, o ta ũrĩa Messiya ekaga ũngano,

Tondũ tũrĩ ciĩga cia mwĩrĩ wake.

“Gĩkĩ nĩkĩo gĩtũmaga mũndũ mũrũme atige ithe na nyina, na anyitane na mũtumia wake, nao erĩ magatuĩka mwĩrĩ ũmwe.”

Ũyũ nĩ ũhoro wa hitho nene, na nĩ wa bata mũno, na ngiuga ũguo nĩ ũhoro wa Messiya na ũngano ndĩraaria.

No rĩrĩ, o mũndũ nĩ endage mũtumia wake o ta ũrĩa eyendete we mwene, nake mũtumia nĩ aheage mũthuri wake gĩtĩo.