Aefeso 4

Nĩ ũndũ ũcio, niĩ Saũlũ njohetwo nĩ ũndũ wa Yahshua, nĩ ndamũthaitha mũtũũre na mũtũũrĩre ũringaine na gwĩtwo kũrĩa mwetirwo.

Mwĩnyihĩtie biũ na mũhoreire na mũkirĩrĩirie, na ningĩ mũkiranagĩrĩrie mũndũ na ũrĩa ũngĩ mũrĩ na wendani.

Geriai na kĩyo nĩguo mũtũũrie ũrũmwe wa Roho, muohanĩtio na thayũ

Nĩgũkorwo kũrĩ mwĩrĩ o ũmwe na Roho o ũmwe, o ta ũrĩa mwetĩirwo kĩĩrĩgĩrĩro o kĩmwe rĩrĩa mwetirwo,

nake Mũhonokia no ũmwe, na wĩtĩkio ũmwe, na ũbatithio o ũmwe;

nake Yahweh no ũmwe na nowe Ithe wa andũ othe, ũrĩa ũrĩ igũrũ rĩa andũ othe, na arĩ kũndũ guothe, na thĩinĩ wa andũ othe.

No rĩrĩ, mũndũ o mũndũ witũ nĩ aheetwo wega wa Yahweh, kũringana na ũrĩa Messiya aheanaga

Nĩkĩo Maandĩko moigaga atĩrĩ: “Rĩrĩa aambatire igũrũ, nĩ atongoririe arĩa maatahĩtwo mũtongoro-inĩ wake, na akĩhe andũ iheo.”

(Rĩu-rĩ, ciugo icio atĩ “nĩ ambatire igũrũ” nĩ kuuga atĩa, angĩkorwo ti kuuga atĩ o na nĩ aikũrũkire thĩ kũrĩa kũriku mũno

Ũcio waikũrũkire nowe ũrĩa wambatire igũrũ o igũrũ mũno, nĩgetha aiyũre kũndũ guothe.)

Ũcio nĩwe ũrĩa wathurire andũ amwe matuĩke atũmwo, na angĩ matuĩke anabii, na angĩ matuĩke ahunjia, na arĩa angĩ matuĩke arĩithi a ngoro cia andũ o na arutani,

nĩguo ahaarĩrie andũ a Yahweh nĩ ũndũ wa wĩra wa gũtungata, nĩgetha mwĩrĩ wa Messiya wongererwo hinya,

o nginya rĩrĩa ithuothe tũkaagĩa na ũrũmwe ũhoro-inĩ wa gwĩtĩkia o na wa kũmenya Mũrũ wa Yahweh, na tũtuĩke agima o nginya tũgĩe na ũgima mũkinyanĩru kũna o ta ũrĩa Messiya ahaana.

Hĩndĩ ĩyo tũgĩtige gũtuĩka tũkenge, tũrĩa tũikanagio mwena na mwena, o na tũkĩhurutagwo haha na harĩa nĩ rũhuho o ruothe rwa ũrutani, na tũgĩtwaragĩrĩrio nĩ wara na ũhinga wa andũ ũrĩa mahenagĩrĩria andũ naguo makamahĩtithia.

Handũ ha ũguo-rĩ, tũngĩaria ũhoro-wa-ma tũrĩ na wendani, nĩ tũrĩkũraga maũndũ-inĩ mothe thĩinĩ wake ũrĩa arĩ we mũtwe, na nĩwe Messiya

Kuuma kũrĩ we mwĩrĩ wothe ũnyitithanagio na ũkohanio hamwe nĩ nga iria iũnyitithanagia, naguo ũgakũraga na ũkeyakaga guo mwene thĩinĩ wa wendani, o kĩĩga gĩkĩrutaga wĩra wakĩo.

Nĩ ũndũ ũcio ngũmwĩra atĩrĩ, na ngamũringĩrĩria thĩinĩ wa Yahweh, atĩ no nginya mũtige gũtũũraga ta ũrĩa andũ-a-Ndũrĩrĩ matũũraga, marĩ na meciria ma tũhũ.

Ũmenyo wao ũiyũrĩtwo nĩ nduma, na makaamũranio na mũtũũrĩre wa wendi wa Yahweh nĩ ũndũ wa ũrimũ ũrĩa ũrĩ thĩinĩ wao uumanĩte na ũmũ wa ngoro ciao

Nĩ ũndũ wa kwaga thoni ciothe-rĩ, nĩ meheanĩte kũrĩ thuti cia ũũra-thoni magekaga mawaganu ma mĩthemba yothe, na magathiĩ na mbere kwĩrirĩria mangĩ maingĩ.

No inyuĩ mũtiamenyire Messiya na njĩra ĩyo

Ti-itherũ nĩ mwaiguire ũhoro wake, na mũkĩrutwo mũrĩ thĩinĩ wake kũringana na ũhoro wa ma ũrĩa ũrĩ thĩinĩ wa Yahshua

Nĩ mwarutirwo, ũhoro ũkoniĩ mũtũũrĩre wanyu wa mbere, nĩgetha mwĩaũre mũndũ wanyu ũrĩa wa tene, ũrĩa rĩu ũthũkĩtio nĩ merirĩria make ma maheni;

nĩgetha mwerũhĩrio mwĩcirĩrie wanyu;

na mwĩhumbe mũndũ ũrĩa mwerũ, ũrĩa wombirwo ahaanaine na Yahweh, arĩ na ũthingu na waamũri ũrĩa wa ma.

Nĩ ũndũ ũcio, o ũmwe wanyu no nginya atigane na ũhoro wa maheni, na mwaranagĩrie ũhoro wa ma mũndũ na ũrĩa ũngĩ, nĩgũkorwo ithuothe tũrĩ ciĩga cia mwĩrĩ ũmwe

“Mwarakara mũtikehie”: Mũtikareke riũa rĩthũe mũrĩ o na marakara,

o na mũtikanahe mũcukani kamweke.

Mũndũ ũrĩa ũiyaga, nĩ atige gũcoka kũiya, nĩ kaba arute wĩra, akenogagia, na ekage maũndũ mega na moko make, nĩgetha agĩe na kĩndũ angĩgayana na arĩa mabataire.

Mũtikanareke ndeto njũru ciume tũnua-inĩ twanyu, tiga o iria cia gwaka andũ arĩa angĩ kũringana na mabata mao, nĩguo igunage arĩa marĩciiguaga.

Ningĩ mũtikanaiguithie Roho Mwamũre wa Yahweh ũũru, ũrĩa wamwĩkĩrire mũhũri o nginya rĩrĩa mũthenya ũrĩa wa gũkũũrwo ũgaakinya.

Eheriai gatagatĩ-inĩ kanyu ũũru wa ngoro, na mangʼũrĩ na marakara, na njũgitano na njambanio, o hamwe na rũmena rwa mũthemba o na ũrĩkũ.

Tuganagai na mũiguanagĩre tha, na mũkarekanagĩra mũndũ na ũrĩa ũngĩ, o ta ũrĩa Yahweh aamũrekeire mehia manyu thĩinĩ wa Messiya.